ICIPANDE CA KUSAMBILILAMO 28
ULWIMBO 123 Tulenakila Yehova Lesa
Bushe Mwalishiba Ubupusano Bwaba pa Cine no Bufi?
“Iminineni ndi, abaikaka icine mu misana.” —EFES. 6:14.
IFYO TWALALANDAPO SANA
Ifyo twingacita pa kuti tuleisambilisha pa bupusano bwaba pa cine ico Yehova atusambilisha e lyo no bufi ubo Satana na balwani besu babepa.
1. Bushe mumona shani icine?
ABANTU ba kwa Yehova balitemwa icine icaba mu Cebo ca kwa Lesa. Icine e calenga tukwate icitetekelo. (Rom. 10:17) Twalishininkisha ukuti Yehova e wabikako icilonganino ca Bena Kristu pa kuti cibe ‘uluceshi kabili ciletungilila icine.’ (1 Tim. 3:15) Kabili tulanakila ‘abatutungulula’ nga batulondolwela icine icaba mu Baibo kabili nga batweba ukucita ifintu ukulingana ne fyo Lesa afwaya.—Heb. 13:17.
2. Ukulingana na mashiwi yaba pali Yakobo 5:19, cinshi cingatucitikila nangu ca kuti twalishiba icine?
2 Na lyo line, na pa numa ya kwishiba icine no mulimo icilonganino ca kwa Lesa cibomba pa kututungulula, Satana na balwani besu kuti batulufya. (Belengeni Yakobo 5:19.) Ico Satana afwaisha ca kuti twaleka ukucetekela Baibo nelyo twaleka ukucetekela ifyo icilonganino ca kwa Lesa citweba.—Efes. 4:14.
3. Mulandu nshi tulingile ukulakonkela icine? (Abena Efese 6:13, 14)
3 Belengeni Abena Efese 6:13, 14. Nomba line, Satana Kaseebanya ali no kubepa inko shonse ubufi pa kuti shikemine Yehova. (Ukus. 16:13, 14) Twalishiba no kuti Satana ali no kwesha na maka yonse ukulufya abantu ba kwa Yehova. (Ukus. 12:9) E mulandu wine tulingile ukwishibila ubupusano bwaba pa cine no bufi e lyo no mulandu tulingile ukulakonkela icine. (Rom. 6:17; 1 Pet. 1:22) Pa kuti tukapusuke ubucushi bukalamba, tukakabila ukulakonka icine.
4. Finshi twalasambilila muli cino cipande?
4 Muli cino cipande, twalasambilila pa mibele ibili iyo tulingile ukukwata pa kuti tuleishiba icine icaba mu Baibo na pa kuti tulekonka ifyo icilonganino ca kwa Lesa citweba. Lyena twalasambilila pa fintu fitatu ifyo tufwile ukucita pa kuti twingatwalilila ukulakonka icine.
IMIBELE IYO TULINGILE UKUKWATA PA KUTI TULEISHIBA ICINE
5. Bushe ukutiina Yehova kulenga shani twaishiba icine?
5 Tulingile ukulatiina Yehova. Nga tuletiina Yehova, tulamutemwa sana ica kuti te kuti tucite nangu cimo icingamukalifya. Tulafwaisha ukusambilila pa bupusano bwaba pa calungama ne calubana, pa cine no bufi, pa kuti Yehova atutemwe. (Amapi. 2:3-6; Heb. 5:14) Tatufwile ukulatiina sana abantu ukucila ifyo twatemwa Yehova, pantu ifyo abantu batemwa ilingi line filakalifya Yehova.
6. Bushe ukutiina abantu kwalengele shani intungulushi 10 isha bena Israele shilanda icine?
6 Nga tuletiina abantu ukucila ifyo tutiina Yehova, kuti twaleka ukukonka icine. Natulande pa ntungulushi sha mu Israele 12 ishaile mu kulengula icalo ico Yehova alaile abena Israele. Inengu 10 pali ishi inengu 12, shaletiina sana abena Kanaani ukucila ifyo shatemenwe Yehova. Ishi inengu 10 shaebele abena Israele ukuti: “Te kuti tuyelwisha balya bantu, pantu balikosa ukutucila.” (Impe. 13:27-31) Kwena ukulingana ne fyo abantu bamona ifintu, ca cine abena Kanaani bali abakosa ukucila abena Israele. Lelo abena Israele abalelanda ukuti te kuti bacimfye abalwani babo, tabaletontonkanya pali Yehova. Inengu 10 shalingile ukubika amano ku fyo Yehova alefwaya abena Israele bacite. Shalingile no kutontonkanya pa fyo Yehova acitilepo abena Israele ninshi tapalapita ne nshita iikalamba. Abacita ifi nga balilwike ukuti Yehova alikwata sana amaka ukucila ayo abena Kanaani bakwete. Yoshua na Kalebu tabali nga ishi nengu ishishakwete icitetekelo pantu bena balefwaya Yehova abatemwe. Baebele abantu abati: “Yehova nga atemwa, nangu cibe shani akatwingisha muli ici calo kabili akatupeela cikaba cesu.”—Impe. 14:6-9.
7. Kuti twacita shani pa kuti tuletiina sana Yehova? (Moneni ne cikope.)
7 Pa kuti tuletiina sana Yehova, tulingile ukulabika amano ku kumusekesha muli fyonse ifyo tusalapo ukucita. (Amalu. 16:8) Ilyo mulebelenga Baibo, muleyipusha amuti, ‘Bushe ifyo ndebelengapo nga nine fyalecitikila, nga finshi nasalilepo ukucita?’ Ku ca kumwenako, elenganyeni ukuti e ko muli ilyo intungulushi sha bena Israele shile-eba abantu ukuti te kuti bacimfye abena Kanaani. Bushe nga mwalicetekele ifyo Yoshua na Kalebu balandile nelyo nga mwalitwalilile ukusekesha Yehova pa mulandu wa kuti mulamutiina? Abena Israele bonse abaliko pali ilya nshita tabasumine ukuti ifyo Yoshua na Kalebu balelanda fyali fya cine. Ifi bacitile fyalengele Yehova ebasuminisha ukwingila mu calo abalaile.—Impe. 14:10, 22, 23.
Bushe nga ni bani mwacetekele? (Moneni paragrafu 7)
8. Mibele nshi iyo tulingile ukwesha na maka ukukwata kabili mulandu nshi?
8 Muleicefya. Abantu abaicefya e bo Yehova asokolwela icine. (Mat. 11:25) Twali-icefeshe pa kuti batusambilishe icine. (Imil. 8:30, 31) Na lyo line, tufwile ukucenjela pa kuti twiba ne cilumba. Icilumba kuti calenga twalatontonkanya ukuti ifyo tutontonkanya kuti fyalingana fye na mashinte ya mafunde ayaba mu Baibo ne fyo icilonganino ca kwa Yehova citweba.
9. Finshi twingacita pa kuti tutwalilile ukuba abaicefya?
9 Nga tulefwaya ukutwalilila ukuba abaicefya, tulingile ukulaibukisha ukuti tuli banono sana nga kuilinganya ku fyo Yehova akula. (Amalu. 8:3, 4) Na kabili, kuti twapepa kuli Yehova ukuti alenge ukuti tube abaicefya, kabili tuleitemenwa ukusambilila. Yehova akatwafwa pa kuti tukalebika amano ku fyo amona ifintu, ku fyo atusambilisha mu Cebo cakwe na mu cilonganino cakwe, ukucila ukulabika amano ku fyo tutontonkanya. Ilyo mulebelenga Baibo, mulemona ifilanga ukuti Yehova alitemwa abantu abaicefya kabili alipata aba cilumba, abaitutumuna, na baituntumba. Kabili mulecenjela sana pa kuti mutwalilile ukuba abaicefya nga ca kuti bamupeela imilimo iingalenga mwaishibikwa nelyo mwakwata amaka.
KUTI TWATWALILILA SHANI UKUKONKA ICINE?
10. Ni bani abo Yehova abomfya pa kweba abantu bakwe ifya kucita ne fya kukonka ukutula fye na kale?
10 Twalilileni ukukonka ifyo icilonganino ca kwa Yehova citweba. Mu nshita ya bena Israele, Yehova alebomfya Mose lyena pa numa aishiletendeka ukubomfya Yoshua pa kweba abena Israele ifyo alefwaya ukuti bacite. (Yosh. 1:16, 17) Lyonse ilyo abena Israele balemona Mose na Yoshua ukuti balelandilako Yehova Lesa, ifintu fyalebawamina. Ilyo papitile imyaka iingi lintu icilonganino ca Bena Kristu capangilwe, abatumwa 12 e bale-eba abantu ba kwa Lesa ifya kucita. (Imil. 8:14, 15) Pa numa, muli ili ibumba lya batumwa mwaishileba na bakalamba bambi aba mu Yerusalemu. Pa mulandu wa kuti aba mu filonganino balekonka ifyo aba baume ba cishinka balebeba, “icitetekelo ca ba bwananyina abali mu filonganino calekoselako kabili balefulilako cila bushiku.” (Imil. 16:4, 5) Muno nshiku, na ifwe Yehova alatupaala nga tulekonka ifyo icilonganino cakwe ciletweba. Nomba bushe Yehova kuti aumfwa shani nga ca kuti tulekaana ukumfwila abo Yehova apeela amaka ya kututungulula? Pa kuti twasuke ici cipusho, lekeni tulande pa fyo abena Israele bacitile ilyo baleya ku Calo ca Bulayo.
11. Mu nshita ya bena Israele, cinshi cacitikile abalesuusha Mose uo Lesa asalile ukulabatungulula? (Moneni ne cikope.)
11 Inshita imo ilyo abena Israele baleya ku Calo ca Bulayo, abaume bamo abali abalumbuka mu lukuta balesuusha Mose kabili balelanda amashiwi ayabipa pa mulimo uo Yehova apeele Mose. Balelanda abati: “Abantu bonse muli ulu lukuta [te Mose fye] ba mushilo kabili Yehova ali nabo.” (Impe. 16:1-3) Nangu ca kuti Lesa alemona ukuti “ulukuta lonse” lwali ulwa mushilo, Yehova asalile Mose ukulatungulula abena Israele. (Impe. 16:28) Aba bacipondoka tabalesuusha fye Mose, lelo balesuusha na Yehova. Tababikile amano ku fyo Yehova alefwaya, lelo babikile amano ku fyo balefwaya, e kutila ku kukwata amaka ayengi e lyo na ku kufwaya ukulumbuka. Yehova alipeye aba bacipondoka abali pa ntanshi pamo na bantu abengi abalebatungilila. (Impe. 16:30-35, 41, 49) Te kuti tutwishike no kutwishika ukuti na muno nshiku mwine Yehova alipata abantu abashicindika abantu abo apeela insambu sha kutungulula mu cilonganino cakwe.
Bushe nga ni bani mwatungilile? (Moneni paragrafu 11)
12. Finshi fingalenga twatwalilila ukucetekela icilonganino ca kwa Yehova?
12 Kuti twatwalilila ukucetekela icilonganino ca kwa Yehova. Nga ca kuti abaletungulula bamona ukuti tulingile ukwalukako mu fyo twaishibe icine cimo ica mu Baibo nelyo mu fyo tubombela Lesa, tabashingashinga ukwalula. (Amapi. 4:18) Icilenga balecita ifi, ni co bafwaya ukulalenga Yehova alesekelela. Na kabili, lyonse ilyo balesalapo ifya kucita, balakonka ifyaba mu Cebo ca kwa Lesa kabili ifyaba mu Cebo ca kwa Lesa e fyo abantu ba kwa Lesa bonse bafwile ukulakonka.
13. Bushe ‘ifya kukonka ifyaba mu mashiwi ayasuma’ ni finshi, kabili finshi tufwile ukulacita?
13 ‘Tuleikatisha ifya kukonka ifyaba mu mashiwi ayasuma.’ (2 Tim. 1:13) ‘Ifya kukonka ifyaba mu mashiwi ayasuma,’ fintu ifyo fwe Bena Kristu tusambilila ifyaba mu Baibo. (Yoh. 17:17) Fyonse ifyo twasuminamo fifuma muli ifi ifyo tusambilila mu Cebo ca kwa Lesa. Icilonganino ca kwa Yehova citusambilisha ukuti ifi fine e fyo tufwile ukulakonka. Nga tulecita ifi, Yehova akalatupaala.
14. Cinshi calengele Abena Kristu bamo baleke ukukonka ‘ifya kukonka ifyaba mu mashiwi ayasuma’?
14 Cinshi cingacitika nga twaleka ukukonka ‘ifya kukonka ifyaba mu mashiwi ayasuma’? Natulande pa ca kumwenako. Mu nshita ya batumwa, Abena Kristu bamo balesalanganya ilyashi lya kuti ubushiku bwa kwa Yehova bwalifikile. Cimoneka kwati kwali kalata iyo abantu balemona kwati umutumwa Paulo e walembele iyalelanda ifi. Ukwabula ukuti beshibe bwino ifishinka, Abena Kristu bamo mu Tesalonika balisumine ifyali muli iyi kalata kabili batendeke no kusabankanya ili lyashi. Nga balibukishe ifyo Paulo alebasambilisha ilyo ali nabo, nga tabasumine ubu bufi. (2 Tes. 2:1-5) Paulo alifundile aba bwananyina ukuti tabalingile ukulasumina fye fyonse ifyo baumfwa. Na kabili pa kuti tababepelwe ku ntanshi, Paulo asondwelele kalata yakwe iyalenga bubili ku bena Tesalonika na mashiwi ya kuti: “Ine ne Paulo, ne mwine nine nalemba aya mashiwi ya kumuposha. Ici e ca kwishibilako amakalata yandi yonse; ifi e fyo nemba.”—2 Tes. 3:17.
15. Kuti twaicingilila shani ku bufi ubumoneka kwati cine? Landeniko pa fyacitike. (Moneni ne cikope.)
15 Finshi twingasambilila ku mashiwi Paulo aebele abena Tesalonika? Nga ca kuti twaumfwa fimo ifipusene ne fyo twasambilila mu Baibo nelyo ilyashi limo ilyatupapusha, tufwile ukwiluka. Mu fyalo ifyaletekwa na Soviet Union, abalwani besu bapeele aba bwananyina kalata imo iyo batile yafumine ku maofesi yakalamba. Muli iyi kalata, bamunyinefwe babebele ukuti nabo bapange icilonganino cabo beka. Iyi kalata yalemoneka fye kwati yafumine ku maofesi yakalamba. Lelo aba bwananyina abali aba cishinka tababepelwe ne fyali muli iyi kalata. Balilwike ukuti ifyali muli iyi kalata fyalipusene ne fyo basambilile mu Cebo ca kwa Lesa. Muno nshiku, abalwani besu balabomfya Intaneti ne nshila shimbi isha kulanshanishishamo pa kuti batufulunganye na pa kuti batupaatukanye. Mu cifulo ca kuleka ‘amatontonkanyo yesu yafulungana bwangu,’ kuti twaicingilila nga ca kuti twatontonkanya sana pa fyo twaumfwa nelyo ifyo twabelenga nga nafilingana ne cine ico twasambilila.—2 Tes. 2:2; 1 Yoh. 4:1.
Mwilasumina ubufi ubumoneka kwati cine (Moneni paragrafu 15) a
16. Ukulingana na mashiwi yaba pa Abena Roma 16:17, 18, cinshi tulingile ukucita nga ca kuti bamo baleka ukukonka icine?
16 Twalilileni ukwikatana na baba ne cishinka kuli Yehova. Lesa afwaya twaba abaikatana ilyo tulemupepa. Tukatwalilila ukuba abaikatana nga ca kutila twatwalilila ukukonka icine. Bonse abaleka ukukonka icine balalenga mu cilonganino mwaba amalekano. E ico Lesa afwaya ‘tuletaluka’ abantu ba musango uyu pantu nga tatucenjele na ifwe bene kuti twaleka ukukonka icine.—Belengeni Abena Roma 16:17, 18.
17. Busuma nshi bwaba mu kwishiba icine no kutwalilila ukucikonka?
17 Nga twaishiba icine no kulacikonka, tukatwalilila ukuba ifibusa fya kwa Yehova kabili icitetekelo cesu cikatwalilila ukuba icakosa. (Efes. 4:15, 16) Tukacingililwa ku fya bufi ifyo Satana asambilisha e lyo no bufi ubo asalanganya. Na kabili Yehova akatucingilila ilyo kukaba ubucushi bukalamba. Twalilileni ukulakonka icine, “na Lesa wa mutende akaba na imwe.”—Fil. 4:8, 9.
ULWIMBO 122 Beni Abashangila, Abashitelententa!
a UBULONDOLOSHI BWA CIKOPE: Icikope cilelangilila ifyo cali ilyo bamunyinefwe abali mu fyalo ifyaletekwa na Soviet Union bapokelele kalata iyamoneke kwati yafumine ku maofesi yakalamba lelo iyafumine ku balwani besu. Muno nshiku, abalwani besu kuti babomfya Intaneti pa kusalanganya ilyashi lya bufi pa cilonganino ca kwa Yehova.
