Niyakejjay Diosajj tʼaqesiñanakat jan juchanïkchejja, ¿khitis juchanïpacha? ¿Kunatsa jaqenakajj manqʼatjam jiwasipki jan ukajj wali pisin jakasipjje? ¿Kunatsa guerranakasa, usunakasa, terremotonakasa, yaqha ukham jan waltʼäwinakas oraqen utji? Bibliajj kunatsa tʼaqesiñanakajj utji uk kimsa toqetwa qhanañchi.

1. Jaqenakajj jupanakatakik kuns muniri, uñisiri ukhamäpjjewa. ‘Jaqejj chʼamanïtapatwa masinakaparu jan walinak luri’ (Eclesiastés 8:9). Jaqenakan jan sinttʼasirïpjjatapata, jupanakatakiki taqe kuns munirïpjjatapatwa jilaparte jaqenakajj tʼaqesipjje.

2. Taqeniw jan waltʼäwinakan uñjastanjja. ‘Jan waltʼañ horasajj taqeniruw puri’ sasaw Bibliajj yatichi (Eclesiastés 9:11). Awisajj jan wali lugarankatasatwa kuna jan walinsa uñjassna. Jan ukajja, jan amuytʼasis kun luratasatwa jan walin uñjasiraksna.

3. Jan sinttʼasiri mä angelaw akapach apnaqaski. Khitis tʼaqesiñanak utjayi uk aka qhana arunakampiw Bibliajj yatichi: “Akapachajj Supayan amparapankiwa” sasa (1 Juan 5:19). Supayajj wali chʼamani mä angelawa, jupajj qalltan mä suma angeläkchïnsa, ‘kunatï cheqäki ukatwa saranuküna’ (Juan 8:44). Yaqha angelanakarakiw jan wali munañanakapamp apayasisajj Supay toqet saytʼasipjjäna, ukhamatwa demonionakar tukupjje (Génesis 6:1-5). Uka tiempot aksaruw Supayasa demonionakasa, kunayman jan walinakampi jaqenakar tʼaqesiyapjje. Yamas jichha tiemponjja, jukʼampiw jaqenakar tʼaqesiyasipki. Supayajj wali colerataw aka “oraqen jakirinakar engañjaski”, ukatwa Bibliajj akham qhanañchi: “Oraqesa lamar qotasa ¡ay kunakïkani!” sasa (Apocalipsis 12:9, 12). Supayajj jan sinttʼasiri, jaqenakan tʼaqesitanakapat kusisiri ukhamawa. Jupaw tʼaqesiñanakat juchani, janiw Diosajja.

AK AMUYTʼAM: Jan sinttʼasiri qala chuymani mä angelakiw jaqenakar wal tʼaqesiyaspa. Diosajj janiw ukhamäkiti, ‘Jupajj munasiñawa’ sasaw Bibliajj yatichi (1 Juan 4:8). Ukhamajj janipuniw cheqpach Diosajj “kuna jan walsa lurkaspati, janirakiw kunatejj jan cheqapäki uksa lurkaspati” (Job 34:10).

Inas akham jisktʼasta: “¿Kunapachas Diosajj jan sinttʼasiri Supayan apnaqäwip chhaqtayani?” sasa. Kunjamtï uñjawayktanjja, Diosajj jan walinak uñisiwa, tʼaqestan ukhajja, Jupajj tʼaqesirakiwa. Ukatwa Diosan Arupajj akham ewjjtʼistu: “Taqe llakinakam jupan amparapar katuyapjjam, jupajj kunatï jumanakar pasapktam ukanakat wal llakisi” sasa (1 Pedro 5:7). Diosajj taqe chʼamaniwa, wal munasirakistu, ukatwa mä jukʼa tiempot tʼaqesiñanak chhaqtayjjani, uka toqetwa jutïr yatichäwin yatjjataskañäni. *