Ke pi Mawu nɛ ha nɛ wa ngɛ nɔ́ nae ɔ, lɛɛ mɛni he je nɛ hwɔ nɛ nya wa, ohia ngmlikiti, ta hwumi, gbenɔ hiɔ slɔɔtohi, kɛ adebɔ mi oslaahi pɔ he wawɛɛ mwɔnɛ ɔ? Mawu Munyu nɛ ji Baiblo ɔ tsɔɔ wɔ níhi etɛ pɔtɛɛ komɛ nɛ haa nɛ adesahi naa nɔ́:

1. Nɔ Nitsɛ E Nɔ́ Mi Fomi, Hɛkɔ, Kɛ Ninyɛ. “Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.” (Fiɛlɔ 8:9) Nihi pɔɔ nɔ́ nami ejakaa a nyɛmimɛ adesahi nɛ a yi mluku, nɛ a fo ɔ mɛ pɛ a nɔ́ mi, nɛ a yi mi wa a sisiɔ mɛ.

2. Haomi Nɛ Baa Tlukaa. Adesahi pɔɔ nɔ́ nami ejakaa ‘haomi baa a nɔ tlukaa.’ (Fiɛlɔ 9:11) Nɔ́ nɛ enɛ ɔ tsɔɔ ji, nimlihi ma nyɛ ma ya je si fɔfɔɛ komɛ a mi ngɛ be nɛ sɛ mi, oslaahi ma nyɛ maa ba, aloo nihi hyɛ we a he nɔ nɛ hi nɛ a peeɔ tɔ̃tɔ̃mi hulɔ.

3. Nɔ Yayami ɔ Nɛ Ngɛ Je ɔ Kudɔe. Baiblo ɔ tsɔɔ nɔ́ tutuutu he je nɛ adesahi ngɛ nɔ́ nae ɔ. E de ke: “Je ɔ tsuo lɛɛ, nɔ yayami ɔ nɛ ngɛ lɛ kudɔe.” (1 Yohane 5:19) Jamɛ a “nɔ yayami ɔ” ji Satan Abosiami. Sisije ɔ, Mawu bɔfo ji lɛ, nɛ e ngɛ he wami hulɔ. Se “e da we si kpɛii ngɛ anɔkuale ɔ mi.” (Yohane 8:44) Bɔfo kpahi ya piɛɛ Satan he nɛ a tsɔ atua kɛ si Mawu konɛ a pee nɔ́ nɛ mɛ nitsɛmɛ a suɔ. Enɛ ɔ ha nɛ a ba pee a he daimoniohi. (1 Mose 6:1-5) Kɛ je be nɛ Satan kɛ e daimonio ɔmɛ tsɔ atua a, a ngɔ he wami nɛ a ngɛ ɔ kɛ ngɛ níhi kudɔe, nɛ a ngɛ nihi yi mi wae ngɛ je ɔ mi. Nɔ́ nɛ ngɛ nɔ yae ngɛ wa be nɛ ɔ mi ɔ maa enɛ ɔ nɔ mi. Amlɔ nɛ ɔ, Abosiami mi mi fu wawɛɛ nitsɛ “nɛ e ngɛ nihi nɛ a ngɛ zugba a nɔ hehi tsuo nɛ nimli ngɛ ɔ sisie,” nɛ enɛ ɔ ngɔ ‘Musu kɛ ba je ɔ nɔ.’ (Kpo Jemi 12:9, 12) Ngɛ anɔkuale mi ɔ, Satan ji nɔ yelɔ nɛ e yi mi wa wawɛɛ nitsɛ. Ke adesahi ngɛ nɔ́ nae ɔ, e bua jɔɔ wawɛɛ. Satan ji nɔ nɛ ha nɛ nihi ngɛ nɔ nae, se pi Mawu.

SUSU HE NƐ O HYƐ: Nɔ ko nɛ e nui nɔ́ he ha nɔ, nɛ e ji yiwutsotsɛ ɔ pɛ lɛ ma ha nɛ nihi maa hi nɔ́ nae. Se Baiblo ɔ tsɔɔ kaa “Mawu ji suɔmi.” (1 Yohane 4:8) Ngɛ anɔkuale mi ɔ, akɛnɛ Mawu ngɛ suɔmi he je ɔ, ‘e pee we yi wu tso ní, nɛ Ope ɔ pee we nɔ́ nɛ dɛ blɔ!’​—Hiob 34:10.

Se kɛ̃ ɔ, eko ɔ o ma bi ke, ‘Mawu Ope ɔ maa ngmɛ Satan yi wu tso nɔ yemi nɛ ɔ blɔ kɛ ya si mɛni be?’ Kaa bɔ nɛ wa na a, Mawu sume nɔ́ yayami, nɛ ke wa ngɛ nɔ́ nae ɔ e dɔɔ lɛ wawɛɛ. Kɛ piɛɛ he ɔ, e Munyu ɔ wo ɔ wɔ he wami ke: “Nyɛ sake nyɛ yeyeeye peemi ɔmɛ tsuo ngɔ fɔ e nɔ, ejakaa e susuɔ nyɛ he.” (1 Petro 5:7) Mawu suɔ wɔ, nɛ e ngɛ he wami nɛ e kɛ ma je nɔ́ nami kɛ dami sane nɛ a yi ɔ tsuo kɛ je, kaa bɔ nɛ munyu nɛ nyɛɛ se ɔ maa tsɔɔ.  *