Ғайсаның ҡорбаны нисек итеп «күптәрҙе йолоп» ала?
Изге Яҙманан яуап
Ғайса Мәсихтең ҡорбаны — ул кешелекте гонаһтан һәм үлемдән ҡотҡарыр өсөн Йәһүә күргән сара. Инжилдән күренеүенсә, Ғайсаның ҡаны кешелекте йолоп алыу хаҡы булып тора (Ефестарға 1:7; 1 Петр 1:18, 19). Шуға күрә лә Ғайса үҙе әйткәнсә, ул «күптәрҙе йолоп алыр өсөн, Үҙ ғүмерен йолом итеп бирергә тип» килгән (Матфей 20:28).
Ни өсөн «күптәрҙе йолоп» алырға кәрәк булған?
Беренсе кеше, Әҙәм, камил итеп яратылған, йәғни гонаһһыҙ булған. Ул мәңге йәшәй алыр ине, ләкин Аллаға буйһонмаҫҡа булғас, был мөмкинлекте юғалтҡан (Башланмыш 3:17—19). Балалары тыуғас, Әҙәмдең гонаһы нәҫел буйынса уларға ла күскән (Римдарға 5:12). Шуға ла Изге Яҙмала, Әҙәм үҙен дә, балаларын да гонаһ һәм үлем ҡоллоғона һатҡан, тиелә (Римдарға 7:14). Камил булмағанлыҡтан, улар Әҙәм юғалтҡанды кире ҡайтарыр өсөн йолом түләй алмай (Зәбур 49:7, 8).
Әҙәмдең шул тиклем аяныс хәлгә эләккән балаларын Алла бик ныҡ йәлләгән (Яхъя 3:16). Әммә уларҙың гонаһтарына күҙ йомоу, йәғни уларҙы бер нигеҙһеҙ кисереү Алланың үҙе урынлаштырған ғәҙеллек нормаларына ҡаршы килеү булыр ине (Зәбур 89:14; Римдарға 3:23—26). Алла кешеләрҙе ярата, шуға ла уларҙың гонаһтарын кисерер өсөн генә түгел, ә гонаһтарынан бөтөнләй азат итер өсөн, законлы нигеҙ биргән (Римдарға 5:6—8). Йолом тап ошо законлы нигеҙ булып тора ла инде.
Йоломдоң асылы нимәлә?
Изге Яҙма буйынса, йолом төшөнсәһе үҙ эсенә өс яҡты ала:
Түләү тигәнде аңлата (Һандар 3:46, 47).
Азат итеү сараһы булып тора (Сығыш 21:30).
Түләнгән нәмәнең хаҡына тиң йә уның хаҡын ҡаплай a.
Ошо өс яҡ Ғайса Мәсихтең йолом ҡорбанында нисек сағылғанын ҡарап сығайыҡ.
Түләү. Инжилдә, мәсихселәр «ҡиммәт хаҡҡа һатып алынды», тиелә (1 Коринфтарға 6:20; 7:23). Был хаҡ, йәғни түләү — Ғайса Мәсихтең ҡаны, ул үҙ ҡаны менән «һәр ҡәбиләнән һәм телдән, халыҡтан һәм милләттән кешеләрҙе Алла өсөн һатып» алған (Асылыш 5:8, 9).
Азат итеү. Ғайса Мәсих беҙҙе «Үҙ үлеме менән ҡотҡарып», гонаһтан азат итте (1 Коринфтарға 1:30; Колосстарға 1:14; Еврейҙарға 9:15).
Түләнгән нәмәнең хаҡына тиң. Ғайсаның ҡорбаны Әҙәм юғалтҡан ғүмергә — бер камил кешенең ғүмеренә тиң (1 Коринфтарға 15:21, 22, 45, 46). Изге Яҙмала былай тиелә: «Берәүҙең [Әҙәмдең] тыңлашмаусанлығы арҡаһында күптәр гонаһҡа төшкән кеүек, бер Кешенең [Ғайса Мәсихтең] тыңлаусанлығы арҡаһында күптәр аҡлана» (Римдарға 5:19). Бына ни өсөн бер кешенең үлеме гонаһлы күп кешеләр өсөн йолом була ала. Ғайсаның ҡорбаны — барыһы өсөн тейешле йолом, һәм был йолом кәрәкле аҙымдар яһаған кешеләргә файҙа килтерә (1 Тимофейға 2:5, 6).
a Изге Яҙмала ҡулланылған «йолом» тигән һүҙ түләнгән хаҡты йә түләнгән берәй ҡиммәтле нәмәне аңлата. Мәҫәлән, кафа́р тигән боронғо еврей ҡылымының төп мәғәнәһе — «ҡаплау» (Башланмыш 6:14). Ғәҙәттә, был һүҙ гонаһтарҙы ҡаплау, йәғни уларҙан азат итеү тураһында һүҙ барғанда ҡулланыла (Зәбур 65:3). Ә уға яҡын ко́фер тигән һүҙ ошо маҡсат өсөн түләнгән хаҡты, йәғни йолоп алыу хаҡын аңлата (Сығыш 21:30). Шуға ярашлы, ғәҙәттә, «йолоп алыу» тип тәржемә ителгән грек һүҙе ли́трон шулай уҡ «азат итеү» тигән мәғәнә лә йөрөтөргә мөмкин (Матфей 20:28). Грек яҙыусылары хәрби әсирҙәрҙе йә ҡолдарҙы азат итер өсөн түләнгән хаҡ тураһында яҙғанда ошо һүҙҙе ҡулланған.