An limpet sarong shell sa dagat na may arikurong na korteng cone. Igwa iyan nin mga ngipon na pambihira nanggad an katagasan. An mga ngipon gibo sa manipis asin dusok na mga fiber nin matagas na mineral na inaapod na goethite na nakadukot sa mas malumoy na protein base.

 Pag-isipan: An radula kan limpet garo dila. Pano iyan nin mga raya nin nakakurbang ngipon—an kada ngipon mayo pang sarong milimetro an laba—na ginagamit kan limpet na garo liha. Kaipuhan na makusugon asin matagason an kada ngipon tanganing makaros kaiyan an mga lumot sa ibabaw kan gapo para makakan kan limpet.

 Naggamit an mga parasiyasat nin atomic force microscope tanganing sukulon kun gurano kakusog na puwersa nin pagbutong an kaipuhan bago maraot an ngipon kan limpet. Nadiskubre ninda na an ngipon kan limpet iyo an pinakamakusog sa gabos na biological na materyal na siniyasat ninda—mas makusog pa ngani kisa sa sapot kan lawa. Sinabi kan nanginot sa pagsiyasat: “Dapat tang arugon an disenyo kan ngipon kan limpet sa satong mga imbensiyon.”

 Naniniwala an mga parasiyasat na an disenyo kan ngipon kan limpet magagamit sa paggibo nin awto, bangka, asin eroplano saka dawa sa paggibo nin sintetikong mga ngipon nin tawo

 Ano sa hiling mo? Resulta daw nin ebolusyon an pambihirang ngipon kan limpet? O may nagdisenyo kaiyan?