Nihi Nɛ A Nuɔ He Kaa E Piɛ Mɛ Pɛ ɔ A Yibɔ Ngɛ Hɛ Mi Yae Wawɛɛ—Nɔ́ Nɛ Baiblo ɔ De
Níhi a mi hlami ko nɛ a pee ngɛ je kɛ wɛ lingmi nɛ ɔ tsɔɔ kaa, a ke a hla nihi eywiɛ ɔ, a maa na nɔ kake nɛ e nuɔ he kaa e piɛ lɛ pɛ.
“Ngɛ jeha nɛ nɔ ko ye, kɛ he nɛ e ngɛ ɔ tsuo se ɔ, e ma nyɛ maa nu he kaa e piɛ lɛ pɛ.”—Chido Mpemba, nɛ e piɛɛ nihi nɛ a nyɛɛɔ World Health Organization’s Commission on Social Connection kuu ɔ hɛ mi ɔ he ɔ lɛ de.
Nihi fuu susu kaa nihi nɛ a wa ngɛ jeha mi, aloo nihi nɛ mɛ pɛ lɛ a ngɛ ɔ pɛ ji nihi nɛ a nuɔ he kaa e piɛ mɛ pɛ. Se pi jã ji sane ɔ, mohu ɔ, nihewi kɛ yihewi, nihi nɛ a ngɛ nɔmlɔ tso mi he wami, nihi nɛ níhi yaa nɔ saminya ha mɛ kɛ nihi nɛ a sɛ gba si himi mi hu ma nyɛ maa nu he kaa e piɛ mɛ pɛ. Ke nɔ ko kɛ ni kpahi bɔɛ, nɛ e nuɔ he kaa e piɛ lɛ pɛ ɔ, e ma nyɛ maa sa e he numi kɛ e nɔmlɔ tso mi he wami nami he wawɛɛ.
Dr. Vivek Murthy nɛ e ji dɔkita nɔkɔtɔma ngɛ U.S. ɔ de ke, “He numi nɛ nɔ ko ma ná kaa e piɛ lɛ pɛ ɔ, mi kuɔ pe he numi nɛ dɛ nɛ nɔ ko ma ná kɛkɛ.” E de kɛ piɛɛ he ke: “Ke nɔ ko kɛ ni kpahi bɔɛ, nɛ e tsɔɔ e he kɛ jeɔ nihi a he ɔ, lɔ ɔ ma nyɛ maa gbe lɛ kaa bɔ nɛ ke nɔ ko nuɔ sigaleti 15 ligbi kake nɛ e ma nyɛ maa gbe lɛ ɔ.”
Nɔ́ nɛ Baiblo ɔ de
Wa Bɔlɔ ɔ sume nɛ wa tsɔ wa he kɛ je ni kpahi a he. Nɔ́ nɛ Mawu to kɛ ha adesahi ji kaa a ná huɛ bɔmi kpakpa be fɛɛ be.
Baiblo sisi tomi mlaa: “Mawu de ke: ‘E hí kaa nyumu ɔ nɔ kake too pɛ nɛ ya nɔ nɛ e hi si.’”—1 Mose 2:18.
Mawu suɔ nɛ huɛ bɔmi kpakpa nɛ hi waa kɛ lɛ wa kpɛti. E wo si kaa e maa hɛ lɛ kɛ su wa he ke wa bɔ mɔde kaa wa maa hɛ wɔ kɛ su e he.—Yakobo 4:8.
Baiblo sisi tomi mlaa: “Nihi nɛ a le kaa a hia mumi mi níhi ɔ ngɛ bua jɔmi, ejakaa a nɔ́ ji hiɔwe Matsɛ Yemi ɔ nɛ.”—Mateo 5:3.
Mawu suɔ kaa waa kɛ ni kpahi nɛ pee kake kɛ ja lɛ. Ke wa pee jã a, e ma ha nɛ wa bua maa jɔ.
Baiblo sisi tomi mlaa: “Nyɛ ha nɛ wa susu wa sibi a he konɛ wa ha nɛ wa sibi a nɔ gbagba nɛ e te kɛ ha suɔmi kɛ ní tsumi kpakpahi, nɛ́ wa ko kua wa he nya nɛ wa hii buae ɔ, . . . mohu ɔ, waa hi wa sibi he wami woe.”—Hebri Bi 10:24, 25.
Ke o suɔ nɛ o le babauu kɛ kɔ nɔ́ he je nɛ e he hia nɛ o pee níhi nɛ ma ha nɛ o be he nue kaa e piɛ mo pɛ ɔ, moo kane munyu nɛ ji “Loneliness in a World of Mass Connection.”
a The Global State of Social Connections, by Meta and Gallup, 2023.