Kan Lunes na aga, Oktubre 10, 2022, pinauranan kan Russia nin mga missile an mga siyudad kan Ukraine bilang balos sa grabeng pagpasabog, duwang aldaw bago kaiyan, sa mayor na tulay na nagkokonektar sa Crimea asin Russia. Nangyari ini dai lang nahaloy pagkatapos na magpatanid an mga pulitiko na posibleng madali nang mangyari an Armagedon.

•   “Dai pa sato nangyari na magin arog kaini kaharani sa peligro nin Armagedon puon ki [Presidente John F.] Kennedy [kan Amerika] asin kan mangyari an Cuban Missile Crisis. . . . Sa hiling ko imposibleng dai sumagkod sa Armagedon pag guminamit na nin nuklear na armas.”—Presidente Joe Biden kan U.S., Oktubre 6, 2022.

•   “Iyo, madali na an Armagedon, asin isasapeligro kaiyan an bilog na planeta.”—Presidente Volodymyr Zelensky kan Ukraine, kan haputon manungod sa puwedeng magin epekto kan paggamit nin nuklear na mga armas, BBC News, Oktubre 8, 2022.

 An posibilidad daw na maggamit nin nuklear na mga armas masagkod sa Armagedon? Ano an sinasabi kan Bibliya?

 Dai. An tataramon na “Armagedon” sarong beses lang na mababasa sa Bibliya, sa Kapahayagan 16:16. Dai iyan nanunungod sa giyera sa pag-ultanan nin mga nasyon, kundi sarong giyera iyan sa pag-ultanan nin Diyos asin kan “mga hadi sa bilog na daga.” (Kapahayagan 16:14) Gagamiton nin Diyos an ralaban nin Armagedon para tapuson an pamamahala nin tawo.—Daniel 2:44.

 Tanganing mas maaraman pa kun ano an magigin epekto sa daga kan Armagedon, basahon an artikulong Ano an Ralaban nin Armagedon?

 Dai. Dawa ngani posibleng gumamit nin nuklear na mga armas an mga tawong tagapamahala pag abot nin panahon, dai itutugot nin Diyos na mapara an daga. Sinasabi kan Bibliya:

•   “An daga nagdadanay sagkod lamang.”—Eclesiastes 1:4.

•   “Magigin pagsadiri kan mga matanos an daga, asin maistar sinda diyan nin daing sagkod.”—Salmo 37:29.

 Minsan siring, ipinapahiling kan mga propesiya sa Bibliya asin kan mga nangyayari sa ngunyan na madali nang mag-abot an dakulaon na pagbabago sa kasaysayan nin tawo. (Mateo 24:3-7; 2 Timoteo 3:1-5) Aramon an sinasabi kan Bibliya manungod sa mangyayari sa maabot paagi sa samong libreng interactive na pag-adal sa Bibliya.