Wa naa mo si kaa o to o tsui si kɛ kane womiyo nɛ ɔ konɛ o le nihi nɛ Yehowa Odasefohi a ji, níhi nɛ wa tsuɔ, kɛ bɔ nɛ wa asafo ɔ peeɔ e níhi ha saminya. Wa he ye kaa enɛ ɔ ye bua mo nɛ o yɔse kaa mwɔnɛ ɔ, wɔ lɛ wa ngɛ Yehowa suɔmi nya ní pee. Wa ngɛ mo he wami woe kaa o ya nɔ nɛ o ná Mawu he nile, nɛ o kɛ o weku li kɛ o huɛmɛ nɛ sɛɛ níhi nɛ o ngɛ kasee ɔ a he ní, nɛ o kɛ wɔ nɛ ya Kristofohi a kpehi nɛ wa peeɔ ɔ daa.—Hebri Bi 10:23-25.

Ke o kase Yehowa he ní babauu ɔ, o ma yɔse kaa e suɔ mo wawɛɛ nitsɛ. Lɔ ɔ maa wo mo he wami konɛ mo hu o bɔ mɔde wawɛɛ nɛ o je suɔmi kpo kɛ tsɔɔ lɛ. (1 Yohane 4:8-10, 19) Se kɛ o ma plɛ kɛ je suɔmi nɛ o ngɛ kɛ ha Yehowa a kpo ngɛ o daa ligbi si himi mi ha kɛɛ? Mɛni he je nɛ ke o ye je mi bami he mlaahi nɛ Mawu wo ɔ a nɔ ɔ, mo nitsɛ o ma ná he se ɔ? Nɛ mɛni ma nyɛ maa ye bua mo konɛ o nyɛ nɛ o piɛɛ wa he kɛ pee Mawu suɔmi nya ní? Nɔ nɛ e kɛ mo kaseɔ Baiblo ɔ bua maa jɔ kaa e kɛ mo ma hla sane bimi nɛ ɔmɛ a heto ɔmɛ, konɛ o kɛ o weku ɔ nyɛ nyɛ nɛ ‘nyɛɛ to nyɛ he ngɛ Mawu suɔmi ɔ mi, nɛ́ nyɛ ná neneene wami.’—Yuda 21.

Waa kɛ bua jɔmi ngɛ mo dee nɛ́ o kase “Nyɛɛ To Nyɛ He Ngɛ Mawu Suɔmi ɔ Mi” womi ɔ konɛ o ya nɔ nɛ o le anɔkuale ɔ he níhi fuu.