Jesusajj waljaniruw milagro lurasin manqʼayäna, uk uñjasajj jaqenakajj wal musparapjjäna, akham sapjjarakïnwa: “Cheqpachansa jupajj akapachar jutañapäkäna uka [Mesías] Profetawa” sasa. Sumwa apnaqaspa sasaw sapjjarakïna (Juan 6:14; Deuteronomio 18:18). Ukatwa jupar reyit uttʼayañ amtapjjäna.

Jesusajj kuntï jaqenakajj lurañ amtapkäna uk amuyasajja, jaqenakarojj khitanukjjänwa, discipulonakaparusti boter sarjjapjjam sarakïnwa. ¿Kawkirus jichhajj sarapjjañapäna? Betsaida pasasajj Capernaúm markaruw sarjjapjjañapäna. Jesusasti uka arumajja, mä qolluruw oración lurir sapak saräna.

Janïr qhanjtankäna ukhaw Jesusajj phajjsi qhanan boter jayat uñjäna. Uka arumajj wal thaytʼanïna, oladanakas wal sartarakïna. Apostolonakajj ‘jupanak contra thayan wal thaytʼanitap laykojj botempiw chʼam tukusipkäna’ (Marcos 6:48). Jesusajj qollut saraqasaw uma patjjnam jupanakan ukar saräna. Ukhakamajj “niya phesqa jan ukajj sojjta kilometronak[wa] botet sarasipkäna” (Juan 6:19). Discipulonakasti Jesusar jakʼachasinir uñjasajj akham sasaw ajjsarañat wararipjjäna: “¡Jaqjamakiw jutaski!” sasa (Marcos 6:49).

Jesusajj chuymachtʼañatakejj sänwa: “Nayäsktwa, jan ajjsarapjjamti” sasa. Pedrojj sarakïnwa: “Tata, jumästa ukhajja, uma patjjnam jutam sita” sasa. Jesusasti “¡jutam!” sasaw säna. Pedrosti botet saraqasajj uma patjjnamwa Jesusan ukar saräna. Ukampis Pedrojj thayar uñtäna ukhajja, wal sustjasïna, ukatwa umar niy chhaqaranttäna. Akham sasaw artʼarakïna: “Tata, waystʼasita” sasa. Jesusajj amparap loqtasaw Pedror waythapïna, ukatsti sarakïnwa: “Diosar jan taqe chuym confiyir jaqe, ¿kunatsa pächasta?” sasa (Mateo 14:27-31).

Pedrompi Jesusampejj boter sarjjatapjjäna ukhajja, thayajj tʼakurjjänwa. Discipulonakapajj wal musparapjjäna, Jesusaruw akham sas jachʼañchapjjarakïna: “Jumajj Diosan Yoqapäskapuntawa” sasa. Ukampis janiw ukham musparapjjañapäkänti, ¿kunatsa? Jesusajj uka nayrakiw milagro lurasajj waljanir manqʼayäna. Jupanakatï “tʼantʼanakat milagrojj luraskäna ukajj kunsa uñachtʼayi” uk amuyapjjaspäna ukhajja, Jesusan uma patjja sarnaqatapatsa thayar tʼakurayatapatsa janiw ukham musparapkaspänti (Mateo 14:33; Marcos 6:52).

Jupanakajj Capernaumat aynach toqenkiri Genesaretaruw puripjjäna, uka markajj frutanakani suma chʼojjña markänwa. Qota lakar bote saytʼayasaw waña oraqer mistupjjäna. Jaqenakajj Jesusätap amuyasajj taqe lugarat tantachasipjjäna, jupan ukarusti usutanakwa apanipjjarakïna. Jupanakajj Jesusan patjja isip llamktʼasakiw usunakapat qollatäpjjäna.

Ukañkamajja, Jesusar tʼantʼat milagro lurir uñjirinakajj Jesusan sarjjatap amuyasipjjäna. Ukatwa Tiberíades markat puriniri botenakar sarjjatasajj Capernaumar arktapjjäna. Jesusan ukar purisajj akham sasaw sapjjäna: “Rabí, ¿kunapacharak akar purintasti?” sasa (Juan 6:25). Jutir yatichäwinjja, kunatsa jupanakar Jesusajj toqenoqäna uka toqet yatjjatañäni.