NUA kacel ki jo me ode gugure kacel i kare ma kot ocako corre matek i lobo. Go kong cal pa Nua kacel ki jo me ode ma gitye i yeya, mac tara ma tye ka lyel weko ineno lworo ma tye i wanggi, wanggi yabbe malac ka giwinyo kit ma kot corre kwede i wi yeya dok kit ma pii corre kwede i kor yeya. Man nen calo oweko lworo omakogi adada.

Labongo akalakala, Nua obedo ki pwoc madit atika ka en neno dakone ma lagen kacel ki awobene adek medo ki mongi. Nua nen calo onongo kwe cwiny ka en neno jo ma emarogi gitye kacel kwede i kare man ma kwo tek tutwal-li. En ki lupacone ducu gin mo marac pe otimme i komgi. Nen calo otelo wi lupacone i lega ki dwan malongo i kare ma kot tye ka cwer kun pwoyo Lubanga.

Nua obedo ki niye matek. Niye pa Nua oweko Lubangane Jehovah ogwokke kacel ki jo me ode. (Jo Ibru 11:7) Ento, tika gugiko bedo ki niye i kare ma kot ocako cwer? Pe, onongo pud mitte ni gunyut niye i kare me anyim, ma onongo pe bibedo yot-ti. Wan bene wamito niye i kare man ma kwo tek tutwal-li. Pi meno, kong dong wanenu pwony ma wanongo ki i niye pa Nua.

Ki woko, kot omedde ki corre pi “nino pyerangwen dyeceng ki dyewor.” (Acakki 7:4, 11, 12) Piine omedde ki pong aponga i wi lobo. Ka kot man woto ki cwer, Nua oniang atir ni Lubangane Jehovah kare ducu gwoko jo ma kitgi atir dok pwodo jo ma kitgi raco.

Pii Aluka man otugi juko jemo ma lumalaika onongo gucako-ni. Pien guweko miti marac pa Catan-ni odonyo i cwinygi, lumalaika mapol “guweko kabedogi” i polo ci gucako bedo ki mon i lobo kany, ci gunywalo lutino ma kwogi orubbe aruba, ma kilwongogi ni jo Nepil. (Juda 6; Acakki 6:4) Labongo akalakala, Catan cwinye obedo yom adada pi jemo man, pien onongo bene keto cac i kom dano kadi bed ni gitye cwec me rwom mamalo ma Jehovah ocweyo i lobo kany.

Ento, ka pii aluka woto ki medde malo, lumalaika ma gujemo-ni guweko komgi me lobo-ni matwal ci gudok i polo. Gin guweko mongi ki dok lutinogi i lobo kany wek pii aluka onekgi kacel ki jo mukene-ni.

Cokcok cencwari abiro angec i kare pa Enoka, Jehovah onongo ociko dano ni Ebijwero jo maraco ma pe giwore woko. (Acakki 5:24; Juda 14, 15) Cakke i kare pa Enoka-ni, dano kitgi odoko rac omedde ameda, gitye ka balo lobo dok bene gupongo ki tim gero. Man oweko kombeddi-ni gitye ka to. Tika Nua ki jo me ode cwinygi obedo yom pi jwero jo magi?

Pe! Kadi wa Lubangagi ma lakica-ni bene cwinye pe obedo yom. (Ejekiel 33:11) Jehovah otimo jami ducu ma twere wek elar dano mapol. En ooro Enoka me poyo wi dano, dok bene ociko Nua ni  opa yeya. Nua kacel ki jo me ode gucanne me yubo yeya man madit tutwal-li kun jo mukene bene gineno. Medo i kom meno, Jehovah ocwalo Nua wek obed “latit lok me kit ma atir.” (2 Petero 2:5) Calo Enoka, en bene opoyo wi dano pi ngolo kop ma kibingolone i wi dano me lobo. Ento dano gujolo lokke nining? Yecu, ma oneno ki i polo kit ma jo me kare meno gikwo kwede, oloko i kom dano me kare pa Nua ni: “Pe gumedo ki ngeyo gin mo nio ka pii aluka opong, ci omologi woko ducu.”​—Matayo 24:39.

Go kong kit ma Nua kacel ki jo me ode guwinyo kwede pi nino 40 magi mukwongo-ni cakke ma Jehovah oloro kwede ki doggola me yeya. Ka kot man woto ki corre i kom yeya nino ki nino, gin aboro ducu nen calo gubedo ka tiyo tic mogo​—gwoko ngat acel acel, yubo i yeya ma dong odoko pacogi-ni, ki dong pito lee ma gitye i yeya. Nen calo i cawa mo bene yeya man madit-ti otagge. Man gudo cwiny adada! Pien tye i wi pii ma tye ka pong medde ameda, yeya man bene obedo ka tinge medde ameda malo, nio ka “otero yeya malo twatwal nia ki wi lobo.” (Acakki 7:17) Man pud dong onyuto teko ma Lubanga Jehovah, Won Twer Ducu tye kwede!

Labongo akalakala, Nua obedo ki pwoc madit pienni kigwoke ki jo me ode, ki bene pien Jehovah onyuto cwiny me kica kun tiyo kwedgi me poyo wi jo ma kineko i pii aluka-ni. Oromo nen i wang dano calo iwacci Nua ki jo me ode gubalo mwaki magi ducu nono ka payo yeya i kare meno. Dano onongo pe gimito winyo lok pa Nua! Tam kong​—Nua nen calo onongo tye ki omegine, lumegine, okeyone, ki lukeyone ma pud gikwo ma peya Pii Aluka ocorre i lobo; ento pe tye ngat mo i kingi ma owinyo lokke, kono jo me ode keken. (Acakki 5:30) Ma dong gitye i yeya-ni, jo aboro magi nen calo gunongo kwe cwiny ka gitamo pi cawa ma gicwalo me konyo dano wek gubwoti.

Jehovah pud peya olokke nicakke wa i kare pa Nua. (Malaki 3:6) Yecu Kricito otito ni jami ma tye ka timme i karewa-ni rom aroma ki ma gutimme “i kare pa Nua.” (Matayo 24:37) Ento mewa-ni obedo kare me agikki, kare me peko ma bigik woko ka Lubanga bijwero lobo man marac pa Catan-ni.  I kareni, jo pa Lubanga bene gitye ka poyo wi jo ducu ma gimito winyo lokgi. Tika ibijolo lokgi-ni? Ka ce dong ijolo lok ada meno ma miyo kwo-ni, tika ibinywako ki jo mukene bene? Nua kacel ki jo me ode guweko lanen maber bot wan ducu.

Ka nongo yeya kwang i wi pii man ma tye ka twagge tutwal-li, Nua ki jo me ode ka pe gin mo guwinyo kit ma bao kok kwede calo mito tur woko. Tika Nua obedo ki par pi kit ma pii twagge kwede ki dok ka yeya man romo kanyone labongo tur? Pe. Par ma kit meno tye bot jo ma cwinygi gung i kare-ni, ento Nua pe obedo kwede. Baibul waco ni: “Pi niye Nua . . . opayo yeya.” (Jo Ibru 11:7) Nua obedo ki niye i kom gin ango? Jehovah omoko gicikke me gwoko Nua kacel ki jo me ode wek pe guto i Pii Aluka. (Acakki 6:18, 19) Ngat ma ocweyo polo, lobo kacel ki jami ma i igi ducu-ni mono pe romo gwoko yeya man wek pe otur? En romo! Nua obedo ki gen ni Jehovah bigwoko Cikkene. Ada, en ki jo me ode keken aye “gularre ki i pii.”​—1 Petero 3:20.

Kot ocorre i wi lobo nino 40 dyeceng ki dyewor benebene, ci dong lacen ocok. Ka iporo ki kalenda me kare-ni, nino man onongo poto i Decemba i 2370 K.M.P. Ento lupaco man onongo pud peya giromo kato ki i yeya. Yeya man ma jami makwo keken aye onongo tye i iye-ni obedo ka kwang i wi pii ma opongo lobo ducu dok omwonyo wa godi bene-ni. (Acakki 7:19, 20) Go kong i wi cal pa Nua ma tye ka tiyo tic matek wek en ki awobene Cem, Kam, ki Yafeci gipit dok gigwok lee weng wek gubed maleng dok ma komgi yot. Tye lok ada ni, Lubanga ma oweko lee magi ducu mager gudonyo i yeya-ni onongo en romo gwokogi pi kare me Pii Aluka-ni. *

Nua nen calo ocoyo piny jami ducu mutimme. Rekod man nyuto awene ma kot ocako cwer iye ki dong awene ma ogik iye. Nyuto bene ni pii opongo i wi lobo pi nino 150 kulu. I agikkine, pii ocako dwon woko. I nino mo acel ma pire tek, yeya-ni “ogem i got Ararat,” ma nonge i lobo Turkey. Man nen calo obedo i April me 2369 K.M.P. Wi godi ocako nen i Juni, i nge nino 73. I Sektemba, ma dwe adek okato, Nua ocako yako wi yeya nyo ka mogo ki i kom yeya. Ki lok ada, tic man matek-ki onyako nyige i kare ma dero kacel ki yamo mamit ocako donyo i yeya. Con kong, Nua bene otemme me neno woko ka ce dong giromo kato nyo pe. En ocwalo agak, ma obedo ka dwogo i yeya ka dok cito woko pi kare mogo, ma gwok nyo bene obedo ka temo pye i kom yeya, ka lacen Nua ocwalo amam, ma obedo ka dwogo bote nio ka onongo ka pye.​—Acakki 7:24–8:13.

Tic ma pire tek bot Nua aye onongo nyamo lok i kom Jehovah. Itwero goyo i wi cal pa lupaco man ma gigure kacel kare ki kare ka lega kun ginyamo kit ma Wongi me polo ogwokogi kwede. Nua ojenge i kom Jehovah i moko tam mo keken ma pire tek. Kadi bed ni Nua onongo oneno ni piny dong “otwo woko”​—i nge bedo i yeya pi mwaka makato acel​—en pe oyabo dog yeya ci otelo wi jami ducu ma tye i yeya meno me kato woko. (Acakki 8:14) Pe, en okuro ni Jehovah aye owacce!

Luwi odi i kareni gitwero pwonyo jami mapol ki bot laco man ma lagen-ni. En otero jami ducu kore ki kore, obedo ngat ma tiyo matek, diyo cwinye, dok ogwoko jo ducu ma en loyogi. Ma dong pire tek loyo aye ni, en oketo miti pa Lubanga Jehovah obedo mukwongo i jami ducu. Ka walubo lanen pa Nua i yo magi, ci wabikelo adwogi maber bot jo ma wamarogi.

I agikkine, Jehovah oloko bot Nua. En owaco ni: “Dong ikat woko ki i yeya, in ki dakoni, ki awobeni ki mongi kacel kwedi.” Lupaco man guwinyo dog Lubanga, gutelo yo ka dong lee ducu gulubo korgi. Gukato woko nining? Tika gukato ma gimwomme amwoma? Pe kumeno! Kit ma kicoyo kwede, gin “gukato woko ki i yeya, ma oporo kit kwagi ducu.” (Acakki 8:15-19) I kare ma dong gukato woko, Nua kacel ki jo me ode gucako yweyo yamo mamit ma kodo i wi got, guneno bene ki i wi got Ararat lobo manyen ma jo maraco pe iye. Jo Nepil, tim gero, lumalaika ma lujemo, kacel ki jo mukene-ni ducu  onongo dong gipe i lobo! * Dano gubedo ki kare me cako pongo lobo dok aye.

Nua onongo ngeyo gin ma myero etim. En ocako ki woro Jehovah. En ocano keno tyer, dok otiyo ki lee ma Lubanga neno ni gileng​—ma gukelo i “abiro abiro”​—ci otyero gityer bot Jehovah. (Acakki 7:2; 8:20) Tika gityer meno oyomo cwiny Jehovah?

Baibul miyo lagam ma cuko cwiny kit man: “Rwot [Jehovah] ongweyo gin ma ngwece kur ma yomo cwiny.” Cwercwiny ma Lubanga onongo tye kwede pien dano gitye ka pongo lobo ki tim gero-ni olokke odoko yomcwiny i kare ma ongweyo gin ma ngwece kur ma yomo cwinye. Medo i kom meno, en bene oneno lupaco ma gin lugen bote ma gumoko tamgi me timo mitine. Jehovah pe obedo lagingi ma onongo mito ni gutim jami ducu kit ma emito. Tyeng man medde ni: ‘Cwiny dano kemo bal keken nia wa i tinone.’ (Acakki 8:21) Nen dok bene kit ma kica omako kwede Jehovah i kom dano.

Lubanga okwanyo lam ma en olamo kwede ki ngom-mi. I kare ma Adam ki Kawa gujemo, Lubanga olamo ngom woko ma oweko pur odoko tek adada. Lamek, ma obedo won Nua-ni, ocako nying wode ni Nua, ma nen calo te lokke ni “Yweyo,” nyo “Kwe cwiny,” dok otito ni wode biweko dano ywe ki i lam meno. Nua nen calo cwinye obedo yom i kare ma oniang ni ebineno kit ma lok meno bicobbe kwede ki dok ni ngom biceko cam ka ce gupuru. Man aye gin mumiyo Nua odoko lapur!​—Acakki 3:17, 18; 5:28, 29; 9:20.

Medo i kom meno, Jehovah omiyo bot likwayo pa Nua cik ma niang iye yot ma romo doro kwogi​—cik man gengogi nek ki dong tic ki remo i yo marac. Lubanga bene omoko gicikke ki dano kun cikke ni pe dong ebikelo pii aluka matwal wek otyek dano. Me nyuto ni lokke ni gene, Jehovah omiyo lanyut me danyo nyo etaloka. Nio wa tin, danyo kweyo cwinywa pien poyo wiwa ni Jehovah gwoko cikkene.​—Acakki 9:1-17.

Ka lok ma kicoyo i kom Nua-ni obedo ododo, ci kono onongo danyo pe i kare-ni. Ento Nua obedo dano ma okwo, dok kwone pe obedo yot. I kare meno ma onongo dano rii i lobo pi mwaki mapol-li, Nua odiyo cwinye pi mwaki 350 mukene, dok cencwari magi okele cwercwiny madwong. En otimo bal madit i nino mo acel i kare ma omato kongo ci omer, ento bal meno odoko dit i kare ma lakwarone Kanaan bene otimo bal madit​—bal man okelo adwogi marac i kom lupacone. Nua okwo pi mwaki mapol ma oweko en oneno kit ma likwayone gipoto i bal calo woro cal ki tim gero i kare pa Nimulodi. Ento, gin maber aye ni Nua oneno ka wode Cem nyuto lanen me niye matek bot lupacone.​—Acakki 9:21-28; 10:8-11; 11:1-11.

Calo Nua, omyero wadi cwinywa kun wabedo ki niye. Ka jo ma wakwo kwedgi gidag Lubanga me ada, nyo gikwero tic pire, mitte ni wamedde anyim calo Nua. Jehovah pwoyo diyo cwiny ma kit man. Yecu Kricito owaco ni, “ngat ma biciro nio wa i agikki bilarre.”​—Matayo 24:13.