Ndég ngéda ilole a nwo, Yésu a bi bana nkwel u tôbôtôbô ni banigil bé ba-na: Pétrô, Yakôbô, Yôhanes, ni Andréa. Kiki Yésu a nti bo yimbne i malôl mé ni i masuk ma ngéda, a bat ini mbadga le: ‘Njee ni a yé nkol u maliga ni u pék, u nwet wé a ntéé ngii bôt bé ba ndap i ti bo bijek ngéda litine.’ (Matéô 24:3, 45; Markô 13:3, 4) Kiki “nwet” wap, Yésu a bé yis banigil bé le a ga téé ngim bôt kiki nkol inyu ti bo bijek bi mbuu i dilo di nsôk. Njee a bé lama ba nkol u?

U yé man juu li miñhook mi banigil ba Yésu. U “nkol” u won Yésu a bi téé kiki ñéga ntôñ u Mbôgi Yéhôva ni nkoñ isi wonsô. U njés bagwélél ba Yéhôva i libak li mbuu i ngéda i kôli. Bés bobasô di mbôdôl i kindak nu ñem i ti bés ‘bijek bi mbuu ngéda litine.’​—Lukas 12:42.

U yé kindak i ngii ndap Djob. (1 Timôtéô 3:15) Yésu a bi bééga nkol u mbegee keñi i éga ntôñ u bagwélél ba Yéhôva hana isi. Hala wee u nyoñ ngéda ni bigwel moo bi ntôñ le mam ma kee loñge, u ñéga bôlô i likalô, ni niiga bés ni njel makoda més. Inyu boñ le di kôs hiki yom di gwé ngôñ, ni i ngéda i kôli, “nkol u maliga ni u pék” u nti bés bijek bi mbuu ni njel bikaat di ngwélél i nson wés likalô, lôñni bi di ngwélél i makoda més matitigi ni makeñi.

U nkol u, u yé maliga inyule u nit maliga ma Bibel ni nson u añal ñañ nlam. U yé ki pék inyule u ngwélél nkus u Yésu Kristô ni pék hana isi. (Minson mi baôma 10:42) Yéhôva a nsayap bôlô yap ni ngandak bijek bi mbuu ni mahol makeñi.​—Yésaya 60:22; 65:13.

• Njee Yésu a bi téé inyu ti banigil bé bijek bi mbuu?

• Inyuki nkol u yé maliga ni pék?