Ngandak babiina i mbéna bé kwel, yak i ngéda ba yé lôñ. Kii i mboñ hala?

•  Ba yé homa wada ndi ba nkwel bé, inyuki?

•  Kii ni nla boñ?

•  Mahoñol ma ngim babiina

•  Maéba inyu kwel loñge

• Waa

  “I ngéda di nsômbôl tégbaha ngéda lôñ, wada ikété yés a yé nwaak ngandak; ibale nlô wem bé, memede. I ngéda me yé nwaak hala, hiki jam li nhindha me ñem. Jon di yé di tehe nseñ le di béñgege télé.”​—Anna.

• Téléfôn ni internet

  “Bitéléfôn ni internet bi nla yoñ ngéda nan yosôna. U nla tégbaha ngandak ngéda mu, u kôhna bé pôla kwel ni sobiina woñ. Ni nla yila weñgoñle ni niñ bé ikété ndap yada.”​—Kathérin

• Ni ngwés bé minlélém mi mam

  “I ngéda nlô wem a huu i bôlô, a ntégbaha ngéda i boñ mam ma ma nlémél nye. Kiki a nsal bôlô i ngui, a kôli tégbaha ngéda nyetama inyu boñ mam mé. Ndi me, me yé me gwés le di ba lôñ.”​—Jane.

• Bôlô

  “Ordinater ni internet bi mboñ le bôlô i mélél bé i homa bôlô, i noñ mut i ndap. Ngim mangéda, me yé me ntimbhe mambadga inyu mam ma bôlô, me bak i ndap, ndi ki le me nlamga kwel ni nwaa wem.”​—Mark.

• Yi le i tégbaha mangéda malam ni sobiina woñ ma yé nseñ ngandak.

  Litiñ li Bibel: “Ni wan mambe mam ma nlôôha ba nseñ.”​—Filipi 1:10.

  Hek pék: Baa maboñok moñ ma ñunda le u ntehe le libii joñ li yé nseñ iloo mam mape? Baa i ngéda u mal boñ mam moñ, kayéle u gwé ha bé jam i boñ nyen u nkwel ni nwaa woñ tole ni nlô woñ?

  Noode likeñge lini: Ni hoñol le n’a tégbaha ngéda lôñ ibale pôla i nene. Ndi tjega ngéda i yé loñge inyu bé bo iba, i het yom yo ki yo i ntééñga bé bé.

  “Me ngwés ngeñ nlô wem a nkôôba ngim ngéda ndik inyu bés bo iba. Hala a ñunda me le a ngwés me, a nkon ki maséé i tégbaha ngéda ni me. Hala a mboñ le yak me, me nkônde gwés nye.”​—Anna.

• Niglana i téé ngim ngéda le ni ngwélél bé téléfôn nan.

  Litiñ li Bibel: “Hiki jam li gwé ngeñ.”​—Ñañal 3:1.

  Hek pék: Baa u ma kôhna nwin i téléfôn u u nkéñ we njel i yoñ ngéda ni sobiina woñ?

  Noode likeñge lini: Ni téé ngim ngéda hiki kel le ni je bé bo iba, ni ma bii téléfôn nan tun ipe. I ngéda ni nje ntôñ, hala a nti bé pôla i pôdôl i mam ni ntégbaha ngim kel.

• Ibale pôla i nene, boña bôm tole bibôlô bi ndap lôñ.

  Litiñ li Bibel: “Bôt iba ba yé loñge iloo mut wada, inyule ba gwé loñge bom inyu ngéba yap.”​—Ñañal 4:9.

  Hek pék: Baa we ni sobiina woñ ni mbéna boñ bôm lôñ?

  Noode likeñge lini: Nôglana. Boña mam bé bo iba, yak ngim mam le mut wada a nla boñ.

  “Ni nla ke i somb gwom lôñ, tole jôwa bipan, bok mambot, tibil mbônji. Ni tehe bañ i mam mana kiki bibôlô bi ndap, ndi kiki pôla i tégbana ngéda bé bo iba.”​—Nina.

•  Unda le u nok sobiina woñ

  Litiñ li Bibel: “I lem nan ini le ni nai bé ni litehge linan li mam i yiba ni bôt bobasôna.”​—Filipi 4:5.

  Hek pék: Lelaa u nla unda le u nok sobiina woñ mu mam u mbat nye le a boñ?

  Noode likeñge lini: Kwela inyu yi i jam hiki wada nan a gwé ngôñ. Nôglana inyu tjek ngéda ni ga tégbaha bé bo iba.

  “Nlô wem a yé mbôô ndi me me mbéna nkon. Ngim mangéda, me yé me kal nlô wem le a pam, a kenek i tégbaha loñge ngéda; i mbus, a nlo a koba me. Me yé me yégle i ndap i ngéda a nke i pémés biibe. Hala a nlémél bés bo iba inyule hiki mut a nkôhna i jam li nlémél nye.”​—Daniela.

Pog, hiki wada nan a badba mambadga mana ma noñ ha. I mbus, ni kwélél mu.

•  Munu dilo dini, baa u nla kal le we ni sobiina woñ ni ntégbaha toi ngéda lôñ?

• Baa u nla bégés sobiina woñ inyu biliya a mboñ i tégbaha ngéda ni we?

• Mambe mahol a nlama boñ mu jam li?

• Baa téléfôn tole bikei bipe bi mbéna kéñ we njel i yoñ ngéda i emble sobiina woñ?

• Lelaa u nla unda le u nok sobiina woñ ikété mam u mbat le a boñ?

• Mambe mahéñha hiki wada nan a nlama boñ munu sonde ini inyu tégbana ngéda lôñ, ibabé le jam jo ki jo li ntééñga bé?