18 ЈАНВАР 2023-ҹү ил, чәршәнбә ҝүнү jw.org сајтында хүсуси бир елан јерләшдирилди: Гејҹ Флигл вә Ҹефри Виндер гардаш Јеһованын Шаһидләринин Рәһбәрлик Шурасынын јени үзвләри тәјин олундулар. Гардашларын һәр икиси узун илләрдир Јеһоваја сәдагәтлә хидмәт едир.

Гејҹ Флигл гардаш АБШ-нин Пенсилванија штатынын гәрбиндә Јеһоваја ибадәт едән бир аиләдә бөјүјүб. О, јенијетмә оланда аиләси тәблиғчиләрә тәләбатын бөјүк олдуғу кичик шәһәрә көчүр. Бундан гыса мүддәт сонра, 20 нојабр 1988-ҹи илдә Гејҹ гардаш вәфтиз олунур.

Гардашын валидејнләри ону һәмишә тамвахтлы хидмәтә тәшвиг едирди. Онлар тез-тез евләринә рајон нәзарәтчиләрини вә бејтеллиләри дәвәт едирдиләр. Гејҹ гардаш онларын неҹә хошбәхт олдугларыны ҝөрүрдү. Гардаш вәфтизиндән чох кечмәмиш, 1 сентјабр 1989-ҹу илдә өнҹүл хидмәтинә башлајыр. Бундан ики ил сонра о, 12 јашында оларкән гојдуғу мәгсәдинә — Бејтелдә хидмәт етмәк мәгсәдинә чатыр. Гејҹ гардаш 1991-ҹи илин октјабрында Бруклиндәки Бејтелдә хидмәт етмәјә башлајыр.

Гејҹ гардаш Бејтелдә сәккиз ил ҹилдләмә сехиндә хидмәт едиб. Даһа сонра о, Хидмәт шөбәсинә тәјин олунуб. Һәмин вахтлар гардаш бир нечә ил русдилли јығынҹагда хидмәт едиб. 2006-ҹы илдә о, Надја адлы бир баҹымызла аилә гурду. Евләндикдән сонра Надја да Бејтелдә хидмәт етмәјә башлады. Онлар бирликдә португалдилли јығынҹагда вә 10 илдән чох испандилли јығынҹагда хидмәт едибләр. Узун илләр Хидмәт шөбәсиндә чалышан Гејҹ гардаш сонралар Тәлим комитәсинә, даһа сонра Хидмәт комитәсинә тәјин олунду. 2022-ҹи илин мартында исә о, Рәһбәрлик Шурасынын Хидмәт комитәсинин көмәкчиси тәјин едилди.

 Ҹефри Виндер гардаш АБШ-нин Калифорнија штатынын Мариета шәһәриндә мәсиһи аиләсиндә бөјүјүб. О, 29 март 1986-ҹы илдә вәфтиз олунуб. Елә нөвбәти ај көмәкчи өнҹүл хидмәтинә башлајыб. Бу хидмәт онун о гәдәр хошуна ҝәлиб ки, давам етдирмәк истәјиб. Гардаш бир нечә ај көмәкчи өнҹүл кими хидмәт едәндән сонра 1 октјабр 1986-ҹы илдә өнҹүл хидмәтинә башлајыб.

Ҹефри гардаш јенијетмә оланда Бејтелдә хидмәт едән ики бөјүк гардашыны зијарәт етмишди. Бу зијарәтдән сонра онун үрәјиндә Бејтелдә хидмәт етмәк истәји јаранды. 1990-ҹы илин мајында Ҹефри гардаш Волкилдәки Бејтелдә хидмәт етмәјә дәвәт олунду.

Ҹефри гардаш Бејтелдә мүхтәлиф шөбәләрдә, мәсәлән, Тәмизлик шөбәсиндә, Ферма шөбәсиндә вә Бејтел бүросунда чалышыб. О, 1997-ҹи илдә Анжела адлы бир баҹымызла аилә гуруб. О вахтдан бәри онлар Бејтелдә хидмәт едирләр. 2014-ҹү илдә Ҹефри илә Анжела Ворвикә тәјин олунду. Ҹефри гардаш орада баш идарәнин биналарынын тикинтиси ишинә көмәк етди. 2016-ҹы илдә онлар Патерсонда јерләшән Ҝөзәтчи Гүлләсинин Тәлим Мәркәзинә көчдүләр. Ҹефри гардаш орада Аудио/Видео Хидмәтләри шөбәсиндә ишләјирди. Дөрд илдән сонра исә онлар Ворвикә ҝери гајытдылар вә гардаш Кадрлар комитәси илә әмәкдашлыг етмәјә башлады. 2022-ҹи илин март ајында исә Ҹефри гардаш Рәһбәрлик Шурасынын Кадрлар комитәсинин көмәкчиси тәјин олунду.

Бизә «инсан тимсалында һәдијјәләр» вердији үчүн Аллаһымыза миннәтдарыг. Дуа едирик ки, Јеһова Падшаһлыг јолунда ҹан гојан бу гардашлара бол бәрәкәт версин (Ефес. 4:8).