Әҝәр ҹәмијјәт мәнәви ҹәһәтдән позулубса, ондан јаранан һөкумәт дә белә олаҹаг. Демәли, коррупсијасыз һөкумәт инсан ҹәмијјәтинә аид олмајан бир һөкумәт олмалыдыр. Мүгәддәс Китабда да мәһз белә бир һөкумәт — Аллаһын гурдуғу һөкумәт барәдә данышылыр. Иса пејғәмбәр давамчыларына онун ҝәлмәси барәдә дуа етмәји бујурмушду (Матта 6:9, 10).

Аллаһын сәмави Падшаһлығы реал һөкумәтдир. О, бүтүн инсан һөкумәтләрини әвәз едәҹәк (Мәзмур 2:8, 9; Вәһј 16:14; 19:19—21). Аллаһын Падшаһлығынын ҝөрәҹәји ишләрдән бири дә коррупсијанын мәһви олаҹаг. Ҝәлин буну сүбут едән алты амили нәзәрдән кечирәк.

ПРОБЛЕМ. Бәшәр һөкумәтләри, әсас етибарилә, вәтәндашларындан јығдығы верҝиләр һесабына малијјәләшир. Бу гәдәр пулу ҝөрән бәзи вәзифәли шәхсләр оғурлуг едир, диҝәрләри исә кимләринсә верҝиләрини вә ја өдәнишләрини азалтмаг үчүн рүшвәт алыр. Дөвләт исә, өз нөвбәсиндә, вурулан зијаны арадан галдырмаг үчүн верҝиләри галдырыр, бу да коррупсија һалларынын артмасына ҝәтириб чыхарыр. Бунун алтыны чәкән исә ҝүнаһсыз инсанлар олур.

ҺӘЛЛИ. Сәмави һөкумәт ҝүҹүнү Күлли-Ихтијар Јеһовадан * алыр (Вәһј 11:15). Онун фәалијјәт ҝөстәр мәси үчүн верҝи јығылмасына еһтијаҹ јохдур. Әксинә, гүдрәтли вә сәхавәтли Аллаһ әмин едир ки, Онун һөкумәти бүтүн тәбәәләринин еһтијаҹларыны өдәјәҹәк (Јешаја 40:26; Мәзмур 145:16).

ПРОБЛЕМ. Әввәлки мәгаләдә ады чәкилән Сјузан Рос-Акерманын фикринҹә, коррупсијаны јох етмәк үчүн «јухарыдан башламаг лазымдыр». Һөкумәтин полис вә ҝөмрүк ишчиләри арасында коррупсијанын көкүнү кәсмәјә чалышдығы һалда, јухарыда отуран шәхсләр арасында буна јол вермәси ону етибардан салыр. Һәтта етик гајдаларына риајәт едән ән јахшы рәһбәр белә, сәһвсиз дејил. Аллаһын Кәламында јазылыб: «Јер үзүндә елә салеһ адам јохдур ки, јалныз јахшылыг едиб һеч бир ҝүнаһ етмәсин» (Ваиз 7:20).

ҺӘЛЛИ. Аллаһ Өз һөкумәтинә ҝүнаһсыз, пак рәһбәр — Иса Мәсиһи тәјин едиб. Ҝүнаһа мејилли инсанлардан фәргли олараг, бу рәһбәр Аллаһын бәјәнмәдији ишләри ҝөрмәјә тамаһ салмыр. Иса Мәсиһ буну ән бөјүк рүшвәтдән — дүнјанын бүтүн падшаһлыгларындан вә шан-шөһрәтиндән имтина етмәклә сүбут едиб. Бу дүнјанын һөкмдары Иблис Иса Мәсиһә сөз вермишди ки, бүтүн бунлары она баш әјмәјин гаршылығында верәҹәк (Матта 4:8—10; Јәһја 14:30). Үстәлик, өлүм ајағында әзаб чәкәндә белә, Иса Мәсиһ паклығыны горумаг истәдији үчүн ујушдуруҹу маддәдән имтина етди. Чүнки бу, она һиссләрини ајыг башла идарә етмәјә мане олаҹагды (Матта 27:34). Бәли, Аллаһын дәрҝаһына галдырылан Иса Мәсиһ сүбут етди ки, Падшаһлығы идарә етмәјә там јарарлыдыр (Филипилиләрә 2:8—11).

ПРОБЛЕМ. Әксәр өлкәләрдә мүнтәзәм олараг сечкиләр кечирилир. Бунун мәгсәди халга коррупсионер мәмурлары вәзифәләриндән узаглашдырмаға имкан вермәкдән ибарәтдир. Амма инкишаф етмиш өлкәләрдә белә, сечкигабағы кампанијалар вә сечкиләрин өзү коррупсијаја зәмин јарадыр. Варлы инсанлар бу ҹүр кампанијалара пул бурахыб өз адамларыны габаға чәкир, сонра да онлардан истәдији кими истифадә едирләр.

Бирләшмиш Штатлар Али Мәһкәмәсинин һакими Ҹон Пол Стивенсин тәбиринә ҝөрә, сечкиләрин ҝедишатына тәсирин олмасы «јалныз һөкумәтин ганунвериҹилијини вә вәзијјәтини јох, инсанларын етибарыны да тәһлүкә алтына гојур». Буна ҝөрә дә әксәр инсанларын коррупсијанын ән чох јајылдығы гурумун сијаси партијалар олдуғуну һесаб етмәси һеч дә тәәҹҹүблү дејил.

ҺӘЛЛИ. Аллаһын Падшаһлығы сабит, әбәди һөкумәт олдуғу үчүн сечкигабағы кампанијалардан вә сәсләрин сахталашдырылмасындан сөз ҝедә билмәз (Даниел 7:13, 14). Онун рәһбәрини Аллаһ сечдији үчүн бу һөкумәт сечкиләрдән асылы дејил. Онун сабитлији зәманәт верир ки, ҝөрдүјү ишләр инсанлара әбәдијјән хејир ҝәтирәҹәк.

ПРОБЛЕМ. Илк бахышдан адама елә ҝәлә биләр ки, јени ганунларын гәбул едилмәси вәзијјәти јахшылашдыра биләр. Лакин мүтәхәссисләр һесаб едирләр ки, ганунларын сајынын артмасы чох вахт коррупсија һалларынын артмасына шәраит јарадыр. Үстәлик, бу ганунларын тәтбиги үчүн күллү мигдарда пул лазымдыр, амма бу, јахшы нәтиҹәләр әлдә олунаҹағына зәманәт вермир.

ҺӘЛЛИ. Аллаһын гурдуғу һөкумәтин ганунлары бәшәр һөкумәтләринин ганунларындан гат-гат үстүндүр. Мәсәлән, Иса Мәсиһ гајдалардан ибарәт узун сијаһы јох, Гызыл Ганун адланан ганун верди. Орада дејилир: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Матта 7:12). Ән әсасы исә, бу һөкумәтин гајда-ганунлары инсанын һәм һәрәкәтинә, һәм дә нијјәтинә тәсир едир. Мисал үчүн, Иса Мәсиһ: «Гоншуну өзүн кими сев», — дејиб (Матта 22:39). Әлбәттә ки, белә ганунлара риајәт едиб-етмәмәјимиз үрәкләрә бәләд олан Аллаһын ҝөзүндән јајынмыр (1 Шамуел 16:7).

ПРОБЛЕМ. Инсанлары коррупсијаја тамаһкарлыг вә худбинлик кими хүсусијјәтләр сөвг едир. Мәмурларда да, сырави вәтәндашларда да бу кејфијјәтләри тез-тез ҝөрмәк олар. Әввәлки мәгаләдә гејд олунан Сеулдакы һадисәдән ҝөрүнүр ки, подратчыларын дөвләт мәмурларына рүшвәт вермәләринин сәбәби пулларына гәнаәт етмәк иди. Чүнки онлар билирдиләр ки, бу, кејфијјәтли тикинти материаллары алмагдан вә тәһлүкәсизлик гајдаларына риајәт етмәкдән даһа уҹуз баша ҝәләҹәк.

Демәли, коррупсијанын көкүнү кәсмәк үчүн инсанлар дахилләриндәки худбинлији вә нәфси өлдүрмәлидирләр. Буну ашыламаг үчүн инсанлара тәлим програмлары кечирилмәлидир. Лакин һөкумәтин бу ҹүр програмлары тәшкил етмәјә нә истәји, нә дә баҹарығы вар.

ҺӘЛЛИ. Аллаһын Падшаһлығы коррупсија мәсәләсини көкүндән һәлл етмәјә башлајыб. Бу һөкумәт инсанлара буна ҝәтириб чыхаран пис ҹәһәтләринин өһдәсиндән  ҝәлмәји өјрәдир *. Бу тәлим онлара «руһән вә әглән» јениләшмәјә көмәк едир (Ефеслиләрә 4:23). Онлар тамаһкар вә худбин олмаг әвәзинә, нәләри варса, гане олмағы вә башгаларыны дүшүнмәји өјрәнирләр (Филипилиләрә 2:4; 1 Тимотејә 6:6).

ПРОБЛЕМ. Һәтта ән јахшы мүһит олса белә, ән дүзҝүн тәлим-тәрбијә верилсә белә, бәзиләри јенә дә надүрүст вә рүшвәтхор чыхаҹаг. Мүтәхәссисләр етираф едир ки, һөкумәт коррупсијаны мәһз бу сәбәбә ҝөрә арадан галдыра билмир. Һөкумәтин үмиди она галыр ки, һеч олмаса, коррупсијанын мигјасыны вә онун вурдуғу зәрәри минимума ендирсин.

ҺӘЛЛИ. БМТ-нин Коррупсијаја гаршы Конвенсијасында гејд олунур ки, коррупсијаја гаршы мүбаризә апармаг үчүн һөкумәт өз вәтәндашларыны «дүрүст, виҹданлы вә мәсулијјәтли» олмаға тәшвиг етмәлидир. Бу, ҝөзәл мәгсәддир. Амма Аллаһын Падшаһлығы садәҹә буна тәшвиг етмир о, өз тәбәәләриндән буну тәләб едир. Аллаһын Кәламында дејилир ки, тамаһкарлар вә јаланчылар Аллаһын Падшаһлығынын тәбәәләри олмаға лајиг дејилләр (1 Коринфлиләрә 6:9—11; Вәһј 21:8).

Белә јүксәк әхлаг нормаларына риајәт етмәји өјрәнмәк мүмкүндүр. Аллаһын биринҹи әсрдәки садиг бәндәләри бунун мүмкүн олдуғуну сүбут етмишдиләр. Мәсәлән, Шимон адлы бир нәфәр һәвариләрә пул тәклиф едиб мөҹүзә ҝөстәрмәк баҹарығыны алмаг истәјәндә онлар рүшвәтдән имтина едиб демишдиләр: «Бу пислијин үчүн төвбә ет». Шимон нијјәтинин пис олдуғуну дәрк едәндә һәвариләрдән онун үчүн дуа етмәји хаһиш етмишди (Һәвариләрин ишләри 8:18—24).

Миллијјәтиндән асылы олмајараг, һәр бир инсанын Аллаһын Падшаһлығынын вәтәндашы олмаг имканы вар (Һәвариләрин ишләри 10:34, 35). Аллаһын Падшаһлығынын тәгдим етдији тәлим програмы сизә бунун јолуну ҝөстәрәҹәк. Бу тәлими дүнјанын бүтүн јерләриндә пулсуз-тәмәннасыз алмаг мүмкүндүр. Јеһованын Шаһидләри бөјүк мәмнунијјәтлә Мүгәддәс Китаба әсасланан дәрсләрин неҹә кечирилдијини сизә ҝөстәрә биләрләр. Бу сизин һәфтә әрзиндә ҹәми 10 дәгигә вахтынызы алаҹаг. Һәмин дәрсләрдә сиз бир чох шејләрлә јанашы, Аллаһын Падшаһлығы һагда хош мүждәни өјрәнәҹәксиниз. Һәмчинин онун коррупсијаны неҹә арадан галдыраҹағы барәдә әтрафлы мәлумат алаҹагсыныз (Лука 4:43). Биз сизи әразиниздә јашајан Јеһованын Шаһидләри илә әлагә сахламаға вә ја jw.org адлы рәсми веб-сајтымыза дахил олмаға дәвәт едирик. ▪