•   “Irineport kan China an ‘pinakamainit’ na heatwave saka an pantulo sa pinakamainit na tig-init na naeksperyensiyahan kaiyan.”—The Guardian, Setyembre 7, 2022.

•   “Tigmara sa Rehiyon na Greater Horn kan Aprika posibleng magpadagos pa sa panglimang taon kaiyan.”—UN News, Agosto 26, 2022.

•   “An 2/3 kan Europa namemeligro sa tigmara, na posibleng marhay na iyo an pinakagrabeng maeeksperyensiyahan kaiyan sa nag-aging 500 na taon.”—BBC News, Agosto 23, 2022.

 Sigun sa prediksiyon kan dakul na eksperto, magpapadagos pa asin magigin mas grabe an mga tigmarang iyan. Igwa pa daw kita nin lalauman na magayon na puturo? Ano an sinasabi kan Bibliya?

 Ihinula kan Bibliya na sa panahon ta:

•   “Magkakaigwa nin . . . sunod-sunod na kakulangan nin kakanon . . . sa manlain-lain na lugar.”—Lucas 21:11.

 Sa parati, an tigmara nagreresulta sa kakulangan nin kakanon. An siring na mga kakulangan nin kakanon, asin an pagsakit saka kagadanan na resulta kaiyan, kautuban kan propesiya sa Bibliya.—Kapahayagan 6:6, 8.

 Ihinahayag kan Bibliya an panginot na dahilan kun taano ta mas naggagrabe an mga tigmara. Sinasabi kaiyan:

•   “Bako para sa tawong naglalakaw dawa an giyahan an sadiring lakad niya.”—Jeremias 10:23.

 Nangangahulugan ini na dai talaga kaya kan mga tawo na “giyahan an sadiring lakad” ninda, o pamahalaan an sadiri ninda. Sa parati, an salang mga palakaw ninda nagreresulta sa mga tigmara asin kakulangan sa tubig.

•   An kadaklan sa mga siyentista uyon na an mga gibo kan tawo nagkawsa nin global warming, na nagresulta sa pagdakul nin mga tigmara sa bilog na kinaban.

•   An kahanaban saka an dai pinag-isipan na mga palisiya nagresulta sa deforestation, polusyon, asin pag-abuso sa natural na yaman kan daga, na nagsasapeligro na maubos an mahalagang pinagkukuanan nin tubig.

 Pero an Bibliya nagtatao nin paglaom.

 Nangangako an Bibliya na sosolusyunan nin Diyos an nangyayaring krisis sa tubig ngunyan. Paano?

1.  1. ‘Lalaglagon [nin Diyos] idtong mga nagraraot kan daga.’ (Kapahayagan 11:18) Hahalion niya an sarong dahilan kan kakulangan nin tubig—an maraot asin mahanab na mga tawo na an mga ginigibo nagraraot kan kapalibutan.—2 Timoteo 3:1, 2.

2.  2. “An dagang alang sa init magigin danaw-danaw na pano nin tambo.” (Isaias 35:1, 6, 7) Hahalion nin Diyos an danyos na resulta kan mga tigmara asin gigibuhon niya an planetang ini na sarong paraiso na abunda sa tubig.

3.  3. “Inaataman mo an daga, ginigibo mo iyan na magin abunda sa bunga asin matabang marhay.” (Salmo 65:9) Paagi sa mga bendisyon nin Diyos, an daga magigin abunda sa masisiram na kakanon asin malinig na tubig para sa gabos.