Mananda Sitoppa Hita sian Akka Nabi
Molo najolo, akka nabi do dipakke Sitoppa hita pasahatton Hatana tu jolma. Sian Hatana i do boi taboto boha carana mandapot pahala manang pasu-pasu. Taida ma aha na boi taparsiajari sian tolu nabi.
NABI IBRAHIM (ABRAHAM)
Adil do Panoppatta, dilean do pahala tu sude halak.
Marjanji do Panoppatta tu nabi Ibrahim, “dapotan pasupasu marhitehite ho saluhut angka bangso ni tano on”.—1 Musa 12:3.
Aha parsiajaranna? Holong hian do roha ni Panoppatta tu sude halak jala dilean do pahala tu akka halak na unduk tu Ibana.
NABI MUSA
Parasiroha do Sitoppa hita jala dilean do pahala tu na olo mananda Ibana.
Dilean Sitoppa hita gogo tu si Musa asa boi mambahen mukjizat. Nang pe songon i martangiang do si Musa didok ibana, “Pabotohon ma tu ahu dalanmu, asa tung tangkas Ho hutanda, paboa naung jumpangan asi ni roha ahu maradophon Ho.” (2 Musa 33:13) Dialusi do tangiangna, jala dilean do pahala tu ibana i ma parbinotoan. Gabe lam ditanda jala diattusi si Musa ma aha na dihalomohon roha ni Sitoppa hita. Contohna diboto si Musa ma molo Panoppa i, “Debata na talup jala na asi roha”.—2 Musa 34:6, 7.
Aha parsiajaranna? Dilean Sitoppa hita do pahala tu sude halak, tu bawa, boru-boru, nang dakdanak na olo mananda Ibana. Di Kitab Suci dipaboa do carana lao manomba Debata jala dipaboa do na lomo rohana mangurupi dohot mangalean pahala tu hita.
NABI ISA (JESUS)
Ala asi roha ni nabi Isa dipamalum ibana na marsahit
Boi do tadapot pahala na salelengna sian Sitoppa hita, molo tatanda Nabi Isa.
Dicaritahon do di Kitab Suci taringot nabi Isa dohot na diajarhonna. Dilean do huaso tu nabi Isa laho mambahen mukjizat. Dipamalum ma na mapitung, na bisu, dohot na cacat. Hea do dipangolu ibana na mate. Songon i ma bahenonna tu sude jolma haduan. Alana lao salpuhonon ni Debata ma sude sahit dohot hamatean. Dipaboa nabi Isa ma carana lao mandapot pahala i. Didok, “On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum.”—Johannes 17:3.
Parasiroha, lambok, jala burju do nabi Isa. Akka bawa, boru-boru, na poso dohot na matua rap marpungu lao mambege ibana. Alana didok nabi Isa, “Marsiajar ma hamu sian ahu. Ai na lambok jala na serep roha do ahu, asa dapotmuna hasonangan.” (Mateus 11:29) Nang pe dipaimbar-imbar halak di tikki i akka boru-boru, alai dang songon i nabi Isa. Lambok, burju jala diargai nabi Isa do boru-boru.
Aha parsiajaranna? Dihaholongi nabi Isa do sude halak, jala boi do tatiru cara ni ibana.
DANG DEBATA NABI ISA MANANG JESUS
Didok Kitab Suci, “holan sada do Debata”. Jala na diutus Debata do nabi Isa. (1 Korint 8:6) Didok nabi Isa umbalga do Debata sian ibana jala na disuru Debata do ibana ro tu portibi on.—Johannes 11:41, 42; 14:28. *
^ par. 17 Lao mamboto hatorangan tambahan taringot nabi Isa, ida parsiajaran 4 sian brosur Barita na Uli sian Debata! di www.isa4310.com/bbc.
