Sran wie’m be waan nnɛn dilɛ’n timan kpa mlɔnmlɔn. Yɛ asiɛ wunmuan’n su’n, be nga be bu akunndan kunngba sɔ’n, be su sɔn kpa.

•   Fluwa kun se kɛ: “Be nga be waan nnɛn dilɛ timan kpa mlɔnmlɔn’n, be buman nnɛn mun kɛ nga sran onga’m be fa bu be’n sa. Yɛ i sɔ’n i ɲin fite ninnge nga be yo be’n be nun. I wie yɛle kɛ be kloman kɛ sran’m be fa nnɛn mun yo like annzɛ be yo be tɛtɛ kaan sa. Asa’n, be diman nnɛn, be wlaman tralɛ annzɛ like uflɛ nga be fali nnɛn kplo annzɛ i wunsu like be yoli’n. Ninnge kwlaa nga sran’m be kwla fa nnɛn mun be yo’n, ɔ timan be liɛ’n su kaan sa.”—The Vegan Society.

 Sran wie’m be liɛ’n, nán kɛ be kunndɛman kɛ bé yó nnɛn’m be tɛtɛ’n, i ngunmin ti yɛ be waan be diman nnɛn-ɔn. Be waan bé yó naan b’a tɔman tukpacɛ tikatika. Wie’m be kusu Ɲanmiɛn sulɛ wafa nga be o nun’n ti yɛ be yo sɔ-ɔ. Wie mun ekun be liɛ’n, asiɛ’n i lika nianlɛ’n m’ɔ ti cinnjin man be’n, i ti yɛ be yo sɔ-ɔ.

•   Sanngɛ ɔ ti kɛ Ɲanmiɛn sulɛ wafa wie yɛ b’a fa be wun b’a wla nun sa. Yɛ i sɔ yolɛ’n ti be cinnjin kpa liɛ su. Asa ekun’n, wafa nga be yo be ninnge mun’n, ɔ kaci mlɔnmlɔn. Yɛ be bu i kɛ i sɔ yɛ ɔ fata kɛ sran’m be tinuntinun be yo naan mɛn’n w’a kaci w’a yo kpa-ɔ.”—Britannica Academic.

 ?Ninnge nga be nga be waan nnɛn dilɛ’n timan kpa mlɔnmlɔn’n be yo’n, be yɛ maan mɛn nun sa’m be kwlaa bé wíe-ɔ? ?I su ndɛ benin yɛ Biblu’n kan-ɔn?

 Biblu’n kle kɛ Ɲanmiɛn Zoova a m’ɔ ti e Yifuɛ’n i ɲrun’n, klɔ sran’m be ti kpa tra nnɛn mun. Asa ekun’n, ɔ mannin klɔ sran’m be atin kɛ be sie nnɛn mun. (Bo Bolɛ 1:27, 28) Kɛ blɛ wie juli’n, ɔ mannin klɔ sran’m be atin kɛ be di nnɛn mun. (Bo Bolɛ 9:3) Sanngɛ ɔ kloman kɛ be yo be tɛtɛ.—Ɲanndra Mun 12:10.

 Biblu’n kle kɛ sɛ sran kun dí nnɛn annzɛ ɔ su diman’n, ɔ ti kɛ i bɔbɔ sa. b Ɲanmiɛn ɲrun’n, be nga be di nnɛn’n, be kpa traman be nga be diman’n. Yɛ be nga be diman’n kusu be kpa traman be nga be di’n. (1 Korɛntifuɛ Mun 8:8) I sɔ’n ti’n, ɔ fataman kɛ sran fi bu i wiengu fɔ like ng’ɔ di’n ti.—Rɔmunfuɛ Mun 14:3.

 Biblu’n kle kɛ nán ninnge nga e yo be annzɛ e yoman be’n, be ti yɛ mɛn nun sa’m bé wíe-ɔ. Afin sa nga be o klɔ sran’m be su’n, i dan lika fin ajalɛ nga politikifuɛ’m be fa’n, nin wafa nga mɛn’n nunfuɛ’m be siesieli mɛn’n nun ninnge mun’n, ɔ nin sika ndɛ m’ɔ ti sran’m be cinnjin’n. Yɛ sran fi kwlá siesieman i sɔ sa liɛ mun. Afin Biblu’n waan:

•   “Like ng’ɔ ti bliwa’n, be kwlá tinngɛmɛn i.”—Akunndanfuɛ’n 1:15.

 E Yifuɛ’n yɛ ɔ́ wá yó maan e su sa’m be kwlaa bé wíe-ɔ. Biblu’n kannin like ng’ɔ́ wá yó’n i ndɛ. Ɔ kɛnnin i akunndan nun.

•   “I sin’n, n wunnin ɲanmiɛn su uflɛuflɛ kun, ɔ nin asiɛ uflɛuflɛ kun. Ɲanmiɛn su laa liɛ’n nin asiɛ laa liɛ’n, ɔ nin jenvie’n be nunman lɛ kun.”—Sa Nglo Yilɛ 21:1.

 Ɲanmiɛn wá yó maan “ɲanmiɛn su uflɛuflɛ kun” mɔ yɛle i awa m’ɔ o ɲanmiɛn su lɔ’n, ɔ́ wá sín ‘ɲanmiɛn su laa’ mɔ yɛle klɔ sran’m be awa mun’n i osu. Ɲanmiɛn i awa’n mɔ yɛle i Sielɛ’n, ɔ́ wá núnnún “asiɛ laa liɛ’n,” mɔ yɛle klunwifuɛ mun’n. Kpɛkun ɔ́ wá síe “asiɛ uflɛuflɛ kun.” Asiɛ sɔ’n ti be nga be klunklo su be lo be wun mɛn i kɛ ɔ sie be’n, be nzɔliɛ.

 Kɛ Ɲanmiɛn i Sielɛ’n wá síe asiɛ’n, yɛ bé klé klɔ sran mun wafa nga be nin nnɛn’m be kwla tran klanman’n ɔ nin wafa nga be kwla nian asiɛ’n i lika-ɔ.—Ezai 11:6-9.