An inot na 60 minutos sa buhay kan bagong mundag na umboy kritikal na panahon nin pag-adaptar. Taano? Huling an pagkarga o pagkugos kan mga ina sa saindang bagong mundag na umboy durante kan kritikal na peryodong iyan dakulaon an maitatabang sa pisikal asin emosyonal na pag-uswag kan saindang mga aki. *

Ano an nagpapahiro sa sarong ina na mapagpadangat na asikasuhon an saiyang bagong mundag na umboy? Ipinaliwanag ni Professor Jeannette Crenshaw sa The Journal of Perinatal Education na an halangkaw na lebel nin hormone na oxytocin “nagpapahiro sa sarong ina na makamati nin kapadangatan sa bagong mundag niyang umboy mantang kinakaputan niya ini, minamasdan, saka pinapasuso.” Pakapangaki, may saro pang hormone na “nakakatabang sa sarong ina na magkaigwa nin interaksiyon sa saiyang umboy” asin napapakusog kaini an relasyon nindang duwa. Taano ta mahalaga iyan?

An dayupot na relasyon nin sarong ina saka umboy dinisenyo kan satong mamumuton na Kaglalang, an Diyos na Jehova. * Aram na marhay ni Hading David na an Diyos an dahilan kaya siya namundag asin namatian niya an katiwasayan sa kugos kan saiyang ina. Namibi siya: “Ipinagkatiwala na ako sa pangangataman mo puon pa kan ako mamundag; puon pa kan ako nasa tulak kan sakong ina, ika na an sakuyang Diyos.”—Salmo 22:9, 10.

PAG-ISIPAN: Kun sa arog kaiyan kakomplikadong paagi linalang nin Diyos an mga tawo tanganing masigurado na mapagpadangat na aasikasuhon kan sarong ina an saiyang umboy, bako daw na tama sanang isipon na an Diyos interesado man sa lambang saro sa sato, na “mga aki nin Diyos”?—Gibo 17:29.

Si Jesu-Cristo, na urog na nakakamidbid sa Kaglalang kisa kiisay pa man, nagsabi: “Bakong an duwang dignos nababakal nin sarong sinsilyo na sadit an kantidad? Pero mayo ni saro sa sainda an nahuhulog sa daga na dai naaaraman kan saindong Ama. Alagad kamo, maski an mga buhok sa saindong payo bilang gabos. Kaya dai kamo matakot; mas mahalaga kamo kisa sa dakul na dignos.”—Mateo 10:29-31.

Pipira sana sa sato an nagtatao nin atensiyon sa kada sadit na gamgam na nahihiling ta. Dai ta ngani garo naririsa kun may saro sa sainda na mahulog sa daga. Pero an satong Ama sa langit nahihiling an lambang saro sa sainda! Alagad mas mahalaga pa man giraray sa saiya an mga tawo kisa sa mga gamgam—dawa dakul na gamgam pa iyan. Kaya malinaw an leksiyon: ‘Dai ka dapat matakot’ o mag-isip na dai ka nahihiling nin Diyos. An totoo, interesado siyang marhay sa saimo!

 Sinisigurado sa sato kan Kasuratan

• “An mga mata ni Jehova yaon sa gabos na lugar, nagmamasid sa mga maraot asin sa mga marahay.”—TALINHAGA 15:3.

• “Nakahiling sa mga matanos an mga mata ni Jehova, asin nagdadangog sa paghagad ninda nin tabang an saiyang mga talinga.”—SALMO 34:15.

• “Mag-uugma akong marhay huli sa saimong maimbod na pagkamuot, huling nahiling mo an sakong kasakitan; aram mo an sakong grabeng kapurisawan.”—SALMO 31:7.

May epekto daw sa buhay ta kun aram niyato na an Diyos interesadong marhay sa satong kapakanan asin mamumuton kitang binabantayan? Igwa nanggad, arog kaini an paliwanag ni Hannah * na taga England:

“Kadakul na beses kong namati na dai ako namumutan ni Jehova saka dai niya sinisimbag an mga pamibi ko. Inisip ko na dahil iyan sa maluya an pagtubod ko. Pagmati ko pinapadusahan ako o binabaliwala ta bako akong mahalaga. Naisip ko na dai man nagmamakulog an Diyos.”

Pero, aram na ngunyan ni Hannah na talagang nagmamalasakit asin namumutan siya ni Jehova. Ano an nakapabago sa sabuot niya? “Luway-luway ko iyan na narealisar,” an paliwanag niya. “Nagirumduman ko an sarong pahayag kaidto manungod sa atang na pantubos ni Jesus, asin nataros kaiyan an puso ko, saka natabangan ako kaiyan na mamatian an pagkamuot ni Jehova. Asin pag nasisimbag an mga pamibi ko, napapahibi ako ta namamati ko na talagang namumutan ako ni Jehova. Natabangan man ako kan pag-adal sa Bibliya asin pag-atender sa Kristiyanong mga pagtiripon na mas mamidbid si Jehova, an saiyang personalidad, asin maaraman kun ano an namamati niya sa sato. Mating-mati ko ngunyan an pagtabang ni Jehova saka an pagkamuot niya sa sato asin na talagang interesado siya sa lambang saro sa sato.”

Nakakapakusog talaga an sinabi ni Hannah. Pero paano ka makakasigurado na nasasabutan nin Diyos asin aram niya an mga namamatian mo? Ipapaliwanag iyan sa masunod na artikulo.