SA DUWANG paniniwalang iyan, kiisay ka uyon? Nararanga saka nagugustuhan kan dakul an sinabi ni Saulo nin Tarso, na inaapod man na apostol Pablo. (Guibo 17:26, 27) Sa Bibliya, dakul pang arog kaiyan na mga tataramon na nakakapakusog sa buot. Halimbawa, sa pamibi ni Jesus, sinabi niya na an Diyos puwede talagang mamidbid kan mga parasunod niya asin magkamit kan Saiyang bendisyon.—Juan 17:3.

Pero, iba an paniniwala kan mga pilosopo na arog ni Philo. Pinapaluwas ninda na imposibleng mamidbid an Diyos ta dai talaga maaabot kan satong isip an mga bagay dapit sa saiya. Ano talaga an totoo?

Sinasabi talaga sa Bibliya na may mga bagay dapit sa Diyos na masakit sabuton kan mga tawo. Halimbawa, dai ta mabibilang kun gurano na kahaloy na yaon an Kaglalang, maiimahinar kun gurano siya kadunong, o masusukol kun gurano kararom kan saiyang kaisipan. Talagang dai iyan kayang abuton kan isip nin tawo. Pero bakong ulang iyan para mamidbid an Diyos. Sa katunayan, kun iisip-isipon ta an mismong mga bagay na iyan, matatabangan pa kita kaiyan na ‘maparani sa Diyos.’ (Santiago 4:8) Pag-ulayan niyato an pirang halimbawa kan mga bagay na dai maaabot kan satong isip. Pagkatapos, hilingon ta an mga bagay na talagang puwede tang masabutan.

PAGIGIN DAING SAGKOD NIN DIYOS: Itinutukdo kan Bibliya na an Diyos yaon na ‘magpuon kaidtong mga panahon sagkod sa mga panahon.’ (Salmo 90:2) Sa ibang pagtaram, an Diyos mayo nin kapinunan asin mayo nin katapusan. Dai maaabot kan isip nin tawo ‘an bilang kan saiyang mga taon.’—Job 36:26.

Kun paano ka makikinabang: Nanunuga an Diyos nin buhay na daing katapusan kun hihinguwahon mong mamidbid talaga siya. (Juan 17:3) Masasarigan daw an panugang iyan kun an Diyos mismo mayo nin buhay na daing katapusan? Solamenteng an ‘Hadi na dai nin katapusan’ an makakautob kan arog kaiyan na panuga.—1 Timoteo 1:17.

KAISIPAN NIN DIYOS: Itinutukdo kan Bibliya na ‘mayo nin makakarurop kan kaisipan nin Diyos’ huli ta an saiyang kaisipan nakakalabing marhay sa kaisipan ta. (Isaias 40:28; 55:9) Tama sanang ihapot kan Bibliya: “Siisay an nakakaaram kan kaisipan nin Kagurangnan? Siisay an makakatukdo saiya?”—1 Corinto 2:16, An Marahay na Bareta Biblia.

Kun paano ka makikinabang: Kaya nin Diyos na dangugon nin sabay-sabay an mga pamibi kan minilyon na tawo. (Salmo 65:2) Naririparo niya dawa an dignos na nahuhulog sa daga. Maabot daw sa punto na mapapano an isip nin Diyos kaya dai ka na niya mariparo o madangog an pamibi mo? Dai nuarin man mangyayari iyan huling daing limitasyon an isip niya. Saka para sa Diyos, ‘mahalaga kang marhay kisa sa dakul na dignos.’—Mateo 10:29, 31.

MGA GIBO NIN DIYOS: Itinutukdo kan Bibliya na ‘dai marururop kan tawo an gibo nin Diyos magpuon sa kapinunan sagkod sa katapusan.’ (Parahulit 3:11) Kaya, dai ta talaga maaaraman an gabos na bagay dapit sa Diyos. ‘Dai nanggad masususog’ an kadunungan sa mga ginigibo niya. (Roma 11:33) Pero, handang ihayag iyan nin Diyos sa mga tawong gusto siyang mapaugma.—Amos 3:7.

Kun paano ka makikinabang: Kun babasahon mo asin pag-aadalan an Bibliya, dai ka mauubusan nin manunudan dapit sa Diyos asin sa saiyang mga gibo. Buot sabihon, padagos kitang mapaparani sa satong langitnon na Ama sagkod sa panahon na daing katapusan.

Totoo, may mga bagay dapit sa Diyos na dai ta lubos na masasabutan, pero dai buot sabihon kaiyan na dai ta na talaga siya mamimidbid. Kadakul nin impormasyon sa Bibliya na makakatabang sa sato na mas mamidbid na marhay an Diyos. Uni an pirang halimbawa:

PANGARAN NIN DIYOS: Itinutukdo kan Bibliya na may pangaran an Diyos. Sinabi niya: ‘Ako si Jehova. Iyo ini an sakuyang ngaran.’ Mga 7,000 na beses na nasambit sa Bibliya an pangaran nin Diyos, mas dakul kisa sa ibang pangaran.—Isaias 42:8.

Kun paano ka makikinabang: Sinabi ni Jesus sa modelong pamibi: ‘Ama niyamo na yaon ka sa langit. Sambahon an ngaran mo.’ (Mateo 6:9) Kaya pag namimibi ka, puwede mo man daw sambiton an pangaran nin Diyos? Andam si Jehova na iligtas an gabos na nagtataong galang sa saiyang pangaran.—Roma 10:13.

KUN HAIN AN DIYOS: Itinutukdo kan Bibliya na igwa nin espirituwal na lugar kun sain yaon an espiritung mga linalang. Igwa man nin pisikal na lugar, an daga asin an uniberso. (Juan 8:23; 1 Corinto 15:44) Sa Bibliya, an ‘kalangitan’ sa parati nanunungod sa espirituwal na lugar. An lugar na ‘irukan’ kan Kaglalang yaon sa ‘kalangitan.’—1 Hade 8:43.

Kun paano ka makikinabang: Mas nagigin totoo sa saimo an Diyos. An Kaglalang bakong misteryosong puwersa na yaon maski sain na lugar o bagay. Si Jehova sarong tunay na Persona na yaon sa sarong tunay na lugar, pero ‘dai nin linalang na dai hayag sa saiyang paghiling.’—Hebreo 4:13.

PERSONALIDAD NIN DIYOS: Itinutukdo kan Bibliya na may magagayon na karakteristiko an Diyos. ‘An Diyos pagkamuot.’ (1 Juan 4:8) Dai siya nagpuputik. (Tito 1:2) Mayo siyang ipinapaurog, mahihirakon siya, mapagmalasakit, asin bakong madaling maanggot. (Exodo 34:6; Guibo 10:34) Tibaad magngalas an dakul pag naaraman ninda na gusto kan Kaglalang na magin amigo an mga tawong may paggalang sa saiya.—Salmo 25:14.

Kun paano ka makikinabang: Puwede kang ibilang na amigo ni Jehova. (Santiago 2:23) Asin mantang mas namimidbid mo siya, mas masasabutan mo man an mga istorya sa Bibliya.

Malinaw an sinasabi kan Bibliya dapit sa Diyos na Jehova. Bako siyang Diyos na dai maaabot kan isip nin tawo. An totoo, gusto pa ngani niya na mamidbid mo siya. Nanunuga an saiyang Tataramon, an Bibliya: ‘Kun hahanapon mo siya, makukua mo siya.’ (1 Cronica 28:9) Taano ta dai midbidon an Diyos paagi sa pagbasa asin pag-isip-isip kan mga istorya sa Bibliya? Kun gigibuhon mo iyan, nanunuga an Bibliya na an Diyos ‘marani sa saimo.’—Santiago 4:8.

Pero tibaad ihapot mo, ‘Kun dai ko lubos na masasabutan an gabos na bagay dapit sa Diyos, paano ako magigin harani saiya?’ Pag-isipan ini: Kaipuhan daw na tapos man nin medisina an amigo nin sarong doktor? Dai man. Puwedeng magkaiba sinda nin propesyon. Pero posible pa man giraray na magin mag-amigo sinda. An mahalaga, aram niya an ugali, mga gusto, saka dai gusto kan amigo niyang doktor. Sa kaparehong paagi, maaaraman mo paagi sa Bibliya kun ano an personalidad ni Jehova—an kaipuhan mong maaraman tanganing magin harani saiya.

Malinaw an impormasyon na itinatao kan Bibliya dapit sa Kaglalang, asin igo na iyan tanganing mamidbid an Diyos. Gusto mong mas mamidbid pa an Diyos na Jehova? Nag-aalok an Mga Saksi ni Jehova nin libreng pag-adal sa Bibliya. Makipag-ulay tabi sa mga Saksi sa saindong lugar o buksan an samong website na www.isa4310.com/bcl.