Bibliajja, Job chachat akham siwa: “Jupasti aski, cheqa jaqënwa” sasa (Job 1:1). Lot chachatjja, akham sarakiwa: ‘Aski chacha’ sasa (2 Pedro 2:8). Ukat David chachatjja, “luratanakapasti cheqapänwa” Diosan nayraqatapanjja, sasaw saraki (1 Reyes 14:8). Ukhamajj uka chachanakat sumpach yatjjatañäni. Kunanakansa pantjasipjjäna, kunjamsa sarnaqäwipajj yanaptʼistaspa, ukat kunjamsa jucharar jaqëkasas Diosar kusisiysna ukanakatwa yatjjatañäni.

Job chachajj kunayman jan waltʼäwinakan uñjasïna, ina chʼusatsa tʼaqheskaspa ukham amuyäna. Ukatwa Diosar istʼañajj janis sinti wakiskaspa ukham amuyjjäna (Job 9:20-22). Ukat wali aski jaqëkaspas ukham amuyasïna. Jupar istʼapkäna uka chachanakajja, Diosat sipans jukʼampi cheqapätaps amuyaskaspa ukham amuyapjjäna (Job 32:1, 2; 35:1, 2, NM).

Lot chachajj janiw Diosajj kuntï siskän ukarojj jankʼak istʼkänti. Sodoma ukat Gomorra  markankir jaqenakajj jan wali luririnakäpjjänwa. Lot chachatakejj ukham luratanakapajj janiw walïkänti, ukatwa “wali llakisirïna” (2 Pedro 2:8). ‘Uka markankir jaqenakarojj tʼunjäwa, jumatï familiamar qhespiyañ munsta ukhajja, aka markat sarjjapjjañamawa’ sasaw Diosajj jupanakar säna. Jankʼakiw istʼañapäna, ukampis Lot chachajj janiw utap jaytañ munkänti. Qhepatjja, Diosan angelanakapaw, amparapat katjjarusin uka markat irpsjjäna (Génesis 19:15, 16).

David chachajj jañchin munañapampi apayasisajja, mä casarat warmimpiw ikintasïna, ukhamatwa juchar purtʼasïna. Ukampis janiw ukak lurkänti, uka warmin chachapampi jan katjayasiñatakejja, jiwayapjjañapatakiw khitäna (2 Samuel 11 jalja). Bibliajj akham siwa: “Davidan luratanakapajj Tatitutakejj janiw askïkänti” sasa (2 Samuel 11:27).

Uka kimsa chachanakajja, walja kutiw pantjasipjjäna, ukat yaqhep juchanakapajj sinti jan walïnwa. Ukampis taqe chuymaw Diosar istʼañ munapjjäna. Ukat juchanakapat arrepentisipjjänwa, jan wali jakäwipsa jaytapjjarakïnwa, ukajj Diosar wal kusisiyäna. Ukham lurapjjatapatwa Bibliajj jupanakat iyawsäwin chachanaka sasin qhanañchi.

Cheqas taqeniw pantjastanjja (Romanos 3:23). Ukampis pantjasitanakasat arrepentisiñasawa, ukat Diosamp sum apasiñatakiw chʼamachasiñasa.

¿Kunjamsa Job, Lot ukat David chachanakajj Diosamp askit uñjatakïsipkäna? Diosamp cheqañchatajja, Job chachajj pantjasitapat arrepentisïnwa (Job 42:6). Lot chachasti, Diosjamarakiw Sodoma ukat Gomorra markanakan  qʼañu luräwinakap jan walit uñjäna. Ukampis utap janiw jaytirjamäkänti. Qhepatjja Diosar istʼänwa, jan qhepar uñtasaw uka markat mistjjäna. David chachajja, Diosan leyip pʼakintkchïnsa suma chuymanïtapwa uñachtʼayäna. Taqe chuymaw juchapat arrepentisïna, perdonayasiñatakis walirak Diosar achiktʼasïna (Salmo 51).

Pantjasir jaqëtas Diosajj sum yati. Ukatwa, kuntï uka chachanakat amuykäna uk jan mayjtʼaykänti. Jupajj janiw kuntï jan phoqerjamäktan ukanak maykistuti, ‘jiwasanakan laqʼätas yatiwa, ñeqʼet luratäpjjatas yatirakiwa’ (Salmo 103:14). Ukhamajj ¿kunsa jiwasanakat mayistu?

Davitajj kuntï yoqapar siskäna ukaw qhanañchistu. Jupajj akham sänwa: “Juma Salomón munat wawajjasti, uñtʼätawa awkimana Diosaparu, ukatsti taqe chuymarakiwa jupar servïta” sasa (1 Crónicas 28:9). Diosar taqe chuyma serviñajj ¿kamsañs muni? Jupar taqe chuyma munasiña, Jupar uñtʼañ munaña, ukat mayitanakapar phoqaña sañ muni, ukampis janiw jan pantjasiña sañ munkiti. Diosar taqe chuyma servirejja, ewjjtʼanakaparjamaw sarnaqe, cheqañchäwipsa taqe chuymaw katoqasiraki. Ukham chuymanïtapatwa, Diosajj Job chachat akham säna: “Aski, cheqa jaqënwa” sasa. Lot chacharusti, ‘aski chacha’ sarakïnwa. Ukat Davitatsti akham sarakïnwa: “Luratanakapasti cheqapänwa” sasa. Jupanakajj pantjasipkchïnsa, Diosar kusisiyapjjänwa.

Jan wali amuyunak pʼeqesar jutani, jan wali arunaksa arschiñäni, jan ukajj kuna jan walsa lurchiñäni ukhajja, janiw aynachtʼañasäkiti. Uka kimsa chachanakan sarnaqäwipat amtasajj chʼamachasiskakiñasawa. Diosajj pantjasirïtas yatiwa, ukampis taqe chuyma loqtsna ukwa Jupajj muni, mä arunjja, Jupar munassna, ukat Jupar istʼañatak chʼamachassna, uk muni. Ukhamti lurañänejja, Jupajj kusisiniwa.