Mulandu Nshi Uwa Kupepela? Bushe Lesa Akanjasuka?
Ifyo Baibolo yasuka ici cipusho
Ee, kuti ayasuka. Ifyalembwa mu Baibolo e lyo ne fyo abantu bapitamo filanga fye ukuti Lesa alasuka amapepo. Baibolo ilanda ukuti: “[Lesa] Akacitila ababa na katiina kuli ena ifyo balefwaya, akomfwa ne nkuuta yabo, kabili akabapususha.” (Amalumbo 145:19) Nampo nga Lesa akasuka amapepo yenu nelyo iyo cikashintilila pali imwe.
Ifyo Lesa amona ukuti fyalicindama sana
Kupepa kuli Lesa, te kuli Yesu, Maria, abatakatifu, bamalaika nelyo ifipasho. Ni Yehova e ka fye e ‘umfwa amapepo.’—Amalumbo 65:2.
Kupepa ukulingana ne fyo Lesa afwaya ifyaba mu Baibolo.—1 Yohane 5:14.
Kupepa mwi shina lya kwa Yesu, ukwishiba icifulo akwata. Yesu atile: “Takuli uwisa kuli Tata kano aishila muli ine.”—Yohane 14:6.
Kupepa ukwabula ukutwishika, ukulomba Lesa ukutulundilako icitetekelo.—Mateo 21:22; Luka 17:5.
Kuba abaicefya kabili abafumacumi. Baibolo itila: “Yehova alisumbuka, lelo alamona abaiceefya.”—Amalumbo 138:6.
Kuba no mukoosha. Yesu atile: “Mulelomba, kabili bakamupeela.”—Luka 11:9.
Ifyo Lesa amona ukuti tafyacindama
Icalo mwafumako nelyo umushobo. Baibolo itila: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:34, 35.
Ifyo mufwile ukucita pa kupepa. Kuti mwapepa kuli Lesa ilyo mwikele, namukontama, namufukama, nelyo namwiminina.—1 Imilandu 17:16; Nehemia 8:6; Daniele 6:10; Marko 11:25.
Ukupepa mu kupongomoka nelyo mu mutima. Lesa alomfwa amapepo ya mu mutima ayo abantu bambi bashishiba no kwishiba ukuti namupepa.—Nehemia 2:1-6.
Ifyo mulepepelapo nampo nga fintu fyacindama sana nelyo iyo. Lesa alamukoselesha ‘ukupoosa amasakamika yenu yonse pali ena, pantu asakamana imwe.’—1 Petro 5:7.