Yehowa a Mawu lɛ to kekle gba si himi ɔ blɔ nya. Baiblo ɔ deɔ wɔ ke e bɔ kekle yo ɔ “nɛ e ngɔ lɛ ba ha nyumu ɔ.” Adam bua jɔ wawɛɛ nɛ e de ke: ‘Enɛ ɔ ji wu nɛ je ye wuhi a mi kɛ lo nɛ je ye helo mi.’ (1 Mose 2:22, 23) Enɛ ɔ he ɔ, Yehowa suɔ nɛ nihi nɛ a sɛ gba si himi mi ɔ nɛ a ná bua jɔmi.

Ke o sɛ gba si himi mi ɔ, eko ɔ, o ma susu kaa nɔ́ tsuaa nɔ́ maa ya nɔ pɛpɛɛpɛ. Se, ngɛ anɔkuale mi ɔ, huno kɛ e yo nɛ a suɔ a he saminya po kɛ nyagbahi kpeɔ. (1 Korinto Bi 7:28) Baiblo sisi tomi mlaahi ngɛ womiyo nɛ ɔ mi nɛ ke o kɛ tsu ní ɔ, o ma ná bua jɔmi ngɛ o gba si himi kɛ o weku ɔ mi.​—La 19:8-11.

NƆ́ NƐ BAIBLO Ɔ DE: Huno ɔ ji weku ɔ yi.​—Efeso Bi 5:23.

Ke huno ji mo ɔ, lɛɛ Yehowa ngɛ blɔ hyɛe kaa o kɛ mi mi jɔmi maa hyɛ o yo ɔ nɔ. (1 Petro 3:7) E bɔ lɛ kaa o he piɛɛlɔ, nɛ e suɔ kaa o bu o yo ɔ nɛ o suɔ lɛ. (1 Mose 2:18) E sa nɛ o suɔ o yo ɔ wawɛɛ nɛ o susu e hiami níhi a he kekle.​—Efeso Bi 5:25-29.

Ke o ji yogbayo ɔ, lɛɛ Yehowa ngɛ blɔ hyɛe kaa o maa bu o huno ɔ, nɛ o maa ye bua lɛ konɛ e nyɛ nɛ e tsu e blɔ nya ní tsumi ɔ. (1 Korinto Bi 11:3; Efeso Bi 5:33) Mo fi yi mi kpɔhi nɛ e maa mwɔ ɔmɛ a se nɛ o je o tsui mi konɛ o kɛ lɛ nɛ pee kake. (Kolose Bi 3:18) Ke o pee jã a, o he maa hi fɛu ngɛ o huno ɔ kɛ Yehowa a hɛ mi.​—1 Petro 3:1-6.

NƆ́ NƐ O MA NYƐ MAA PEE:

• Mo bi o he piɛɛlɔ ɔ nɛ e de mo nɔ́ nɛ ke o pee ɔ, o maa pee huno loo yogbayo kpakpa. Moo bu lɛ tue saminya nɛ o bɔ mɔde nɛ o tsu he ní

• Nyɛɛ to nyɛ tsui si. E ma he be loko nyɛ maa le nɔ́ nɛ ke nyɛ pee ha nyɛ sibi ɔ, nyɛ ma ná bua jɔmi

NƆ́ NƐ BAIBLO Ɔ DE: E sa nɛ o fo o he piɛɛlɔ ɔ nɔ́ mi. (Filipi Bi 2:3, 4) Moo bu o he piɛɛlɔ ɔ kaa e he jua wa, nɛ o kai kaa Yehowa ngɛ hlae nɛ e sɔmɔli a “mi mi nɛ jɔ ha nɔ tsuaa nɔ.” (2 Timoteo 2:24) “Munyu nɛ a tuɔ kɛkɛ nɛ juɛmi be mi ɔ, e yeɔ nɔ awi kaa klaate. Se ní lelɔ nya mi munyu tsaa nɔ.” Enɛ ɔ he ɔ, hyɛ o munyu tutui saminya. (Abɛ 12:18) Yehowa mumi ɔ maa ye bua mo konɛ o je mi mi himi kɛ suɔmi mi kɛ tu munyu kɛ tsɔɔ o he piɛɛlɔ ɔ.​—Galatia Bi 5:22, 23; Kolose Bi 4:6.

NƆ́ NƐ O MA NYƐ MAA PEE:

• Ke sane ko nɛ hɛdɔ ngɛ he te si ɔ, moo sɔle kɛ bi yemi kɛ buami nɛ o ná tsui si tomi kɛ juɛmi nɛ da loko o kɛ o he piɛɛlɔ ɔ nɛ susu he

• Mo susu nɔ́ nɛ o ma de, kɛ bɔ nɛ o ma plɛ kɛ de ɔ he saminya

NƆ́ NƐ BAIBLO Ɔ DE: Ke o sɛ gba si himi mi ɔ, o kɛ o he piɛɛlɔ ɔ ba ‘plɛ pee helo kake.’ (Mateo 19:5) Se kɛ ɔ, nyɛ ji nihi enyɔ, nɛ nyɛ ma nyɛ maa hɛɛ susumi ekpaekpa. Enɛ ɔ he ɔ, e sa nɛ nyɛɛ pee kake ngɛ juɛmi kɛ he numi mi. (Filipi Bi 2:2) Kake peemi he hia ke nyɛ ngɛ nɔ́ ko he juɛmi pee. Baiblo ɔ deɔ ke: “Ke o maa pee nɔ́ ko ɔ, bi ga womi, kɛkɛ e maa hi ha mo.” (Abɛ 20:18) Nyɛ ha nɛ Baiblo mi sisi tomi mlaahi nɛ kudɔ nyɛ ke nyɛ ngɛ juɛmi nɛ e he hia pee.​—Abɛ 8:32, 33.

NƆ́ NƐ O MA NYƐ MAA PEE:

• Pi níhi a he munyu kɛkɛ pɛ nɛ nyɛ maa tu, mohu ɔ, ke nɔ́ ko gba o nya a, mo de o he piɛɛlɔ ɔ

• E sa nɛ o kɛ o he piɛɛlɔ ɔ nɛ susu níhi a he kekle loko o ma o juɛmi nya si ngɛ nɔ́ ko he