Adongo i boma me Turku ma tye i dog nam ka ma jone pe gulony. Babana onongo obedo ladong buniya muywek adada, dok wan ki omera matidi bene onongo wadongo buniya. Pol kare onongo pe agalle me lweny i cukul. I kare ma atye mwaka apar ki wiye, adonyo i dul pa lutim aranyi ma oywek adada, ma omiyo pol kare onongo alwenyo marac adada. Ki bene anongo ni wer ma keko it dano mit adada, ci acako bedo ki tam me medde ki wer man wek adok lawer muywek.

Awilo bul mogo ki bene acako gurup me wer, ci i ngeye adoko lawer ma telo wi luwote i gurup me wer. Pol kare onongo atimme calo lapoya ka atye ka wer i wi abam. Pien gurupwa me wer onongo ger dok rukke ma lik adada, wanongo yweka motmot. Wacako goyo wer i nyim lwak dano mapol ki bene wamako wer mogo. Wer me agikki ma wamako onongo pwoc madit ki bot dano. I agikki me mwaka 1980, wawoto i lobo Amerika wek gurup me werwa bene ongene. Wawero i nyim dano i boma me New York ki bene i Los Angeles, ki kunnu wakubbe ki jo ma gimako wer ma peya wadok cen i lobo Finland.

Kadi bed ni onongo amaro bedo i gurupwa me wer, onongo amito ni abed ki kwo ma tye ki tyen lok. Pe acako maro tim me gero kacel ki pyem ma timme i kin luwer, ki dok cwinya ocako cwer i kom kwona me mingo mingo-ni. Acako nenne kekena ni abedo ngat marac, ki bene onongo alworo wang i mac me kapiny. Atemme ki teka me nongo lagam pi lapenya ki i bukke mapat pat me dini, ki bene alego matek bot Lubanga wek okonya, kadi bed ni onongo awinyo ni pe atwero yomo cwinye.

Acako tic i posta wek anongo gin mo ma twero konya me kwo. I nino mo acel, aniang ni latic lawota acel tye Lacaden pa Jehovah. Apenye ki lapeny mapol. Kit ma en ogamo kwede lapenya ki diro kun tiyo ki Ginacoya otugo mitina ci aye ni en okwan Baibul kweda. I kare ma dong wakwano pi cabit mogo, kimini  gurupwa kontrak me mako wer ki bene yub me cwalo woko albam i lobo Amerika. Atamo ni man dong opoto matugu.

Awaco bot Lacaden ma onongo tye ka kwan kweda ni amito ni kong ago albam mo acel keken ci dong i ngeye abicako keto tira me Baibul i tic i kwona. Pe owacca tamme mo keken; ento openya ni kong akwan lok pa Yecu ma kicoyo i Matayo 6:24. Tyeng man wacci: “Pe tye dano mo ma twero tic ki rwodi aryo.” Wiya ocung woko i kare ma aniang lok pa Yecu-ni. Ento i nge nino mo manok, lapwonya me Baibul bene obedo ki ur! Awacce ni pien amito keto lok pa Yecu-ni i tic, dong aweko gurupwa me wer woko!

Baibul onongo tye calo kiyo ma onyutta balla. (Yakobo 1:22-25) Anongo ni onongo ager adada: Onongo awakke, ki dok onongo atye ki woro ma pe jukke. Onongo atiyo ki leb marac, alwenyo, amato tar, ki dok amato kongo adada. I kare ma aniang ni kwona pe rwatte ki cik me Baibul, cwinya ocwer adada. Kadi bed kumeno, amoko tamma me timo alokaloka i kwona.​—Jo Epeco 4:22-24.

Tutwalle i acakkine, onongo atye ki lewic madit adada pi jami maraco ma abedo ka timogi con. Ento Lacaden ma abedo ka kwan kwede ni okonya adada. Onyuta gin ma Baibul waco i Icaya 1:18: “Kadi bed dong balwu kwar ma rom mene, bidoko matar calo pee.” Tyeng man ki wang Baibul mukene omoko bota ni Wonwa me polo kara lakica adada, dok en mito cango ret pa jo ma gungut pi balgi.

I kare ma dong angeyo Jehovah ci acako marre adada, onongo amito dyero kwona bote. (Jabuli 40:8) Anongo batija i gure madit pa Lucaden pa Jehovah ma kwako wi lobo ducu ma obedo i St. Petersburg, i Russia i mwaka 1992.

Amako lirem mapol ma gibeco adada i kin jo ma giworo Jehovah. Kare ki kare, wagure kacel ci wagoyo wer mamwonya kun wanongo mit pa mic man mua ki bot Lubanga-ni. (Yakobo 1:17) Mot ma pud dong anongo maber aye obedo nyoma ki dakona ma amaro adada, Kristina. Wan ki dakona, wanywako jami mapol ata​—yomcwiny ki ariya me kwo, ki bene jami mogo ma i cwinywa.

Ka onongo pe adoko Lacaden pa Jehovah, kono onongo dong ato wacon. I kare mukato angec, onongo abedo ka poto i peko cawa weng. Ento kombeddi dong atye ki tyen lok me kwo, ki bene anongo ni jami ducu dong tye kakare.