Macalo Lucaden pa Jehovah wamaro nywako lok ma i Baibul ki jo ma gitye i dini mapatpat, ento pe wanywako i worogi. Baibul nyuto ni Lukricitayo me ada myero ‘guribbe i cwiny ki tam acel,’ dok gin acel ma nyuto ni waribbe i kinwa aye pien waye i kom jami ma rom. (1 Jo Korint 1:10; Jo Epeco 4:16; Jo Pilipi 2:2) Man pe kwako ye i kom kit mogo mabeco calo mar, ber cwiny, ki dong timo kica keken. Niyewa cung i kom ngec matir ma tye i Baibul, dok ka wape ki ngec matir, niyewa bene konye bibedo pe.​—Jo Roma 10:2, 3.

 Baibul tito ni nywako i woro pa jo ma niyegi pat twero nyweno niye pa Lukricitayo woko. (2 Jo Korint 6:14-17) Meno aye oweko Yecu pe oye ni lupwonnyene gunywak i woro mo keken mapat. (Matayo 12:30; Jon 14:6) Dok Cik ma Lubanga omiyo bot Moses bene ociko Luicrael ni pe guribbe i woro pa lurok. (Nia 34:11-14) Luicrael ma lugen gukwero jolo kony ki bot lurok pien onongo twero weko giribbe i woro ki jo ma niyegi pat.​—Ejira 4:1-3.

 Gitito. Ki lok ada, i 2022, watero cawa 1,501,797,703 kulu me nywako lok ki jo ma gitye ki niye mapat. Calo lakwena Paulo, wan bene watye ki miti me niang niye kacel ki tam ‘pa jo mapol’ i ticwa me pwony. (1 Jo Korint 9:19-22) Ka watye ka lok kwedgi, watute matek me lubo tam me Baibul ma waco ni myero wanyut “woro” bot jo mukene.​—1 Petero 3:15.