Quiñeque che rume huesalcalu tañi mongen alüñmaquei ñi quiñepülecünuhual tañi huesa femquen. Iñche femngechi femürpun. Choyüngen ca tremün Barcelona meu, quiñe fütra huaria España meu. Ñi pu che engün mülefuiñ Somorrostro, quiñe fütra lof itrotripa ti lafquen meu. Tüfachi huaria quimngequefui ñi mülequen hueñen dungu ca ñi fendengequen droga.

 Tañi chau ñuque engu cayu fotüm ca cüla ñahue niei, iñche tati hunen. Fütra fillalefulu cai iñchiñ pichi huentrungen müten, fei tañi chau huercüeneu cüdahual ñi huiñoleltuafiel ti pelota pu aucantuquefulu tenis. 10 tripantu müten niefulu cüdahurpun mari ora fill antü. Feimu pepi amulan colegio meu chumngechi ñi femquefel tañi pu chaf compañ. 14 tripantu nielu iñche, conün ñi cüdahual quiñe taller mu cheu ñi deumangequeel fillque chemcün pañillhue mu.

 España meu huercüngeiñ com pu hueche conal servicio militar mu, feimu 1975 tripantu mütrümngen ñi amual. Duamniefun doi dungu femürpual tañi afmatuaeteu mongen meu, fei eluhun ca ñi conal tati Legion española pingechi troquiñ hueichafe meu mülelu Melilla huaria, tüfa picun África meu mülei ngen-ngelu España. Feichi mu doi eluhun ñi drogatual ca putual.

 Tripalu iñche tati Legion española meu, huiñotun Barcelona mu fei trahuiyiñ caquelu hueche engün taiñ hueñeal. Chem rume hueñequefuiñ, femngechi ngillayal droga. Ca eluhun ñi drogatual LSD ca anfetamina, fei re mongelerpun ñi putucahual, femal cudumuhun dungu ca aucantual plata mu. Com ñi femürpuel yeeneu ñi pofolcahual. Rumel miyahulquefun quiñe pichi toqui, quiñe cuchillu, ca quiñe machete, fei eluucülefun ñi püneafiel duamniefuli.

 Quiñe rupa tañi pu compañ engün eluhuiyiñ taiñ hueñeal quiñe auto fei pu soltau inantucueiñmu. Quiñe pelicula reque. 30 kilometro peno inayahuleiñmu pu soltau, fei eluhuingün taiñ tralcatuaeteu. Af meu, troncürpuiñ, fei lefmahuiyiñ. Quimtuculu müten tañi chau eluhui tañi huemünentuaeteu ñi ruca mu.

 Feimu quechu tripantu mülerpun calle mu. Umautuquefun lepün fillque edificio mu, fillque camion, huancu parque meu ca fillque eltun meu. Quiñeque mufü antü cütu mülerpufun quiñe lolo meu. Re nampiyauquefun, “mongeleli cam layefuli rume, inei no rume ngüneduamlayafeneu” piquefun. Droga ñi duam mu catrüñmaquefun tañi cuhu ca lipang cütu. Fantepu mu quimfali tañi allfen em.

 28 tripantu nielu iñche, tañi ñuque yepatueneu, “füreneen, huiñotunge taiñ ruca meu” pieneu. “Felei” pifiñ “cüme elcünutuan ñi mongen” feipicünufiñ, huelu alüñman ñi femürpual tañi feipin.

 Quiñe nagantü pu Dunguquelu Inei Ngen Jehová rupaingün tañi ruca meu. Petu ñi allcütufiel engu, tañi chau huirareneu “racümtuculelfinge ti puerta” pi, huelu nüngayeleneu ñi feipingeal chem tañi femal cam femnoal feimu eluulan ñi femal tañi feipieteu. Tüfa engu pengeleleneu cüla pichique lifru, ayühun meu llohuñmafiñ ca ramtufiñ “¿cheu trahuqueimün?”. Rupan mu quiñeque antü, amun ti Trahunhue Ruca mu.

 Tati hunelu ñi ngüneduamfiel ñi cüme tucutuucülen com pu che aculu tüfei meu. Huelu iñche fütra alüfui ñi lonco, muñ-muñ payun niefun ca huesaque tacun tucutuucülefun. Quimfali ñi trürcülenon feichi che mu, feimu huecuntu mülenagün. Huelu perumefiñ ta Juan, cuifi hueniyeufuyu, quiñentrür hueñequefuiñ tañi pu compañ engün, ¡afmatulehuen! ¡Rume cüme tucutuucülei! Fei hula quimün, Dunguquelu Inei Ngen Jehová ngetui, quiñe tripantu rupauyefui. Tufa yafültucueneu ñi conpual ti Trahunhue Ruca meu. Feichi mu cacünutun ñi mongen.

 Eluhun ñi chillcatulelngeal Biblia, fei pürüm müten ngüneduamün: duamfali ñi pofolcaunoal ca lif mongen yenietual femngechi ñi ayühulafiel ta Ngünechen. Cüdaungefui ñi femal. Duamniefun “hue raquiduam” nietual ca cüme elcünutual tañi mongen, femngechi ñi tuteafiel ta Jehová (Romanos 12:⁠2). Chau Dios cutranduamyechequei, tüfa yafülduameleneu. Rume huesalcaquefun ñi mongen meu, huelu feingelu rume Ngünechen com elueneu ñi cüme elcünutual ñi mongen. Puhui tañi piuque mu com ñi quimürpuel Jehová meu. Quimtucun ñi mülen Ngünechen, taiñ deumaeteu iñche duamnieneu (1 Pedro 5:⁠6, 7).

 Com tüfa quellueneu ñi cüme elcünutual tañi mongen. Quiñe rupa petu ñi chillcatulelngen chem ñi feipilen Biblia pütremtun dungu meu, raquiduamün: “Jehová ayüniei iñche ñi liftuucüleal com ñi mongen meu, fei com tüfachi pütrem ngehuequilpe tañi mongen meu” pin (2 Corintios 7:⁠1). Com quiñepülecünufiñ.

 Cafei duamniefun drogatuhuenoal ca fendehuenoal ti droga. Tüfa doi cüdaungefui iñche mu. Fei ñi femürpual tüfa duamniefun elcünual tañi pu hueni, quisu engün quellurpulayafeneu ñi hueniyeafiel ta Jehová. Rupalu ta antü doi maneluhurpun Ngünechen mu ca tañi pu hue hueni trahunche mu. Fei tüfa rüf duamtueneu ca piuqueyerpueneu engün, turpu femngechi femngelafun cuifi. Rupalu quiñeque cüyen, elcünun com tati droga ca “hue mongen” reque nietun ñi ayühulafiel ta Jehová (Efesios 4:⁠24). Agosto 1985 tripantu mu fautizahun ñi dungual inei ngen Jehová.

 Tati Biblia elueneu reque hue mongen. Quellueneu ñi elcünual feichi huesa mongen, ñi huesalcanoaeteu tañi cuerpo ca raquiduam. Doi 30 tañi pu hueni meu larqueingün sida pingechi cutran meu cam caquelu cutran droga ñi duam mu. Rume mañumcülen inaniefiel Biblia ñi ngülam, fente huesa mongen niehuelan fantepu mu.

 Tati pichi toqui ca pu cuchillu ñi miyahulquefel pofolcahun-ngechi huentru ngefulu miyahulhuetulafiñ. Rüfcünu llemai raquiduamquelafun rume ñi elcünuafiel com feichi fillem, huelu feula ñi miyahulafiel quiñe Biblia ñi quellucheal. Famülque mu fentren antü tañi domo iñchiu amuldunguquefiyu pu che.

 Tañi chau ca ñuque conquelai pu Dunguquelu Inei Ngen Jehová, huelu feipingu iñche tañi rume quellueteu Biblia. Tañi chau incañquefui cütu pu Dunguquelu Inei Ngen Jehová tañi pu hueni meu, ca cüme quimniefui fente ñi quellueteu tañi religion cüme elcünutual ñi chumngen. Tañi ñuque feipiquefui: “Doi cuifi eluufulmi tami chillcatual Biblia, müna cümerqueafui”. “¡Felei llemai!” piquen iñche.

 Com ñi rupan iñche quimeltueneu, ngünamfali conal droga cam caquelu femngechi dungu ñi ayüucülerpual. Quelluafiel pu che ñi quimürpuafiel Chau Ngünechen ñi Dungu tüfaque ta rüf ayühulqueneu, tüfachi dungu montuleneu ñi mongen.