SA Katugunan, parehong inaako an agbaan saka salampati bilang dulot ki Jehova. An duwang gamgam na ini parating sinasambit na magkaibanan sa katugunan mapadapit sa mga atang, asin arin man sa duwa puwedeng idulot karibay kan saro. (Lev. 1:14; 12:8; 14:30) Taano ta marahayon na probisyon ini? An sarong rason iyo na dai pirming makakakua nin agbaan. Taano?

An agbaan nagbabalyo sa ibang lugar asin nagkakaigwa kaiyan sa bilog na Israel sa mga bulan nin tig-init. Kada Oktubre, nagbabalyo sinda sa parteng timog sa mas mainit na mga nasyon, asin minabalik sa Israel sa panahon nin tigsuli. (Awit ni Sol. 2:11, 12; Jer. 8:7) Kaya sa suanoy na Israel, dipisil para sa mga Israelita na magdulot nin agbaan bilang atang sa panahon nin tiglipot.

Sa parati, an mga salampati man dai nagbabalyo sa ibang lugar kaya igwa kaiyan sa bilog na Israel sa enterong taon. Saka puwede pating atamanon sa harong an mga salampati. (Ikumparar an Juan 2:14, 16.) Sigun sa librong Bible Plants and Animals, “an gabos na baryo saka banwa sa Palestina may mga ataman na salampati. An kada harong may mga harong-harong nin salampati, o labot sa lanob, na istaran kan mga gamgam na iyan.”—Ikumparar an Isaias 60:8.

Ipinahiling ni Jehova na siya mamumuton saka rasonable paagi sa pag-ako nin dulot na mga gamgam na madali sanang makua kan mga Israelita sa bilog na taon.