«ӨНҸҮЛЛӘРӘ еһтијаҹ олан әразидә хидмәт едән достларым башларына ҝәлән мараглы һадисәләри данышанда мәндә дә бу ҹүр әразидә хидмәт етмәк истәји јаранырды. Амма горхурдум ки, буна ҝүҹүм чатмаз». Бу сөзләри 27 јашлы Силвиана адында өнҹүл баҹы дејир.

Ола билсин, Силвиананын кечирдији һиссләр сизә танышдыр. Бәлкә, сиз дә тәблиғчиләрә еһтијаҹ олан әразидә хидмәт етмәк истәјирсиниз, амма буна әлчатмаз арзу кими бахырсыныз. Одур ки, тәслим олмајын! Чүнки минләрлә баҹы-гардашымыз Јеһованын көмәји илә хидмәтләрини ҝенишләндирмәјә әнҝәл олан манеәләри мүвәффәгијјәтлә ашыблар. Ҝәлин, Јеһованын онлара неҹә көмәк етдијини өјрәнмәк үчүн Мадагаскара, бөјүклүјүнә ҝөрә дүнјада дөрдүнҹү јер тутан адаја гыса сәјаһәт едәк.

Мадагаскарын әһалиси Мүгәддәс Китаба бөјүк һөрмәтлә јанашыр. Сон 10 ил әрзиндә 11 өлкәдән * 70-дән чох тәблиғчи вә өнҹүл бураја тәблиғ етмәјә ҝәлмишдир. Јерли тәблиғчиләрдән бәзиләри дә мүждәни бу бөјүк аданын һәр јанына јајмаг үчүн тәшәббүс ҝөстәриб өз евләриндән узаға көчүбләр. Ҝәлин бу баҹы-гардашлардан бир нечәси илә таныш олаг.

Отуздан јухары јашлары олан Луиз вә Перин ҹүтлүјү Франсадан Мадагаскара көчүб. Бураја көчмәздән әввәл онлар башга өлкәдә хидмәт етмәк барәдә бир нечә ил фикирләшибләр. Амма Перинин горхулары онлары сахлајырды. Перин дејир: «Мән јад јерә көчмәјә чох горхурдум. Гоһумлары, јығынҹағы, евимизи, јашадығымыз әразини вә өјрәшдијимиз һәјат ритмини гојуб ҝетмәк фикри мәни тәлаша салырды. Јолумузу кәсән ән бөјүк манеә мәним бу горхуларым иди». Нәһајәт, Перин ҹәсарәтини топлајыб ирәли ҝетмәк гәрарына ҝәлди вә 2012-ҹи илдә онлар Мадагаскара көчдүләр. Ҝөрәк вердији гәрарла бағлы Перин нә дејир: «Бу гәрары вермәклә биз Јеһованын әлини өз үзәримиздә һисс етдик, иманымыз мөһкәмләнди». Луиз әлавә едир: «Тәсәввүр едирсиниз, Мадагаскарда иштирак етдијимиз илк анма мәрасиминә  Мүгәддәс Китаб дәрси кечдијимиз шаҝирдләрдән 10-у ҝәлмишди».

Бәс проблемләр баш галдыранда бу ҹүтлүјә хидмәтләрини давам етдирмәјә нә көмәк етмишди? Онлар Јеһоваја јалварыб дөзмәк үчүн ҝүҹ истәјирдиләр (Филип. 4:13). Луиз дејир: «Биз Јеһованын дуаларымызы ешитдијини, бизә Өз сүлһүнү вердијини һисс едирдик. Онун көмәји илә диггәтимизи хидмәтин ҝәтирдији севинҹә ҹәмләјә билирдик. Франсадакы достларымыз да мәктублар, месажлар ҝөндәриб бизи тәслим олмамаға тәшвиг едирдиләр» (Филип. 4:6, 7; 2 Кор. 4:7).

Јеһова Луизлә Перинә ҝөстәрдикләри дөзүмүн әвәзиндә ҝөзәл мүкафат верди. Луиз дејир: «Биз 2014-ҹү илин октјабр ајында “Әр-арвадлар үчүн Мүгәддәс Китаб Мәктәби”нә * дәвәт алдыг. Бу мәктәб Јеһованын бизә әвәзсиз һәдијјәси иди». Мәктәбдән сонра Луиз вә Перин Мадагаскара тәјинат алды.

Дидја вә Надин ҹүтлүјү 2010-ҹу илдә Франсадан Мадагаскара көчәндә јашлары 50-ни һагламышды. Дидја дејир: «Ҹаван оланда биз өнҹүл кими хидмәт едирдик, сонра үч ушаг бөјүтдүк. Ушагларымыз һәдди-бүлуға чатандан сонра фикирләшдик ки, хидмәт етмәк үчүн башга өлкәјә көчәк». Надин дејир: «Етираф едим ки, өвладларымдан ајры дүшәҹәјими тәсәввүр едәндә бу фикирдән ваз кечмәк истәјирдим. Амма бир дәфә ушаглар бизә деди: “Тәблиғчиләрә еһтијаҹ олан өлкәјә көнүллү кими көчсәниз, сизинлә фәхр едәрик!” Онларын бу сөзләри бизә гол-ганад верди вә биз бураја көчдүк. Һазырда ушагларымыздан узагда јашасаг да, севинирик ки, онларла тез-тез данышмаг имканымыз вар».

Бу әр-арвад үчүн малагаси дилини өјрәнмәк чәтин иди. Надин ҝүлүмсәјәрәк дејир: «Ахы бизим о јашымыз дејил, биз даһа 20 јашындакы Дидја вә Надин дејилик». Бәс онлар бу чәтинлији неҹә ашдылар? Әввәл-әввәл онлар франсыздилли јығынҹаға ҝедирдиләр. Амма өзләрини јерли дили өјрәнмәјә һазыр һисс едәндә малагасидилли јығынҹаға кечдиләр. Надин дејир: «Тәблиғдә растлашдығымыз инсанларын чоху Мүгәддәс Китабы өјрәнмәјә һәвәслидир. Онлара баш чәкдијимиз үчүн чох вахт бизә миннәтдарлыгларыны билдирирләр. Тәзә-тәзә мәнә елә ҝәлирди ки, јуху ҝөрүрәм. Бурада өнҹүл кими хидмәт етмәк мәнә бөјүк севинҹ јашадыр. Сәһәр јухудан ојананда өз-өзүмә дејирәм: “Нә ҝөзәл, бу ҝүн тәблиғә ҝедирәм!”»

Дидја ҝүлүмсәјәрәк малагаси дилини тәзә өјрәндикләри вахты јадына салыр: «Бир дәфә ҝөрүшү мән апарырдым, амма баҹы-гардашларын вердији ҹаваблары баша дүшмүрдүм. Ҹавабдан сонра анҹаг “чох сағ ол” дејә билирдим. Бир баҹыја ҹавабына ҝөрә миннәтдарлығымы билдирәндән сонра онун архасында отуранлар мәнә ишарә етдиләр ки, ҹаваб дүз дејил. Мән дүзҝүн ҹавабы алмаг үчүн дәрһал башга гардаша сөз вердим. Үмид едирәм о, доғру ҹаваб вермишди».

2005-ҹи илдә кечирилән топлантыда ҝөстәрилән «Аллаһы иззәтләндирән мәгсәдләрә ҹан атын» адлы тамаша Терри вә һәјат јолдашы Надјаја ҝүҹлү тәсир бағышламышды. Тимути барәдә олан бу тамаша онларын тәләбат олан әразидә хидмәт етмәк арзусуну даһа да аловландырмышды. Терри дејир: «Тамаша битиб алгышлар сәсләнәндә јолдашыма тәрәф әјилиб дедим “Биз һара ҝедирик?” Сән демә, һәмин ан Надја да бу барәдә дүшүнүрмүш». Топлантыдан сонра онлар гаршыларына гојдуглары мәгсәдә чатмаг үчүн конкрет аддымлар атмаға башладылар. Надја дејир: «Јаваш-јаваш әшјаларымызы азалтдыг, ахырда ҹәми дөрд чамадан әшјамыз галды».

Беләҹә, онлар 2006-ҹы илдә Мадагаскара көчдүләр. Бурада хидмәт етмәк елә илк ҝүндән онларын хошуна ҝәлди. Надја тәәссүратларыны бөлүшүр: «Бурадакы инсанлар бизә чохлу севинҹ бәхш едир».

Амма алты илдән сонра бу ҹүтлүк чәтин бир вәзијјәтлә гаршылашды. Надјанын анасы Мари-Мадлен јыхылыб ајағыны сындырды вә башындан зәдә алды. Надја илә әри һәкимлә мәсләһәтләшәндән сонра она Франсадан онларын јанына көчмәји тәклиф етдиләр. Һәмин вахт 80 јашында олмасына бахмајараг, Мари-Мадлен баҹы тәклифи севә-севә гәбул етди. Бурадакы һәјаты илә бағлы о дејир: «Һәрдән ујғунлашмаг чәтин олур, амма мәһдуд имканларыма бахмајараг, јығынҹагда өзүмү чох лазымлы һисс едирәм. Мадагаскара көчмәјимдә мәни ән чох севиндирән исә өвладларымын бурадакы хидмәтләрини давам етдирмәсидир».

22 јашлы Рин гардаш Мадагаскарын шәргиндә јерләшән барлы-бәһәрли Алаотра-Мангоро бөлҝәсиндә бөјүјүб. Мәктәбдә јахшы охудуғу үчүн о, али тәһсил алмаг истәјирди. Амма Мүгәддәс Китабы өјрәнәндән сонра фикрини дәјишди. Рин дејир: «Орта мәктәби даһа тез гуртармаг үчүн вар ҝүҹүмлә чалышырдым. Јеһоваја сөз вермишдим ки, јекун имтаһандан кечсәм, өнҹүл хидмәтинә башлајаҹағам». Мәктәби гуртарандан сонра Рин вердији сөзү тутду. О, бир өнҹүл гардашын јанына көчдү, јарымҝүнлүк иш тапды вә өнҹүл хидмәтинә башлады. О дејир: «Бу, һәјатымда вердијим ән доғру гәрардыр».

Амма Рин гардашын гоһум-әгрәбасы онун бу гәрарыны, јәни нәјә ҝөрә тәһсилини давам етдирмәдијини баша дүшә билмирди. О дејир: «Атам, әмим, ата нәнәмин баҹысы тәкид едирдиләр ки, али тәһсил алым. Амма нәјинсә мәни өнҹүл хидмәтиндән сахламасыны истәмирдим». Бундан гыса мүддәт сонра Рин тәләбат олан әразијә көчмәк истәјир. Бу истәјин јаранмасына нә сәбәб олмушду? О дејир: «Бир ҝүн јашадығымыз евә оғрулар ҝирди. Әшјаларымын чохуну оғурламышдылар. Бу һадисә мәни Исанын “хәзинәнизи ҝөјдә топлајын” сөзләри үзәриндә дүшүнмәјә вадар етди. Гаршыма мәгсәд гојдум ки, бүтүн ҝүҹүмү руһани сәрвәт топламаға сәрф едим» (Мәт. 6:19, 20). Рин јашадығы јердән 1300 километр аралыда јерләшән гураг әразијә, өлкәнин ҹәнуб сәрһәдинә көчдү. Бу әразидә Антандрој адланан етник група мәнсуб инсанлар јашајыр. Нәјә ҝөрә Рин мәһз бураја көчдү?

Һәмин оғурлуг һадисәсиндән бир ај әввәл Рин гардаш Антандројдан олан ики киши илә Мүгәддәс Китаб дәрси башламышды. Рин онларын дилиндә бир нечә сөз өјрәнмишди. Падшаһлыг һаггында мүждәни ешитмәјән Антандрој ҹамааты онун ағлындан чыхмырды. О дејир: «Јеһоваја дуа едирдим ки, мәнә тандројдилли әһалинин јашадығы әразијә көчмәјә көмәк етсин».

Рин көчәндән дәрһал сонра даһа бир чәтинлик јашады. О, һеч ҹүр иш тапа билмирди. Бир киши она демишди: «Сән нијә бура көчмүсән? Буранын ҹамааты иш тапмаг үчүн сән ҝәлдијин јерә ҝедир». Ики һәфтәдән сонра Рин топлантыја ҝедир. Ҹибиндә гәпији галмадығы үчүн о, нараһат иди. Топлантынын сонунҹу ҝүнү бир гардаш онун ҹибинә нә исә атыр. Рин баханда ҝөрүр ки, ҹибиндә пул вар. Бу пулла о, нәинки Антандроја ҝери гајыдыр, һәтта өз кичик бизнесини ачыр, гатыг сатмаға башлајыр. Рин дејир: «Јеһова дүз вахтында мәнә көмәк еләди. Бунун сајәсиндә мән хидмәтими давам етдирә, Јеһова Аллаһ һаггында ешитмәк шансы олмајан инсанлара көмәк едә биләрдим». Орадакы јығынҹагда да иш аз дејилди.  Рин дејир: «Мәнә һәр һәфтә мәрузә илә чыхыш етмәк тапшырылмышды. Јеһова Өз тәшкилаты васитәсилә мәнә тәлим верирди». Рин бу ҝүн дә тандрој дилиндә данышан инсанлара Падшаһлыг һагда мүждәни чатдырыр.

Әшија 65:16 ајәсиндә јазылыб: «Дүнјада өзүнә хејир-дуа диләјән һәр кәс Һагг Аллаһынын ады илә диләјәҹәк». Хидмәтини ҝенишләндирмәк үчүн вар ҝүҹү илә чалышанлар Јеһованын хејир-дуасыны алырлар. Ҝәлин мәгаләнин әввәлиндә ады чәкилән Силвиана баҹынын һәјатында бунун неҹә баш вердијини ҝөрәк. Јадыныздадырса, о демишди ки, тәләбат олан әразидә көнүллү кими хидмәт етмәјә ҝүҹүнүн чатмајаҹағыны фикирләшиб бу аддымы атмаға горхурду. Бәс буна сәбәб нә иди? О дејир: «Мәним сол ајағым сағ ајағымдан 9 сантиметр гысадыр. Буна ҝөрә дә мән ахсаја-ахсаја јеријирәм вә тез јорулурам».

Бу манеәјә бахмајараг, Силвиана 2014-ҹү илдә јығынҹагларындан олан Силви Анн адлы ҹаван өнҹүл баҹы илә бирҝә евләриндән 85 километр аралыда јерләшән кичик бир кәндә көчдү. Беләҹә, Силвиананын арзусу чин олду вә о, Јеһовадан ҝөзәл бир һәдијјә алды. Силвиана дејир: «Бура көчәндән ҹәми бир ил сонра Мүгәддәс Китаб дәрси кечдијим Доратин адлы ҹаван бир ана рајон топлантысында вәфтиз олду».

Бу көнүллүләрин дә һәјатындан ҝөрүндүјү кими, биз манеәләри ашыб хидмәтимизи ҝенишләндирәндә Јеһованын Әшија 41:10 ајәсиндә вердији вәди өз үзәримиздә һисс едирик. Ајәдә дејилир: «Сәнә гүввәт верәҹәјәм, сәнә көмәк едәҹәјәм». Бунун сајәсиндә Јеһова илә достлуғумуз мөһкәмләнир. Бундан әлавә, һәм өз јашадығымыз јердә, һәм дә башга өлкәдә көнүллү кими хидмәт етмәклә өзүмүзү Ҹәннәтдә бизи ҝөзләјән јени тапшырыглара һазырлајырыг. Јухарыда ады чәкилән Дидја гардаш бунунла бағлы белә дејир: «Тәләбат олан әразидә хидмәт етмәк ҝәләҹәјә һазырлашмаг үчүн бир тәлим курсудур». Арзу едирик ки, тезликлә даһа чох көнүллү бу тәдрис програмына гошулсун!