Paano Nagin ‘Pantubos Para sa Dakul’ an Atang ni Jesus?

I-PLAY

An simbag kan Bibliya

An atang ni Jesus an paagi nin Diyos tanganing iligtas an katawuhan sa kasalan asin kagadanan. Inaapod kan Bibliya an pinabulos na dugo ni Jesus bilang an halagang pantubos. (Efeso 1:7; 1 Pedro 1:18, 19) Iyan an dahilan kaya sinabi ni Jesus na nagdigdi siya para ‘itao an buhay niya [bilang] pantubos para sa dakul.’—Mateo 20:28, An Banal na Biblia.

Taano ta kaipuhan nin sarong ‘pantubos para sa dakul’?

An inot na tawong si Adan linalang na perpekto, o daing kasalan. Puwede kutana siyang mabuhay sagkod lamang pero naiwara niya iyan huling pinili niya na sumuway sa Diyos. (Genesis 3:17-19) Kan magkaaki siya, naipasa niya sa sainda an depekto nin kasalan. (Roma 5:12) Huli kaiyan, sinasabi kan Bibliya na “ipinabakal” ni Adan an sadiri niya pati an mga aki niya na magin uripon nin kasalan asin kagadanan. (Roma 7:14) Huling bakong perpekto, mayo ni saro sa sainda an kayang tumubos sa naiwara ni Adan.—Salmo 49:7, 8.

Nahirak an Diyos sa mga gikan ni Adan huling mayo nang paglaom an saindang sitwasyon. (Juan 3:16) Alagad, huli sa pamantayan nin Diyos sa hustisya, dai niya puwedeng basta baliwalaon o palampason an saindang kasalan na mayo nin balidong basehan. (Salmo 89:14; Roma 3:23-26) Namumutan nin Diyos an katawuhan, kaya itinao niya an kinakaipuhan na legal na paagi para dai lang basta mapatawad an saindang kasalan kundi mahali man iyan. (Roma 5:6-8) An pantubos iyo an legal na basehan.

Nagseserbing ano an pantubos?

Sa Bibliya, an terminong “pantubos” igwa nin tulong elemento:

Iyan sarong bayad.—Bilang 3:46, 47.
Iyan nakakapatalingkas, o nakakabalukat.—Exodo 21:30.
Iyan katumbas na halaga kan binabayadan, o pantahob na halaga kan binabayadan. a

Mangnuhon kun paanong an mga elementong ini aplikado sa atang na pantubos ni Jesu-Cristo.

Bayad. Sinasabi kan Bibliya na an mga Kristiyano “binakal . . . sa dakulang halaga.” (1 Corinto 6:20; 7:23) An halagang iyan iyo an dugo ni Jesus, na ipinambakal niya “nin mga tawo para sa Diyos hali sa gabos na tribo asin lengguwahe asin banwaan saka nasyon.”—Kapahayagan 5:8, 9.
Pagpatalingkas. An atang ni Jesus nagtao nin “katalingkasan [sa kasalan] paagi sa pantubos.”—1 Corinto 1:30; Colosas 1:14; Hebreo 9:15.
Katumbas. An atang ni Jesus iyo an eksaktong katumbas kan naiwara ni Adan—sarong perpektong buhay nin tawo. (1 Corinto 15:21, 22, 45, 46) An Bibliya nagsasabi: “Kun paanong paagi sa pagsuway kan sarong tawo [si Adan] dakul an nagin parakasala, paagi man sa pagsunod kan sarong tawo [si Jesu-Cristo] dakul an magigin matanos.” (Roma 5:19) Ipinapahiling kaini kun paano mababayadan kan kagadanan kan sarong tawo an pantubos para sa dakul na parakasala. Sa katunayan, an atang ni Jesus iyo an “katimbang na pantubos para sa gabos” na minagibo nin kinakaipuhan na lakdang para makinabang diyan.—1 Timoteo 2:5, 6.

a Sa Bibliya, an orihinal na mga tataramon na itrinadusir na “pantubos” nagpaparisa nin sarong halaga, o halaga nin sarong bagay, na ibinabayad. Halimbawa, an Hebreong pandiwa (verb) na ka·pharʹ nangangahulugan na tahuban. Sa parati, nanunungod ini sa pagtahob sa kasalan. (Salmo 65:3) Nanunungod man an pangngaran (noun) na koʹpher sa halagang ibinabayad para maisagibo an pagtahob, o pagbalukat. (Exodo 21:30) Sa kaparehong paagi, an Griegong tataramon na lyʹtron, na parating itinatradusir na “pantubos,” puwede man na itradusir na “halagang pambalukat.” (Mateo 20:28; The New Testament in Modern Speech, ni R. F. Weymouth) Ginamit kan mga parasurat na Griego an terminong iyan para ipanungod sa halaga na ibinabayad para tubuson an sarong nabihag huli sa giyera o patalingkason an sarong uripon.