IFYO BAIBOLO ISAMBILISHA | INCITO
I
Nangu ca kuti Baibolo yalembelwe kale, amashiwi ya bamo yalicindama nga nshi. Ifyo ilanda pa lwa ncito filatwafwa sana na muno nshiku nga filya fine fyaleyafwa abantu ilyo Baibolo yalembelwe fye.
Bushe tuligile ukulamona shani ukubomba incito?
IFYO ABANTU BAMO BALANDA
Nga ulefwaya ukutwalilila ukubomba incito wakwata, ufwile ukulabika sana amano ku ncito ukucila ifyashala. Ukutontokanya kwa musango uyu kwalilenga abantu abengi ukukaanabika sana amano ku ndupwa shabo na ku bumi bwabo pantu inshita iikalamba baba fye ku ncito.
IFYO BAIBOLO ILANDA
Baibolo itukoselesha ukulabomba, kabili yalilesha ubunang’ani. (Amapinda 6:6-11; 13:4) Na lyo line, taitukoiselesha ukulabomba sana ica kuti twanaka twafuma na kwi fupa. Itukoselesha ukuti tulingile ukulatuushako ilyo tulebomba. Lukala Milandu 4:6 itila “Ukutuusha panono kwawama ukucila ukucishamo ukubombesha no kuuma fye umwela.” Kanshi, tatufwile ukulabomba inshita iikalamba sana ica kuti twalekelesha ne ndupwa shesu no bumi bwesu. Tamwaba ubusuma mu kulabombesha ukwabula ukutushako!
“Ku muntu takwaba icisuma icacila pa kulya no kunwa no kusekelamo mu kubombesha kwakwe.”—Lukala Milandu 2:24.
Ni ncito ya musango nshi mufwile ukulabomba?
IFYO ABANTU BAMO BALANDA
Kulila fye incito ulebomba nga ya kufola indalama ishingi, ninshi ili fye bwino. Ukutontokanya kwa musango uyu pamo no kufwaisha ukukwata indalama ishingi, kwalilenga abantu bamo ukutendeka ukucita amakwebo mu bufumfuntungu no kwingila incito iyo ubuteko bwabinda.
Bamo basumina fye ukwingila incito iyo balefwaisha sana kabili iyo batemwa sana. Lelo nga baingila incito imbi, bamona kwati kuicusha fye. Ici cilenga belatemwa incito babomba kabili balaba no bunang’ani ilyo balebomba. Limo balakaana no kwingila ncito ishisuma fye pa mulandu wa kutontonkanya ukuti ni ncito ishasuulwa.
IFYO BAIBOLO ILANDA
Baibolo taisuminisha abantu ukwingila incito iyingalenga umuntu ukulabepa nelyo ukucena abantu. (Ubwina Lebi 19:11, 13; Abena Roma 13:10; 1 Petro 3:16) Incito iisuma ni ilya iilenga abantu bambi banonkelamo e lyo no kulenga uuleibomba ‘ukukwata kampingu musuma.’—1 Petro 3:16.
Baibolo isambilisha ukuti icintu icacindama sana ico incito icita kutulenga twakwata umwa kwikala no kulasunga bwino indupwa shesu. Kwena, tacabipa ukutemwa incito tulebomba, lelo tulingile ukulaibukisha ukuti incito tubomba teyacindama sana pa fintu fyonse.
“Batata balabomba sana. Balabomba incito ya ku mubili e lyo ne milimo imbi mu cilonganino ica nte sha kwa Yehova. Lelo nangu balikwata imilimo iingi, balabomba bwino ica kuti balashako ne nshita iya kuti bengaba pamo naine, no mukalamba wandi umwanakashi e lyo na bamayo. Batata balikwata incito ishingi isha kubomba lelo tabatulekelesha.”—Alannah.
Kwena nga twamona ifyo imitengo ya fintu ilenina, kuti twalasakamikwa, lelo Baibolo itukoselesha ukuti tatufwile ukulasakamikwa sana. Itila: “Pa kuba ne fya kulya ne fya kufwala no mwa kwikala, tuteke imitima kuli ifi fine.” (1 Timote 6:8) Aya mashiwi tayalepilibula ukuti tatulingile ukukwata ifintu ifisuma. Lelo tufwile ukwishiba bwino ifyo twingaba na maka ya kushita kabili no bwingi bwa fipe tufwile ukukwata.—Luka 12:15.
IFYO MUKANONKELAMO
Mulebombesha kabili mulebikako amano ku ncito mubomba nangu ca kutila iyo incito te kuti imuletele indalama ishingi nelyo ni ncito iyo mushaleenekela ukuti e yo mukalabomba. Nga mulebombesha mukalatemwa ukwishiba ukuti na mubomba bwino umulimo wenu, kabili mukeshibisha ne ncito mubomba.
Lelo, mulebomba mu kulinga. Mulekwatako inshita ya kutuusha. Ukutuusha kulawama nga natubomba bwino incito. Na kabili, nga tulebomba ica kuti tulekwata ifyo tukabila, tukalaumfwa bwino kabili abantu bambi ukubikako na balupwa wesu bakatucindika.—2 Abena Tesalonika 3:12.
“Mwisakamikwa amuti, ‘Tulelya nshi?’ nelyo, ‘Tulenwa nshi?’ nelyo, ‘Tulefwala nshi?’ . . . Shinwe wa mu muulu alishiba ukuti mulakabila ifi fyonse.”—Mateo 6:31, 32.
Nalimo Kuti Mwatemwako ne fi
LOLENI!
Ifyebo Fyabamo Lyonse Filabomba Kabili Kuti Fyayafwa Umuntu Fye Onse—Ubufumacumi
Nga ca kuti Ba Raquel balisumine ifyo babebele, nga balipangile indalama ishingi, lelo batile ukuti ifyo basanga pa kukaana ukucita ifyo babebele fyalicindama sana.
ULUPUNGU LWA KWA KALINDA
Ifyo Mwingacita pa Kuti Mutemwe Ukubombesha
Belengeni ifyo Baibolo yalanda ifingamwafwa ukutemwa incito mubomba.
