Zoova seli kɛ: ‘Sran mun be su sunman kun, be su wunman ɲrɛnnɛn kun, be su tɔman tukpacɛ kun, be su wuman kun. Ń núnnún be ɲinmuɛn’n kwlaa. Be wla su kpɛnman laa ninnge tɛtɛ mun be su kun.’

Zoova fali Adan nin Ɛvu sieli i Edɛnin fie’n nun naan be tran klanman, yɛ be di aklunjuɛ. Ɔ fata kɛ be su be Si m’ɔ o ɲanmiɛn su lɔ’n, yɛ ɔ fata kɛ be wu ba naan be trɛ asiɛ’n su. Adan nin Ɛvu be ɲin w’a yiman Zoova. Sanngɛ Zoova w’a kaciman like ng’ɔ seli kɛ ɔ́ yó’n. Kɛ nga ɔ kan kleli Abraamun’n sa’n, i Famiɛn diwlɛ’n wá yó maan asiɛ’n su wafuɛ mun bé wá ɲán suyralɛ kpanngban.

Ɔ cɛ kan’n, Satan nin i mmusu mun, ɔ nin klunwifuɛ mun be su tranman lɛ kun. Be kwlaa nga bé ká nguan nun’n bé sú Zoova. E su tɔman tukpacɛ, yɛ e su wuman. Cɛn kwlaa kɛ é jáso’n, e ti juejue,  yɛ e di aklunjuɛ. Asiɛ’n káci lika klanman. Sran mun be kwlaa bé ɲán aliɛ kpa bé dí, yɛ bé trán sua kpa nun. Sran mun bé yó be wiengu ye, be su kleman be wiengu ɲrɛnnɛn, yɛ be su yoman be wiengu like yaya. Blo nnɛn mun be su sroman e, yɛ e kusu e su sroman be.

Kɛ Zoova wá cɛ́n sran mun’n, é wá dí aklunjuɛ dan kpa. É wá sɔ́ laa sran nga bé cɛ́n be’n be nun. Be nun wie yɛle Abɛli, Nowe, Abraamun, Sara, Moizi, Riti, Ɛstɛli, yɛ Davidi. E nin sran sɔ mun e bo yó kun, é yó maan asiɛ’n káci lika klanman. Blɛ kwlaa nun’n, é ɲán junman kpa é dí.

Zoova kunndɛ kɛ a tran mɛn sɔ’n nun wie. Nanwlɛ, blɛ sɔ’n nun’n á wá sí Zoova kpa liɛ su. Ɔ maan mian ɔ ɲin cɛn kwlakwla naan a nin Zoova amun afiɛn mantan kpa titi.