29 oktyabr 2023-cü il tarixində Hindistanın Kerala şəhərində keçirilən toplantıda bir neçə bomba partladı. Dərin kədər hissi ilə bildiririk ki, öncədən qeyd edilən üç nəfərdən başqa, daha bir qardaşımız və iki bacımız da həyatını itirdi. Onların arasında daha öncə həyatını itirən 12 yaşlı qızın anası və qardaşı da var. Bundan əlavə, 11 nəfər bacı-qardaşımız hələ də xəstəxanadadır.

Hindistan filialı faciədən zərər çəkənlərə təsəlli verib, ruhlandırmaq üçün xüsusi bir görüş keçirdi. 4 noyabr 2023-cü il tarixində keçirilən bu görüşə partlayışın baş verdiyi zaman iştirak edən 21 yığıncaq dəvət olunmuşdu. Görüş 200 nəfərin iştirak etdiyi ibadət evində keçirildi. 1300 nəfər isə proqramı videokonfrans vasitəsilə izlədi. Xəstəxanada yatanlar üçün isə proqram videoyazıya alındı. Filialdan gələn bir qardaş Zəbur 23:1 ayəsini müzakirə edirdi. O, Yehovanın hər bir xidmətçisinə necə qayğı göstərdiyini vurğuladı: «Bu ayədə məzmurçu demir ki, Yehova adi bir Çobandır, yaxud inanılmaz bir Çobandır. Məzmurçu “Yehova mənim Çobanımdır” deyir. Yehovanın hər birimizlə şəxsən maraqlandığını bilmək necə də təsəllivericidir!»

Partlayış zamanı zalda olan bir qardaş deyir ki, hələ də gözünə yuxu getmir. Buna baxmayaraq, o, xəstəxanada yatanlara kömək etmək üçün könüllü kimi xidmət edir. Qardaş deyir: «Onların imanını və müsbət əhval-ruhiyyəsini görmək mənə içimdəki narahatlığı unutmağa kömək etdi. Yaralarına, ağrılarına rəğmən, onlar sevinclə Yehovaya həmd nəğmələri söyləyirlər». Başqa bir qardaş demişdi: «Bəzilərinin normal həyata qayıtması uzun çəkə bilər. Amma bilirəm ki, bu müddət ərzində bacı-qardaşlar onlardan sevgilərini əsirgəməyəcək. Əminəm ki, qayğıkeş Allahımız Öz güclü əli ilə onların hər birinin əlindən tutub. Bunu bilmək adama güc verir!»

Əminik ki, Allahımız Yehova Hindistandakı əziz bacı-qardaşlarımıza, eləcə də bütün «qəlbisınıqlara şəfa verir, sızıldayan yaralarını sarıyır» (Zəbur 147:3).