Ano Daw an Itsura ni Jesus?
An simbag kan Bibliya
Mayong nakakaaram kun ano talaga an itsura ni Jesus, dahil dai man iyan ilinadawan sa Bibliya. Ipinaparisa kaiyan na bakong importante an itsura ni Jesus. Dawa arog kaiyan, nagtatao an Bibliya nin nagkapirang ideya manungod sa pangkagabsan na itsura ni Jesus.
Itsura: Si Jesus sarong Judio kaya posibleng marhay na minana niya sa saiyang ina an komun na Semitikong mga karakteristiko. (Hebreo 7:14) Posibleng marhay man na dai man gayong napapalain an itsura niya. Sa sarong pagkakataon, nakapagbiyahe siya nin patago haling Galilea pa-Jerusalem na dai nabibisto. (Juan 7:10, 11) Asin maski pag kaibanan niya an pinakadayupot niyang mga amigo, dai man lataw-lataw an itsura niya. Girumdumon na kinaipuhan pa ni Judas Iscariote na itukdo si Jesus para mabisto siya kan armadong grupo na maarestar saiya.—Mateo 26:47-49.
Laba kan buhok: Posibleng marhay na bakong halaba an buhok ni Jesus, huling sinasabi kan Bibliya na “kasusupgan sa sarong lalaki an pagkaigwa nin halabang buhok.”—1 Corinto 11:14.
Barabas: May barabas si Jesus. Nagsunod siya sa Judiong katugunan, na nagbabawal sa mga adultong lalaki na ‘rabrabon an puro kan saindang barabas.’ (Levitico 19:27; Galacia 4:4) Saka, sinambit man kan Bibliya an barabas ni Jesus sa sarong propesiya manungod sa saiyang pagsakit.—Isaias 50:6.
Hawak: Ipinaparisa kan gabos na pagkasaysay na pusog an hawak ni Jesus. Durante kan saiyang ministeryo, nagbiyahe siya nin dakul na kilometro. (Mateo 9:35) Duwang beses niyang lininig an templo kan mga Judio, na pigbaralintong ngani an mga lamesa kan mga pararibay nin kuwarta, asin sarong beses niyang pinalayas an mga ataman na hayop paagi sa latigo. (Lucas 19:45, 46; Juan 2:14, 15) Sinabi kan McClintock asin Strong’s Cyclopedia: “An bilog na pagkasaysay kan Ebanghelyo nagpaparisa [na si Jesus igwa] nin makusog na salud asin pusog na hawak.”—Volume IV, pahina 884.
Ekspresyon nin lalawgon: Mamumuton saka mapagmalasakit si Jesus, asin siguradong mahihiling iyan sa mga ekspresyon kan lalawgon niya. (Mateo 11:28, 29) An gabos na klase nin tawo gustong-gustong dumulok saiya para maranga asin matabangan. (Lucas 5:12, 13; 7:37, 38) Maski an mga aki pamugtak saiya.—Mateo 19:13-15; Marcos 9:35-37.
Mga salang ideya manungod sa itsura ni Jesus
Salang ideya: May mga nagsasabi na siguradong lahing Aprikano si Jesus dahil ikinumparar kan libro nin Kapahayagan sa barahibo nin karnero an saiyang buhok asin sa “pinakinang na bronse” an saiyang mga bitis.—Kapahayagan 1:14, 15, The New Jerusalem Bible.
An totoo: An libro nin Kapahayagan iprinesentar “paagi sa mga tanda.” (Kapahayagan 1:1) An deskripsiyon manungod sa buhok asin mga bitis ni Jesus naggagamit nin simbolikong lengguwahe para iilustrar an mga kuwalidad ni Jesus pagkatapos siyang buhayon liwat, bako para iladawan an itsura niya kan yaon siya digdi sa daga. Paagi sa pagsabing an “payo saka an [buhok ni Jesus] kasingputi nin barahibo nin karnero, na siring sa niyebe,” an ikinukumparar kan Kapahayagan 1:14 iyo an kulor, bako kun gurano kagaspang o kapino an buhok ni Jesus. Irinerepresentar kaiyan an saiyang kadunungan dahil sa edad. (Kapahayagan 3:14) Sa bersikulong iyan, dai pigkukumparar sa barahibo nin karnero o sa niyebe an pagigin magaspang man o pino kan buhok ni Jesus.
An mga bitis ni Jesus “garo purong tanso na nagliliwanag pag nagbabaga sa hurno.” (Kapahayagan 1:15) Saka, an saiyang lalawgon “siring sa aldaw sa lubos na kaliwanagan kaiyan.” (Kapahayagan 1:16) Dahil mayo nin lahi na igwa nin kulor nin kublit na arog kan nasa deskripsiyon na iyan, siguradong simboliko an bisyon na ini, na ipinapahiling na an binuhay liwat na si Jesus “nag-iirok sa liwanag na dai nanggad maranihan.”—1 Timoteo 6:16.
Salang ideya: Maluya an buot ni Jesus saka an hawak niya.
An totoo: Lalaking-lalaki si Jesus. Pusuan siyang nagpabisto sa armadong grupo na maarestar saiya. (Juan 18:4-8) Siguradong makusog an hawak ni Jesus dahil karpintero siya asin naggamit nin mano-manong mga kasangkapan.—Marcos 6:3.
Kaya, taano ta kinaipuhan niya nin tabang sa pagpasan kan saiyang hariging pasakitan? Asin taano ta nainot siyang nagadan kisa sa iba pang mga kaiba niyang gagadanon man? (Lucas 23:26; Juan 19:31-33) Bago lang kaidtong paggadan ki Jesus, maluyahon na an hawak niya. Magdamlag na siyang mata, sarong dahilan kaiyan an grabeng pagkapurisaw niya. (Lucas 22:42-44) Kaidtong banggi pigmaltrato siya kan mga Judio, asin kinaagahan pigpasakitan siya kan mga Romano. (Mateo 26:67, 68; Juan 19:1-3) Posibleng marhay na nakaparikas kan pagkagadan niya an mga bagay na iyan.
Salang ideya: Si Jesus pirming seryoso asin mamundo.
An totoo: Perpektong ipinahiling ni Jesus an mga kuwalidad kan saiyang Ama sa langit, si Jehova, na ilinaladawan kan Bibliya bilang “maugmang Diyos.” (1 Timoteo 1:11; Juan 14:9) Sa katunayan, tinukduan ni Jesus an iba kun paano magin maugma. (Mateo 5:3-9; Lucas 11:28) An mga impormasyon na ini nagpaparisa na parating nahihiling sa lalawgon niya an kaugmahan.
Puwede Mo Man Magustuhan
MAHALAGANG MGA TUKDO KAN BIBLIYA
Paano Kita Nakakasigurado na Totoo an Bibliya?
Kun an Diyos an awtor kan Bibliya, dai iyan dapat mapantayan nin ibang libro na isinurat kasuarin man.
MANUNGOD SAMO
Mag-request na May Magdalaw Saimo
Pag-ulayan an sarong hapot sa Bibliya, o aramon pa an manungod sa mga Saksi ni Jehova.