Adongo i boma me Alicante, tung kunyango me dog nam mo ma tye i lobo Spain. Wat maber onongo pe i kin lunyodona, dok macalo bulu, man oweko acako cwalo cawa malac i teng gudo. Cok ki gangwa onongo tye ka mo ma kikwoyo iye taya. Amako lirem ki José María ngat acel ma onongo tiyo kunnu. En obedo ngat ma kite ber, dok onongo keto cwinye me winyo loka pien man obedo gin ma onongo pe timme gangwa. I kare ma kwo tek, en okonya calo omera kikome kadi bed ni en onongo dit loya ki mwaka 20 kulu.

José María onongo dong ocako kwano Baibul ki Lucaden pa Jehovah. Onongo bene angeyo atir ni en maro kwano Ginacoya adada, ma oweko kare ducu en nywako lok ada me Baibul kweda. Abedo ka winyo lokke ki woro ento pe abedo ki miti i gin ma en onongo wacca. Macalo dano ma tye mwaka apar ki wiye, cwinya onongo tye i jami mukene. Ento, meno orii pi kare manok keken.

Pe amaro lok i kom awano me pikipiki ma anongo-ni. Gin ma abiwaco aye ni onongo abedo dano maming dok ma pe paro piny. I nino acel keken, kwona lokke matwal. Onongo atye bulu ma tye ki kero, ento koma otugi kwe woko cut cakke ki i nguta nio i tyena ma oweko abedo ki i ot yat keken. Otera kare me ye ni meno aye kit ma dong abikwo kwede. Abedo ka penye teretere ni, ‘tika tyen lok me kwo tye?

I kare ma José María obino ka nena, en otugi keto yub cutcut wek Lucaden pa Jehovah gulima i ot yat. Binogi ka limma kare ki kare ogudo cwinya adada. Acako kwano Baibul cutcut i kare ma dong kikwanya ki ka ma kigwoko iye jo ma gigoro adada. Aniang gin mumiyo dano gitye ka deno can ki dong gito ki dok pingo Lubanga oweko ni jami maraco tye ka timme. Apwonyo bene lok i kom jami ma Lubanga ocikke me timogi i anyim, ka ma lobo ducu bipong ki jo ma gipe ki roc dok ngat mo pe biwaco ni: “An koma lit.” (Icaya 33:24) Pi tyen me acel i kwona, olo to acako bedo ki gen i kwo.

I kare ma kikwanya ki i ot yat, amedde ki kwana me Baibul oyotoyot adada. Ki lela pa lungolo ma kite dok pat, abedo ka wot i cokke mogo pa Lucaden pa Jehovah dok bene anywako i tic me tito  kwena. Kibatija an i nino dwe 5 me Novemba, 1988, i gin lwok mo madit, i kare ma onongo atye mwaka 20. Lubanga Jehovah okonya me bedo ki neno matir i kom kwo. Ento gin ango ma atwero timone me nyuto pwoca?

Amoko tamma pe me weko gorona ogenga tic pi Jehovah. Onongo amito ni adong i yo me cwiny. (1 Temceo 4:15) I acakkine, pe obedo yot pien jo ma gangwa onongo gidag dini manyen ma atye iye-ni. Ento onongo atye ki luye luwota, ma gubedo omegina ki lumegina i yo me cwiny. Omege ki lumege gutimo jami ducu ma mitte me konyo Félix wek obed tye i cokke ducu ki dok gutere i ticwa me pwony.

Ento ka kare woto ki kato, aniang atir ni kwona bilokke ma nongo mitte ni anong kabedo ma kibigwoka iye agwoka cawa weng. I nge yenyone pi kare malac, anongo ka mo maber ma kigwoko iye lugoro i boma me Valencia, ma tye mairo 100 i kumalo me Alicante. Kabedo man odoko pacona pi kwona ducu.

Kadi bed ni abuto abuto ento amoko tamma me medde ki tic pi Jehovah. Atiyo ki cente ma kimiyo bot lugoro ki kony mukene me wilo kompiuta dok aweko kiketo macok ki ka butona. Awilo bene cim cing. Kombeddi-ni, ngat ma gwoka cwinyo kompiutana kacel ki cim-ma odiko weng. Me tic ki kompiuta man, atiyo ki tal nyo lut mo ma kilwongo ni joystick ma adiro ki tika. Atiyo bene ki tal mo ma akayo ki laka. Tal man konya me diyo nukuta ki i kompiuta ki bene namba i cim.

Diro me tet man okonya nining? Me acel, okonya me neno jw.org kabedowa me intanet ki dok Watchtower ONLINE LIBRARY. Man pud obedo gin mo ma okonya adada! Pol kare acwalo cawa malac i kwan pira kena ki dok kwedo lok i bukkewa ma gijenge i Baibul wek amedde ki pwonyo jami madok i kom Lubanga kacel ki kite mamwonya. Ka tekke cwinya otur nyo awinyo ni atye kickic, pol kare tye jami mogo i kabedowa me intanet ma kweyo cwinya.

Kompiuta bene konya me winyo pwony ki dok miyo lagam i cawa me cokke. Atwero miyo lagam, lega, miyo pwony ma kiyubo pi lwak ki bene kwano Wi lubele ma lubbe ki yub me kacokke. Kadi bed ni pe atwero bedo tye i kacokke an kikoma, ento awinyo ki i cwinya ni an bene atye but dul me kacokke.

Bedo ki cim cing kacel ki kompiuta bene okonya me nywako i ticwa me pwony labongo keng. Lok ada tye ni, pe atwero wot i ot ki ot kit ma pol pa Lucaden pa Jehovah gitimo kwede. Ento man pe ogenga tito kwena. Cim kacel ki kompiuta gukonya me nywako niyena ki jo mukene. Ki lok ada, tito  kwena ki cim okela adwogi mabeco ma oweko luelda gukwaya ni meno atel dano i yub me tito kwena ki cim. Yub man okonyo tutwalle jo ma pe gikato woko ento gibedo ki i ot keken ma pe giromo weko ganggi me cito ka tito kwena kacel ki kacokke.

Ento kwona pe jenge i kom diro me tet keken. Nino ki nino, lurema gibino ka nena. Gibino kacel ki wadigi nyo luremgi ma gitye ki miti me kwano Baibul. Pol kare giweko an aye adoro kwan meno. I kine mukene, luot mogo gilima ci giweko anywako i otyenogi me woro pi jo me ot. Cwinya bedo yom tutwal ka lutinogi gibedo i teng kitandana ci gititta gin muweko gimaro Jehovah.

Cwinya bedo yom ka wele mapol gulima. Ruma kare ducu nongo opong ki dano, wele ma gua ki ka macok ki bene mabor ma nongo gubino ka lima. Man oweko ngat ma gwoka-ni bedo ki ur adada pi mar ma ki nyuta. Nino ki nino, apwoyo Jehovah pi ye ki an me bedo i kin utmege ki lumege ma kit mabeco adada.

Ka ngat mo omota ci openya kit ma atye kwede, Awacce ni, “Atye, pud atye ka tute!” Ki lok ada, angeyo ni pe atye kena i tute man. Lukricitayo ducu gitye ka lweny ma lubbe ki ariya mapat pat ma gitye ka wok ki iye—“lweny maber me niye.” (1 Temceo 6:12) Ngo ma okonya me medde anyim pi mwaki mapol kuman? Alego bot Jehovah nino ducu dok apwoye pi miya kwo ma tye ki tyen lok. Dok bene atemme me tic ki kerona ducu i tic pi Lubanga kun aketo cwinya i kom genna pi anyim.

Pol kare atamo i kom kit ma kwo bibedo kwede i lobo manyen-ni ki kit ma abipye kwede. I cawa mukene wangale wan ki larema José María—ma twoyo two akweya—kit ma wabingwec kwede ngwec maboco. Apenye ni, “Anga ma biloyo?” En gamo ni: “Meno pire pe tek. Gin ma pire tek aye bedo tye i Paradic i ngwec meno.”

Pe obedo yot bota me ye ni atye ki goro. Angeyo ni i kare ma atye mwaka apar ki wiye, atimo gin me mingo, dok meno okelo goro malit adada i kwona. Ento kadi bed kumeno, cwinya yom ni Jehovah pe oweka. En omiya jami mapol adada—utmegina me cwiny, mot me kwo, yomcwiny me konyo jo mukene, ki dong gen mamwonya ma tye i anyim. Ka ni atit i yo macek kit ma awinyo kwede, atamo ni abiwacci Jehovah omiya jami mapol ma pe apore pigi.