“Mbôgi Yéhôva i bé ndik bé loñge inyu bôt, ndi yak inyu ngwo yem. Kel yada, Elaine, nu a bé a téé ipañ kak bikaat a bi ti bon bem ba ngwo iba bijek. I mbus ngéda, bon bem ba ngwo ba bi bana lem i kôôge bebee ni Mbôgi Yéhôva i i bé i kak bikaat inyu boñ le ba ti bo bijek.

“Kiki ngéda i bé tagbe, bijek bi bé lémél ngwo yem, yak minkwel ni Mbôgi Yéhôva mi lémlak me. Ndi, me bé gwés bé yila liwanda jap. Me bééna iloo 70 nwii, me badbaga too Mbôgi Yéhôva i mpot maliga. Kiki me bi léba le base i Lôk Sañgô i mpot bitembee, me bi yoñ makidik i nigil Bibel metama.

“Mu ngéda i nyen, me bi léba le Mbôgi Yéhôva i ngwélél kak bikaat ngandak bahoma mu tison. Ba bé minyaô hiki ngéda. Me bi bôdôl neebe i yom ba bé kal me inyule ba bé gwélél Bibel inyu timbhe mambadga mem.

“Lisañ jada, Elaine a bi bat me le: ‘Baa u nhémle le binuga bi yé likébla li Djob?’ Me bi timbhe le: ‘Ñ, me nhémle hala!’ I mbus Elaine a bi éñél me kaat Yésaya 11:6-9. Ibôdôl ha ngéda i, me bé sômbôl kéñbaha yi yem i Bibel, ndi me bé gwés bé yoñ bikaat bi Mbôgi Yéhôva.

“I dilo di bé noñ ha, me bi kwel ndék ni Elaine bo nlô wé Brent, nkwel u u bi lémél me ngandak. Ba bi kal me le me añ ibôdôl i kaat Matéô ipam i kaat Minson mi baôma inyu tehe kii i ñéba le mut a yé bañga kristen. Hala nyen me bi boñ. I mbus ndék ngéda, me bi neebe yigil i Bibel ni Brent bo Elaine. Hala a bé i ñemkété i nwii 2016.

“Hiki sonde, me bé bem yigil yem i Bibel ni makoda i ndap Ane. Me bé maséé ngandak i nigil maliga ikété Bibel. I mbus ngim nwii ni jam, me kôs sôble. Nano nu me gwé 79 nwii, me yé maséé inyule me yé i base maliga. Yéhôva a bi lôôha sayap me, a neebe le me jôp i lihaa li bagwélél bé.”