Lohwe tsɔwitsɔwi komɛ nɛ a ngɛ kaa azã nɛ a ngɛ wo mi nɛ a mɛtɛɔ melehi a sisi ɔ peeɔ nyagba wawɛɛ kɛ haa mele kudɔli ngɛ wo ɔ nɔ. Ke lohwe tsɔwitsɔwi nɛ ɔmɛ mɛtɛ melehi a he ɔ, e ha we nɛ mele ɔmɛ nɛ a nyɛɛ saminya. Enɛ ɔ haa nɛ a puɛɔ nu nɛ a kɛ woɔ mele ɔ mi ɔ fuu. Jehanɛ hu ɔ, ke e ngɛ mi hluu ɔ, e sa nɛ a ngɔ mele ɔmɛ kɛ ba kpo nɛ a ba je lohwe tsɔwitsɔwi ɔmɛ ngɛ a he. Je mi si kpali ngɛ adebɔ níhi a he ní kasee konɛ a kɛ tsu nyagba nɛ ɔ he ní.

 Mo Susu He Nɛ O Hyɛ: Níhi a mi hlami tsɔɔ kaa wo mi boso kɛ e kɔni gagaa nɛ ɔ nyɛɔ nɛ e tsuɔ lɛ nítsɛ e he womi ɔ he. Akɛnɛ e he womi ɔ nɔ be tlotlootlo se mohu e nɔ ngmaangmaa tsɔwitsɔwi he je ɔ, azã kɛ lohwe tsɔwitsɔwi nyɛ we nɛ a mɛtɛ e he. Nu ko jeɔ e he womi nɛ ngmaangmaa a mi, nɛ nu nɛ ɔ ha we nɛ lohwe tsɔwitsɔwi ɔmɛ nɛ a mɛtɛ e he. Be fɛɛ be nɛ wo mi boso he nɔ nɛ ɔ ma kpɔ e he toto ɔ, kɛkɛ nu ɔ ehe ba e he womi ɔ nɔ ekohu.

 Je mi si kpali suɔ nɛ a hyɛ bɔ nɛ wo mi boso nɛ ɔ tsuɔ e he womi nɔ ha a nɔ kɛ pee mele sisi. Be ko nɛ be ɔ, a ngɔɔ paint ko nɛ níhi be nyɛe maa du he kɛ haa mele ɔ sisi. Se lingmi nɛ ɔ, a gu paint nɛ ɔ kɛ ní tsumi ejakaa, e kpataa lohi nɛ a ngɛ wo ɔ mi ɔ a hɛ mi. Níhi a mi hlami nɛ a pee ɔ ha nɛ a ma nya si kaa a maa pee dade pɛtɛɛ ko nɛ puɔhi ngɛ mi kɛ wo melehi a sisi, nɛ a maa ngɔ tsopa ko nɛ yi lohi awi kɛ wo puɔ ɔmɛ a mi. Lɔ ɔ se ɔ, a maa ngɔ ya ko nɛ a kɛ dade pee kɛ ha dade pɛtɛɛ ɔ he. Ke wo nyu sa tsopa nɛ ɔ he ɔ, tsopa a mi ti ɔ nɛ e peeɔ kpiãa, kɛkɛ e ha mele ɔ sisi tsuo. Ke e ngɛ mi hluu ɔ, tsopa nɛ ɔ nɛ ha mele ɔ sisi ɔ kpɔ ɔ, nɛ azã a kɛ ní kpahi nɛ mɛtɛ mele ɔ he ɔ tsuo hu kpɔ ɔ kɛ wo ɔ nyu ɔ mi. Kɛkɛ tsopa a kpale jeɔ dade pɛtɛɛ ɔ nɛ puɔhi ngɛ mi ɔ mi ekohu kɛ haa mele ɔ sisi tsuo.

 Níhi a mi hlami tsɔɔ kaa blɔ nɛ ɔ nɛ a kɛ ma tsu ní ɔ be hae nɛ azã kɛ ní kpahi nɛ a nyɛ nɛ a mɛtɛ melehi a he hu kaa sa a. Enɛ ɔ ma ha nɛ nihi nɛ a peeɔ melehi be hiɔ bɔe, ejakaa ke a ngɔ mele kɛ ba kpo nɔ konɛ a je níhi nɛ mɛtɛ e he ɔ kɛ jeɔ, a puɛɔ sika fuu nitsɛ.

 Kɛ o susu kɛɛ? Anɛ bɔ nɛ boso tsuɔ e he womi nɔ ha a ba gu, aloo nɔ ko lɛ bɔ?