29 MART 2023 | YENİLƏNİB: 18 APREL 2023
RUSİYA

Həbsdə olan qardaşlarımız Yehovadan kömək alırlar | YENİLƏNİB. QARDAŞLAR HƏBS OLUNDU

PLAY

17 aprel 2023-cü il tarixində Həştərxan Vilayətinin Axtubinsk Rayon Məhkəməsi Rinat Kiramov, Sergey Korolyov və Sergey Kosyanenkonu təqsirli bildi və hər birini yeddi il müddətinə həbsə məhkum etdi. Qardaşlar 2021-ci ilin noyabr ayından istintaq təcridxanasında saxlanılırdı və həbsdə qaldılar.

Qardaşlar barədə məlumat

Rinat Kiramov

Doğulduğu il: 1987 (Moskva vilayəti, Moskva şəhəri)

Bioqrafiya. Həbsdən əvvəl veb-tərtibatçı olmaq üçün təhsil alıb. İstedadlı musiqiçidir. Alternativ mülki xidməti poçtalyon işləyərək icra edib.

Həqiqəti anasından öyrənib. Yehovanın Şahidləri arasındakı məhəbbət və birlik ona güclü təsir bağışladı. 2001-ci ildə vəftiz olundu.

2009-cu ildə Qalina ilə evləndi.

Rinatın həyat yoldaşı Qalina ilə müsahibə a

Həbsxanada Rinata dözməyə nə kömək edir?

Rinat həbsdə olan hər bir bacı-qardaş üçün dua etməyi qarşısına məqsəd qoyub. Hər ay mən ona bütün dünyada əqidəsinə görə həbs olunmuş bacı-qardaşların siyahısını göndərirəm. Dindaşları üçün etdiyi bu dualar onun Yehova ilə münasibətlərini möhkəmləndirir və diqqətini öz problemlərinə cəmləməməyə kömək edir. Həmçinin sonacan dözməyin nə qədər vacib olduğunu bir-birimizə xatırladırıq. Biz yaxşı şahidlik veririk və Yehovanın ali hakimiyyətini dəstəkləyirik. Rinat məktubunda yazmışdı: «Düşmənimiz nə qədər güclü görünsə də, səmavi Atamızın köməyilə biz istənilən sınaqdan qalib çıxacağıq. Amma qalib gəlmək azadlığa buraxılmaq demək deyil. Bizim üçün qalib gəlmək sonacan sadiqliyimizi qorumaq deməkdir».

Yehovanın köməyini necə hiss etmisən?

Rinatın məktubunda yazdığı sözlərin doğruluğuna əmin oldum. O yazmışdı: «Hal-hazırda mən sənin qayğına qala bilmirəm. Ona görə də mənim bu məsuliyyətimi Yehova üzərinə götürüb». Bütün bu sınaqlar başlayandan həmişə Yehovanın müqəddəs ruhu ilə mənə dəstək olduğunu hiss etmişəm. Zəbur 91:1 ayəsində deyilir: «Haqq-Taalanın pənahında yaşayan Qüdrət Sahibinin kölgəsində yuva tapar». Əvvəllər bu ayəni sadəcə oxuyub keçirdim. Amma indi Haqq-Taalanın pənahında yaşamağın nə demək olduğunu öz təcrübəmdən bilirəm. Bu mənə Yehovaya tam etibar etməyə və sınaqlara sevinclə dözməyə kömək edir.

Sergey Korolyov

Doğulduğu il: 1973 (Penza vilayəti, Penza şəhəri)

Bioqrafiya. Fotoaparatla şəkil çəkməyi və mebel düzəltməyi sevir.

Yehovanın Şahidləri ilə ünsiyyət və Yaradan haqda öyrəndikləri ona dinlə bağlı mənfi fikirlərini dəyişməyə kömək etdi. 1996-cı ildə vəftiz olundu.

2005-ci ildə Yekaterina ilə evləndi.

Müsahibə

Bu sınaq vaxtı Yehova ilə münasibətlərin necə möhkəmləndi?

Həbsə düşəndə mənfi hisslərə qapılmamaq çətindir. Dözümüm, imanım, ümidim, məhəbbətim — hamısı sınağa çəkilir. Mənə ən çox kömək edən duadır. Səmavi Atama dua etmək üçün vaxtım çoxdur. Həyatımda heç vaxt həbsdə olandan bəri etdiyim qədər çoxlu dua etməmişəm. İndi İsanın bütün gecəni Yehovaya necə dua etdiyini yaxşı başa düşürəm. Düşdüyüm vəziyyət mənə Yehovaya tam etibar etməyi öyrətdi. Bəlkə də, bu, burada keçirdiyim vaxtın mənə gətirdiyi ən böyük faydadır.

Sergey Kosyanenko

Doğulduğu il: 1961 (Volqoqrad vilayəti, Yelan şəhəri)

Bioqrafiya. Bədən tərbiyəsi müəllimi işləyir.

1983-cü ildə Olqa ilə evlənib. Müqəddəs Kitabın tarixi dəqiqliyi və yerinə yetmiş peyğəmbərliklər onda həqiqətə maraq oyatdı. 2002-ci ildə vəftiz olundu.

Sergeyin həyat yoldaşı Olqa ilə müsahibə b

Ruhdan düşməməyə sənə nə kömək edir?

Çalışıram, mənə faydası dəyəcək işlərlə məşğul olum. Müqəddəs Kitaba əsaslanan nəşrləri oxuyuram və Yehovaya dua edirəm ki, məyusluğa qapılmamaq üçün mənə güc versin. Sergeyin yazdığı məktubları təkrar-təkrar oxuyuram və onu yenidən görəcəyim vaxtı xəyal edirəm. Nəğmələrimizi dinləməyin və oxumağın da mənə böyük köməyi dəyir.

Elə bir Müqəddəs Kitab ayəsi var ki, sənə dözməyə xüsusilə kömək edir?

1 Korinflilərə 10:13 ayəsi çox xoşuma gəlir. Orada Allah vəd edir ki, gücümüz çatmayan sınaqlara məruz qalmağa qoymayacaq. Başa düşürəm ki, təkbaşına bu çətinliklərin öhdəsindən gələ bilmərəm, amma Yehova ilə hər şeyə gücüm çatar. Əgər hansısa sınaqla üzləşmişiksə, deməli, ona dözə bilərik. Sınaqlarımız əbədi deyil.

Yehova xidmətçiləri üçün pənah yeridir və O onları qolları üstündə gəzdirir. Bunu bilmək bizə təskinlik verir (Qanunun təkrarı 33:27).

Hadisələrin gedişatı

9 noyabr 2021-ci il

Cinayət işi açıldı. Axtubinsk və Znamensk şəhərlərində Rinat Kiramov, Sergey Korolyov və Sergey Kosyanenkonun da evləri daxil olmaqla, Yehovanın Şahidlərinin yaşadığı 15 evdə axtarış aparıldı.
10 noyabr 2021-ci il

Sergey Korolyov həbs olundu.
11 noyabr 2021-ci il

Rinat Kiramov və Sergey Kosyanenko həbs olundu. Qardaşların üçü də məhkəməyədək həbsə salındı.
14 noyabr 2022-ci il

Cinayət işi üzrə məhkəmə icraatı başladı.