Me bi nañ i base i Lôk Pada, lihaa jem li bé yééne i Rochester, tison mu nkoñ u New York. I ngéda me bééna nwii juem, bagwal bem ba bi bagla. I ñem sonde, me bé yén ni mama yem nu a bé yén i man ndap. I mamélél ma sonde, me bé me ke yak papa yem nu a bééne i kartier mingwañ mi bôt. I ngéda me bé tehe mama yem a nok ndutu inyu néñés bon bé bo basamal, ha nyen me bi kit le m’a ba ndik ngwañ inyu nit lihaa jem.

Kiki papa yem a bééna ngôñ le me pamba i niñ, a bi kena me i yuuga suklu ikeñi inyu basal i hôtel. I mayuuga ma, ma bi lémél me ngandak, jon me bi tilba nyoo i suklu i, me bak nkwoog nkaa le Djob nyen a ntimbhe masoohe mem, le me ba ngwañ ni maséé. I nwii mintan me bi sal i kasinô yada i Las Vegas, tison Nevada, me bi nigil lelaa ba ñéga hôtel, me nigil mbén i mam ma nyuñga, me nigil yak lelaa ba ntjek moni.

I ngéda me bééna 22 nwii, me bé nwet bôlô i yônôs iba i kasinô yada. Ba bé yoñok me kiki ngwañ mut, mut nu a mpamba i niñ. Me bé jek bijek bilam, me nyok maok malam, ni ma ma nhee diye. I homa bôlô, ngandak bôt i bé kalak me le : “U hôiga bañ le moni nwon mi ñane nkoñ ’isi.” Inyu yap, moni nwon mi yé hiliba hi bañga maséé.

Bôlô yem i bé le me yônôs ngôñ yosôna i mingwañ mi bôt mi mi bé lo i tuk hibiya i Las Vegas. I bôt ba, ba bééna moni ngandak ndi ba bé bé maséé. Yak me, me bi bôdôl nimis maséé mem ndék ni ndék. I yé maliga le, kiki me bé kôhna moni ngandak, hala nyen nduña yem i bé bet, bet ni bet. Me bé ke ha bé to ki ’ilo, me bé badba too i yé ki nseñ le me kônde niñ. Niñ yem i bé lémél bé me, jon me bi bat Nyambe le, “hee me nla léba bañga maséé?”

Mu ngéda i, lôk kéé yem i bôda iba, i i bi yila Mbôgi Yéhôva, i bi lo i yén i Las Vegas. Me bé neebe bé bikaat gwap ndi me bé maséé i añ Bibel yem ni bo. Mu Bibel yem, bibañga bi Yésu bi bé ntilga ni tinti kôyôp. Kii me bé neebe i mam momasôna Yésu a bi kal, lôk kéé yem i bôda i bé lôôha gwélél bibañga bi Yésu inyu niiga me. Me bé añ yak Bibel metama.

Ngandak mam me bé añ i bé hélés me. Kiki hihéga, Yésu a nkal le: “I ngéda u nsoohe, u podok bañ bipopoda kikii bihaiden bi mboñ inyule ba nhoñol le b’a nôga inyu ngandak yap lipodok.” (Matéô 6:7, Ngobol i The New American Bible) Ndi pada yada i bi ti me titii Yésu, a kal ki me le me nlama soohe i bisu bi titii i, me tiimbaga jôm li ngélé mana masoohe le “A Tata wés nu a yé i ngii,” me tiimbaga “Mayéga Maria” jôm li ngélé, ha nyen Nyambe a ga ti me moni nwominsôna me gwé ngôñ. Jon me bi badba le, ‘ibale me ntiimba i bibuk bi, baa me ta bé i popoda?’ Me bi añ ki bibañga bi Yésu bi bi nkal le: “Ni sébél bañ to mut nye ki nye hana ’isi le tata nan, ni gwé ndik Tata wada nu a yé i ngii.” (Matéô 23:9, NAB) Jon me bi badba le, inyuki bés ba di yé i base i Lôk Pada, di nsébél pada le “mon Père”?’

I ngéda me bi añ kaat i Yakôbô, ha nyen me bi wan niñ yem. I pes yé 4, Yakôbô a nkal le: “Baa ni nyi bé le liwanda ni nkoñ ’isi li yé ôa ni Nyambe? Jon tonjee a nsômbôl ba liwanda ni nkoñ ’isi a nyila ñoo Nyambe.” (Yakôbô 4:4, NAB) Nlôñ 17 u nlôôha tihba me, u nkal le: “Jon i mut a nyi boñ loñge, ndi a boñ bé, wee a mboñ béba.” Jon me bi sébél lôk kéé yem i bôda inyu kal bo le me nsal ha bé mu kasinô i, inyule i ntinde me i boñ mam ma ta bé loñge kiki bo mintuk mi moni ni hép i nkus.

Me bééna ngôñ i bana maada malam ni Nyambe, yak ni bagwal bem, ni lôk kéé yem i bôlôm ni i bôda. Jon me bi kit le me nsuhus ngéda me ntégbaha i nyiña moni inyu tégbaha ngandak ngéda ni bo. Ndi i mahéñha ma, ma bé bé jam li ntomb. Kiki hihéga, ba bi bôn le ba nti me tel ipe mu kasinô, me bé le me kôhna moni mi mi nloo nsaa wem ngélé iba tole aa. Ndi i mbus me bi soohe inyu jam li, me kit le me nwaa i niñ i. Me tjôô bôlô yem, me kahal yééne i ndap mama yem a bé téédana bikei, me bôdôl man nyuñga dikai i het ba bé téédana bijek.

To hala kiki Bibel i bi hôla me i yi mam ma nlôôha nseñ i niñ, me bé ngi bôdôl ke i makoda ma Mbôgi Yéhôva. Lôk kéé yem i bôda i bi bat me le inyuki me bé gwés bé Mbôgi Yéhôva? Me timbhe bo le: “Inyule Nyambe nan Yéhôva a mbagal mahaa. I mangéda me nla ndik tégbaha ni lihaa jem ma yé Nôel ni mangand ma ligwéé. Ndi bé ni tégbaha bé i mangand ma.” Mankéé nu muda wada a kohol maéya, a bat me le: “Ndi dini dilo dipe di nwii, u yé ni hee? Moo més ma yé ma ba nsamblak, di bemek le di sambla we ndi we, we u ngwés ndik ba mu mangand ma inyule u yé nyégsaga i ba ha.” Bibañga gwé bi bi tihba me ngandak, me ee, me ee ngandak ni nye.

I ngéda me bi yi le Mbôgi Yéhôva i bé gwés mahaa map ndi le men me bé nok bé bo, me kit le me mbôdôl ke i makoda map i Ndap Ane. Ha nyen me bi boma Kévin, Mbôgi Yéhôva i i bé yi niiga Bibel, me ni nye di bôdôl nigil Bibel.

Kévin bona nwaa ba bééna bé mbôm niñ, libim li ngéda yap ba bé tégbaha jo inyu niiga bôt Bibel. Moni nwap ba bé kôhna a bé hôla bo i ke i Afrika ni i Amérika Ñembok inyu hôla maoñ ma dikuu di biloñ di Mbôgi Yéhôva. I babiina ba, ba bé maséé ngandak, ba gwéhnaga ki ngandak. I ntén niñ u won me bééna ngôñ.

Kévin a bi unda me vidéô i i mpôdôl maséé ma yé i nson u misiôner, ha nyen me bi kit le i nson u won me gwé ngôñ i boñ. I nwii 1995, me sôblana, me yila Mbôgi Yéhôva. Ndi ilole me soohe Nyambe le a ti me lingwañ, me bi bôdôl soohe nye le: “Ti bañ me to liyep, to lingwañ.”​—⁠Bingéngén 30:8.

I len ini, me yé toi lingwañ, he lingwañ li moni bé, ndi lingwañ i pes mbuu. Me bi boma loñge muda le Nuria i Honduras, me bii nye. ba bi om bés misiôner i Panama; i mbus, i Méksika. I bibañga bi Bibel bini bi yé toi maliga: “Bisai bi Yéhôva gwon bi nlona lingwañ, a nkônde bé njôghe yo ki yo mu”!​—⁠Bingéngén 10:22, MN.