Dang adong jolma na hea mangida Debata. (2 Musa 33:20; Johannes 1:​18; 1 Johannes 4:​12) Alana didok di Bibel dang boi taida Debata jala di surgo do Ibana.​—Johannes 4:​24; 1 Timoteus 1:​17.

 Alai molo suru-suruan boi do mangida Debata. (Mateus 18:10) Asing ni i, adong do piga-piga jolma na mate na dipahehe lao mangolu di surgo, dung i boi ma nasida mangida Debata.​—Pilippi 3:​20, 21; 1 Johannes 3:2.

 Di Bibel jotjot do dipakke hata mangida lao mandok sasahalak na mangattusi aha na diida dohot na dibege ibana. (Jesaya 6:​10; Jeremia 5:​21; Johannes 9:​39-​41) Jadi molo nungnga marhaporseaon sasahalak tu Debata jala diboto akka sifatna, boi do didok nungnga diida ibana Debata. (Epesus 1:​18) Dipaboa do di Bibel songon dia carana patoguhon haporseaotta tu Debata.

•   Marhite akka toppaan boi do taboto akka sifat ni Debata, songon holongna, burju ni rohana, bisukna, dohot huasona. (Rom 1:​20) Songon i do na dihilala si Job. Dung diparrohahon ibana akka toppaan hira naung diida ma Debata.​—Job 42:5.

•   Molo taparsiajari Bibel, boi ma gabe tatanda Debata. Alana didok do di Bibel, “Molo dilului ho [Debata], juppangmu ma Ibana.”​—1 Kronika 28:9; Psalmen 119:2; Johannes 17:3.

•   Molo taparsiajari taringot parngoluan ni Jesus, gabe lam tatanda ma Debata. Alana benar-benar do ditiru Jesus parange ni Bapakna Jahowa. Alani i do didok Jesus, “Manang ise na mangida au, nungnga diida ibana Damang i.”​—Johannes 14:9.

•   Asing ni i, molo taulahon akka patik ni Debata, gabe boi ma takkas taida songon dia Ibana mamasu-masu ulaonta. Jesus mandok, “Marlas ni roha ma na ias roha, ai idaon ni nasida do Debata.” Songon naung tabahas nakkin, adong do piga-piga halak na mangulahon lomo ni roha ni Debata na dipahehe lao mangolu tu surgo jala boi ma benar-benar diida nasida Debata.​—Mateus 5:8; Psalmen 11:7.

 Songon na disurat di Bibel, adong do jolma na hea mangida Debata. Alai molo taida latar belakang ni ceritana, sasittongna dang langsung nasida makkatai tu Debata. Alai marhite suru-suruan manang marhite parnidaan do Debata makkatai tu nasida.

 Suru-suruan.

Najolo, jotjot do disuru Debata suru-suruan mewakili Ibana lao paboahon hatana tu jolma. (Psalmen 103:20) Contohna, hea do makkatai Debata tu si Musa sian ramba na marsuga. Jala didok do di Bibel “ditutup si Musa ma bohina. Ai mabiar do ibana mangida Debata na sittong i”. (2 Musa 3:​4, 6) Sebenarna, dang langsung diida si Musa Debata. Alana molo taida akka ayat sebelumna, “suru-suruan ni Jahowa” do na ro manjuppangi si Musa.​—2 Musa 3:2.

 Jadi tikki didok di Bibel “makkatai ma Jahowa langsung” tu si Musa, i patuduhon makkatai Jahowa tu si Musa songon sasahalak na makkatai tu donganna. (2 Musa 4:​10, 11; 33:11) Sebenarna dang na tutu diida si Musa Debata. Alana Jahowa pasahatton hatana tu si Musa, “marhite suru-suruan” do. (Galatia 3:​19; Ulaon ni Apostel 7:​53) Nang pe songon i ala togu haporseaon ni si Musa, gabe didok Bibel ma “hira naung diida ibana do Debata na so boi idaon i”.​—Heber 11:27.

 Songon i do tong na diulahon Jahowa tikki makkata-hatai tu si Abraham. Marhite suru-suruan do Debata makkatai tu ibana. Memang molo holan sekedar tajaha akka ayatna, boi do gabe tarippu na benar-benar diida si Abraham Debata. (1 Musa 18:​1, 33) Alai molo taida keseluruhan kisahna, gabe taboto ma molo “tolu bawa” na ro mandapotton si Abraham, i ma suru-suruan na disuru Debata. Didok si Abraham do nasida wakil ni Debata, jala tikki makkatai si Abraham tu nasida hira na langsung makkatai tu Debata do si Abraham.​—1 Musa 18:​2, 3, 22, 32; 19:1.

 Parnidaan.

Olo do muse Debata patuduhon dirina tu jolma marhite parnidaan manang gambar na ro tu pikkiran ni sasahalak. Contohna, hea do didok di Bibel diida si Musa dohot halak Israel Debata. Alai maksudna, nasida mangida “Debata na sittong di bagasan parnidaan”. (2 Musa 24:​9-​11) Jala jotjot do muse didok di Bibel, akka panurirang mangida Jahowa. (Jesaya 6:1; Daniel 7:9; Amos 9:1) Alai molo taida keseluruhan ayatna, marhite parnidaan do diida nasida Debata.​—Jesaya 1:1; Daniel 7:2; Amos 1:1.