I nkoñ ’isi wonsôna, ngandak bôt i nkal le i yé bikristen, ndi i njôp sum sum ikété mam ma mb’ô. Bahogi ba nit ngim bôt ba m’bô tole ngim nlôñ m’bô inyule ba nsômbôl le bibase gwap bi yiba. Yak bôt ba m’bô ba mbéna nit ngim jam base i nkal inyu boñ le bôt ba base i ba pohol bo. Ngim mangéda, bakena bibase bomede ba nyéñ le ba pohol bo inyu bitel i biloñ gwap. I ngim biloñ, u nla koba ngim base i i nkadba le i yé Kristen, ndi i ban-ga tel i “base i loñ.”

 We u nhoñol lelaa? Baa banigil ba Yésu ba nlama jôp i mam ma m’bô? Ndémbél Yésu i nhôla bés i timbhe mbadga i. A bi kal le: “Me nti bé ndémbél le kiki me mboñ inyu nan yak bé ni boñ nlélém.” (Yôhanes 13:15) Imbe ndémbél Yésu a bi yigle bés inyu jam li mbéñge mam ma mb’ô?

 Heeni. Yésu a bi ha bé nyo wé ikété mam ma m’bô ma nkoñ ’isi.

 Yésu a bi yéñ bé kôhna ane i nkoñ ’isi. A bi tjél yila ñane nkoñ ’isi unu ngéda Satan a bi kal le a ga ti nye “biane bi nkoñ ’isi gwobisôna.” (Matéô 4:8-10) a Kel yada, bôt ba bi yimbe le Yésu a nsal longe, ba noode tinde nye le a yila ñañe wap. Bibel i nkal le: “Kiki Yésu a nyi le ba nsômbôl lo i gwel nye inyu yilha nye kiñe, a témb a nyodi, a ke nyetama i hikôa.” (Yôhanes 6:15) A bi tjél boñ sômbôl i bôt ba binam. A bi jôp bé i mam ma mb’ô.

 Yésu a bi nit bé nlôñ mb’ô to wada. I ngéda Yésu a bé hana ’isi, Lôk Yuda i bé kon bé maséé i saa Lôk Rôma tas; i mis map, ba bé bé ba kôli saa tas. I ngéda ba bi bat Yésu le a ti mahoñol mé mu jam li, a bi jôp bé mu pééna i, a bi kal bé too ba kôli saa tas tole ba kôli bé. A bi kal bo le: “Timbhana ni Kaisa mam ma Kaisa, Nyambe ki mam ma Nyambe.” (Markô 12:13-17) A bi tjél ha nyo wé mu bipééna bi mam ma mb’ô; ndi a bi unda le, i tas Kaisa nu a bé ane ngomin Lôk Rôma a mbat, bôt ba nlama saa yo. Nlélém ngéda, a bi unda mut a nlama bé nôgôl i mam momasôna ngomin a mbat nye. Mut a nlama bé ti ngomin lipém tole bibégés bi bi kôli ni Nyambe.​—Matéô 4:10; 22:37, 38.

 Yésu a bi niiga bôt kii i yé Ane Djob, a nit ki yo. (Lukas 4:43) A bi jôp bé ikété mam ma mb’ô inyule a bé yi le Ane Djob yotama yon i ga boñ sômbôl i Djob hana ’isi, he biane bi bôt ba binam bé. (Matéô 6:10) A bé yi le Ane Djob i ga sal bé ni biane bi nkoñ ’isi inyu héñha mam, ndi i ga tjé gwobisôna le fet.​—Daniel 2:44.

 To jam. Banigil ba Yésu ba bi nôgôl i jam a bi kal bo le ba “ta bé bôt ba nkoñ ’isi.” (Yôhanes 15:19) Ba bi noñ ndémbél yé, ba yén haa ni mam ma mb’ô. (Yôhanes 17:16; 18:36) Ilole ba jôp ikété mam ma mb’ô, ba bi noñ oda Yésu a bi ti bo le ba añal ñañ nlam u Ane Djob.​—Matéô 28:18-20; Minson mi Baôma 10:42.

 Inyu bikristen bi hiai hi bisu, jam li bisu li bé le ba nôgôl Nyambe, ndi ba bé yi yak le ba nlama ti bangomin lipém. (Minsôn mi Baôma 5:29; 1 Pétrô 2:13, 17) Ba bé nôgôl mambén ma loñ, ba saak yak tas. (Rôma 13:1, 7) To hala kiki ba bé jôp bé ikété mam mb’ô, mbén ngomin ni bitelbene bi ngomin bipe bi bé hôla bo.​—Minson 25:10, 11; Filipi 1:7.

 Bibel i ntibil unda le Yésu ni banigil bé ba bé jôp bé ikété mam ma mb’ô. Inyu hala nyen Mbôgi Yéhôva ikété nkoñ ’isi ba nyoñ bé ngaba ikété mam ma mb’ô. Kiki Bikristen bi hiai hi bisu, ba mboñ bôlô Yésu a bi yigle bo, hala wee i añal “ñam nlam u Ane Djob.”​—Matéô 24:14.