1, 2. Ma lubbe ki lobo-ni, lutic pa Lubanga onongo giwinyo nining, dok i yo ango ma gitye ki pacogi?

  TIKA iwinyo agonya i lobo man pa Catan-ni calo iwacci itye paco? Ka pe, ci nongo pe itye keni! Cakke wacon, jo ducu ma gimaro Jehovah onongo giwinyo ni gitye lurok nyo welo i lobo-ni. Me lapore, i kare ma gubedo ka dak i kabedo mapat pat i lobo Kanaan, jo ma giworo Lubanga “gutuco ni gin gibedo macalo lurok dok welo.”​—Ibru 11:13.

² I yo acel-li, jo ma kiwirogi ma gilubo kor Kricito ‘kabedogi tye i polo,’ ginene kekengi ni gibedo ‘lurok dok welo’ i lobo man. (Pil. 3:20; 1 Pet. 2:11) “Romi mukene” pa Kricito bene “pe jo me lobo, macalo an [Yecu] pe dano me lobo.” (Jon 10:16; 17:16) Kadi bed kumeno, jo pa Lubanga gitye ki “pacogi.” Ki lok ada, watye ki pacowa ka ma wanongo iye gwok kacel ki mar ma pud dong ber loyo. Paco man watwero nenone ka watye ki niye. Moses ocoyo ni: “Rwot [Jehovah], in aye ibedo kalarrewa nia con ki con.” * (Jab. 90:1) I kare macon, Jehovah obedo ‘kalarre’ pi luticce ma lugen nining? En tye ‘kalarre’ pi jo ma kilwongogi ki nyinge i kareni nining? Dok en keken aye bibedo kalarre ma genne pi jone i anyim nining?

3. Kiporo Jehovah ki gin ango i Jabuli 90:1 dok pingo?

³ Baibul i kine mukene poro Jehovah ki jami ma waneno ki wangwa wek wange kite i yo matut. Me lapore, Jabuli 90:1 poro Jehovah ki ‘kalarre’ nyo paco. Ka watamo i kom paco, ci watamo i kom kabedo  ka ma mar, kuc ki gwok nonge iye. Pingo kiporo Jehovah ki paco? Baibul wacciwa ni Jehovah aye mar. (1 Jon 4:8) En bene tye Lubanga me kuc, ma miyo jo ma gigene gibedo ki “kuc”’ (Jab. 4:8) Me lapore, kong wanenu kit ma en otero kwede jo ma lugen cakke ki i kom Abraim.

4, 5. Lubanga obedo ‘kalarre’ bot Abraim nining?

⁴ Go kong kit ma Abraim, ma onongo pud kilwongo ni Abram-mi owinyo kwede i kare ma Jehovah owacce ni: “A woko ki i lobo tuwu, ki i kakawu . . . ci icit i lobo ma abinyutti.” Ka ce Abram onongo tye ki par mo keken, ci parre-ni orweny i kare ma Jehovah omedo ni: “Abimiyi idoko rok madit, abimiyi gum bene, abimiyo nyingi bedo dit, . . . Abimiyo gum i kom jo ma gileggi gum, abiceno ngat mo ma biceni.”​—Acak. 12:1-3.

⁵ Ki lok magi, Jehovah okwonge me bedo kalarre ma genne bot Abraim ki likwayone. (Acak. 26:1-6) Jehovah ocobo cikkene. Me lapore, en ojuko Parao me Ejipt kacel ki Kabaka Abimelek me Gerar pe me bedo ki Cara ki dok neko Abraim. En ogwoko Icaka ki Labeka bene. (Acak. 12:14-20; 20:1-14; 26:6-11) Wakwano ni: “Lubanga [Jehovah] pe oye ngat mo odiyogi. Ojuko luker mapol pigi kun wacci, ‘Pe wugud kom jo ma an awirogi, pe wutim lunebina marac!’”​—Jab. 105:14, 15.

6. Ngo ma Icaka owacci Yakobo myero otim, ki dok Yakobo nen calo owinyo nining?

⁶ I kin lunebi magi onongo tye iye Yakobo, lakwar Abraim. Ka kare dong oromo pi Yakobo me nyomo dako, wonne Icaka ocikke ni: “In dong pe inyom dako mo ki i kin anyira me Kanaan. Ber ia, icit Paddan-aram i ot pa kwaru Becweri ma won meni; en aye inyom iye nya pa Laban.” (Acak. 28:1, 2) Yakobo otimo gin ma Icaka owacce. Yakobo oweko lupacone i Kanaan ci nen calo owoto kene pi mairo miya mapol nio wa i Karan. (Acak. 28:10) Gwok nyo obedo ka penye kekene ni: ‘Abirii kunnu pi kare ma rom mene? Tika nera bijola ki yomcwiny ci mina dako ma lworo Lubanga?’ Ka Yakobo onongo tye ki par ma kit magi, ci gurwenyo woko i kare ma en oo Luj, ma tye mairo 60 (100 km) ki Beer-ceba. Ngo ma otimme i Luj?

7. Lubanga ocuko cwiny Yakobo nining i wang lek?

⁷ I Luj, Jehovah onyutte bot Yakobo i wang lek kun wacci: “An atye kwedi, abigwoki ka ma ibiwoto iye ducu, dok  abidwoki cen wa i lobo man; pe abiweki ata nio wang ma acobo gin ma atyeko lokone boti-ni.” (Acak. 28:15) Lok man me kica-ni nen calo pud dong okweyo dok ocuko cwiny Yakobo ya! Tika itwero goyo calle i wii, kit ma en omako ki wot kwede kun tye ki miti madit me neno kit ma Lubanga bicobo kwede Lokke? Ka ce iweko paconi, gwok nyo me tic pi Lubanga i lobo mukene, twero bedo ni iniang kit ma Yakobo onongo winyo kwede. Kadi bed kumeno, in dong ineno labongo akalakala kit ma Jehovah onyuto kwede ni eparo piri.

8, 9. I yo mene ma Jehovah obedo kwede ‘kalarre’ bot Yakobo, dok pwony ango ma wanongo ki iye?

⁸ I kare ma Yakobo oo i Karan, nerone ojole ki yomcwiny ka ingeye omiye Lea ki Lakeri me bedo monne. Ento lacen, Laban otero Yakobo i yo marac kun loko mucarane tyen apar kulu! (Acak. 31:41, 42) Kadi bed kumeno, Yakobo ociro jami magi maraco-ni ducu kun geno ni Jehovah bimedde ki paro pire​—ci En bene otimo kumeno! Ada, i kare ma Lubanga owacce ni odok cen i Kanaan, Yakobo onongo dong tye ki “lwak lim, ki lwak angeca ki lwak opiine, ki lwak kinaga ki kana.” (Acak. 30:43) Ki pwoc madit atika, Yakobo olego ni: “An pe amyero kadi matidi mo ki mar meri ducu ma pe lokke, ki ada meri ducu ma inyuto i kom an laticci; pien con angolo kulu Jordan ma kun atye ki odoona keken, ci kombeddi dong apokke dul aryo kulu.”​—Acak. 32:10.

⁹ Labol magi ginyuto ni lega man pa Moses-ni tye lok ada: “Rwot [Jehovah], in aye ibedo kalarrewa nia con ki con”! (Jab. 90:1) Lok man pud tye lok ada kadi wa i kare-ni, pien Jehovah, “ma pe tye ki alokaloka mo, dok tipo mo ma nyuto lokkene bene pe[-ni],” medde ki bedo kalarre pi jone ma gigene. (Yak. 1:17) Kong wanenu kit ma en timo kwede man.

10. Pingo watwero bedo labongo akalakala ni Jehovah pud tye ka medde ki bedo kalarre pa luticce?

¹⁰ Tam kong i kom lok man: Itye ka miyo caden i ot kot i kom dul pa lutim aranyi mo madit. Ladit wi dul-li ryek adada, tek, lagoba ma kite rac dok bene lanek. Ibiwinyo nining i otyeno ka i kato woko ki i ot kot-ti? Tika ibiwinyo agonya? Pe wacel! Ada, ibibedo ki tyen lok matir me penyo ni myero kigwoki. Labol man nyuto kwo ma lutic pa Jehovah gitye iye pien gimiyo caden ki tekcwiny i kom lamone pa Jehovah, Catan! (Kwan Niyabo 2:17.) Tika Catan obedo ki kero me gengo lutic pa Lubanga? Pe! Ki lok ada, wan wamedde ameda ki tito kwena bot dano i wi lobo lung. Man twere nining? Jehovah pud tye “kalarrewa,” pien en gwoko dok goyo laa i kom jone i kare man me agikki-ni. (Kwan Icaya 54:14, 17.) Kadi bed kumeno, Jehovah pe twero bedo kalarrewa ka waye ni Catan obitwa.

11. Pwony ango ma wanongo ki bot Abraim, Icaka, ki Yakobo?

¹¹ Kong dok wanong wunu pwony mukene ki bot Abraim, Icaka, ki Yakobo. Kadi bed ni gukwo i Kanaan, gin pe gunywako i kodi kwo pa jo me lobo meno, pien onongo gidag kit kwogi me aranyi ki tim me carocarogi-ni. (Acak. 27:46) Gin onongo pe gimito cik mapol ma kiryeyogi piny wek ginge gin matir ki marac ento onongo gingeyo gin ma Jehovah maro ki gin ma en dag. Kit  ma en onongo tye kalarregi-ni, onongo pe gimito ni gibed jo me lobo. Ma ka meno, gubedo bor ki lobo. Gin dong pud guweko lanen maber piwa ya! Ka itye ka yero luremi kacel ki jami me galo wang, tika inyuto ni itye ka tute me lubo lanen pa lutic magi pa Jehovah ma gubedo lugen-ni? Tye me cwercwiny ni jo mogo i kacokke ginyuto ni olo to gimaro lobo pa Catan-ni. Ka ce iwinyo kumeno, kadi matidi mo, leg bot Jehovah wek okonyi. Wi myero opo ni lobo-ni pa Catan, pien en tye laworo dok pe paro piwa.​—2 Kor. 4:4; Ep. 2:1, 2.

12. (a) Ngo ma Jehovah omiyo bot luticce? (b) Iwinyo nining pi jami magi?

¹² Wek wakwer bita pa Catan, omyero wati ki jami ducu me cwiny ma Jehovah miyo bot luticce. Jami magi kwako Cokke pa Lukricitayo, woro pi jo me ot, ki dok “mot ma obedo dano”​—lukwat ma Lubanga ocimogi me cuko cwinywa ki konyowa ka nongo watute ki pekki me kwo. (Ep. 4:8-12, NW) Omego George Gangas, ma obedo i Lukiko Madit pi mwaki mapol-li, ocoyo ni: “Ka atye i kin [jo pa Lubanga], awinyo calo iwacci atye kacel ki lupacona.” Tika in bene iwinyo kumeno?

13. Pwony ango ma pire tek ma wanongo ki i Jo Ibru 11:13?

¹³ Pwony mukene ma pire tek ma wanongo ki bot Abraim, Icaka, ki Yakobo aye ni gin onongo gitye atera me bedo pat ki jo murumo ka ngetgi. Kit ma waneno kwede i  paragraf me 1, gin “gutuco [ka maleng] ni gin gibedo macalo lurok dok welo.” (Ibru 11:13) Tika dong imoko tammi me bedo pat ki jo me lobo? Ada, timo meno pol kare pe yot. Ento, itwero timone ki kony pa Lubanga kacel ki pa Lukricitayo luwoti. Po ni, pe itye keni. Jo ducu ma gimito tic pi Jehovah myero gunge ni gitye ki lweny matek! (Ep. 6:12) Ento, watwero loyo lweny-nyi ka waketo gen i kom Jehovah ki dok ka waweko en bedo kalarrewa.

14. Lutic pa Jehovah gitye ka kuro “gang” mene?

¹⁴ Gin mukene ma pire tek ene: Lub lanen pa Abraim kun iciko wangi i kom mot. (2 Kor. 4:18) Lakwena Paulo ocoyo ni Abraim “onongo tye ka kuro gang ca ma tye ki gutine ducu matek, ma Lubanga aye obedo ngat mugoyo calle, ki lagedone kikome.” (Ibru 11:10) “Gang” meno obedo Ker pa Meciya. Ada, Abraim okuro “gang” meno. Ento pe mitte ni wan myero wakur, pien Ker-ri dong tye ka loc i polo. Medo i kom meno, tye  lanyut mapol ma gicimo ni cokcok-ki Ker-ri biloyo lobo ducu. Tika itamo ni Ker-ri tye ada kitung boti? Tika man gudo kit ma ineno kwede kwo, lobo-ni, ki dong gin ma iketo ni obed mukwongo i kwoni?​—Kwan 2 Petero 3:11, 12.

15. Anyim ango ma tye pi jo ma gigeno lobo me kare-ni?

¹⁵ Ka dong agikki me lobo pa Catan woto ki nyiko cok, “can ma bipoto i lobo” bimedde ameda. (Mat. 24:7, 8) Labongo akalakala, kwo bidoko tek i kare me twon can madit atika-ni. I twok lobo lung, kibijwero jami ducu dok wi dano binywene woko ki bene lworo bimakogi. (Kab. 3:16, 17) Pien gibibange ata pi lworo ma omakogi-ni, gibiyenyo kalarre “i boro ki i kin got mubar ma i godi ducu.” (Yabo 6:15-17) Ento, boro kacel ki dul me wibye ki biacara ma gitye calo godi-ni pe bigwokogi.

16. Omyero wanen kacokke pa Lukricitayo nining, dok pingo?

¹⁶ Kadi bed kumeno, jo pa Jehovah gibimedde ki nongo gwok pa Lubanga Jehovah, ma en aye ‘kalarregi.’ Calo lanebi Kabakuk, ‘gibiwakke pi Rwot [Jehovah].’ Dok ‘gibinyatte ki yomcwiny pi Lubanga lalargi.’ (Kab. 3:18) I yo ango ma Jehovah bibedo “kalarrewa” i kare meno me twon can madit-ti? Omyero wakur wanen. Ento, watwero bedo labongo akalakala ni: Calo Luicrael i kare ma gua ki i Ejipt, “lwak dano mapol ata[-ni]” gibibedo ma guyubbe dok gitye atera me keto i tic tira pa Lubanga. (Yabo 7:9; kwan Nia 13:18.) Lubanga biminiwa tira meno kun wok ki i kacokke. Ada, kacokke alip mapol ata ma gitye i twok lobo ducu-ni nen calo gicung pi ‘kicika’ ma kiloko pire i Icaya 26:20. (Kwan.) Tika itye ki pwoc pi cokkewa? Tika kare ducu iketo i tic tira ma Jehovah miyo kun wok ki i kacokke?​—Ibru 13:17.

17. I yo ango ma Jehovah tye ‘kalarre’ kadi pi luticce ma gigenne ma dong guto?

¹⁷ Kadiwa jo ma gin lugen ma gibito ma peya twon can madit atika-ni ocakke pud gibibedo i te gwok pa Jehovah, ma en aye ‘kalarregi-ni.’ I yo ango? I nge kare malac ma dong Abraim, Icaka, ki Yakobo guto woko, Jehovah owaco bot Moses ni: “An Lubanga pa . . . Abraim, Lubanga pa Icaka ki Lubanga pa Yakobo.” (Nia 3:6) I nge nwoyo lok man, Yecu omedo ni: “Dong Lubanga pe Lubanga pa jo muto, ento Lubanga pa jo makwo; pien dano ducu bedo kwo pire.” (Luka 20:38) Ada, ki bot Jehovah, kadi bed jo ma gigenne guto, nongo rom aroma calo iwacci pud gikwo pien wang ma kicerogi.​—Latit. 7:1.

18. I lobo manyen, Jehovah bibedo ‘kalarre’ pi luticce i yo mapat nining?

¹⁸ I lobo manyen macok bino-ni, Jehovah bidoko ‘kalarre’ pi jone i yo mukene mapat. Niyabo 21:3 wacci: “Nen, kabedo pa Lubanga dong tye bot dano. En bibedo kacel kwedgi.” I acakkine, Jehovah biweko Kricito Yecu loyo lobo. I nge mwaki alip acel, Yecu bidwoko Ker i te loc pa Wonne ka nongo dong otyeko cobo yub pa Lubanga pi lobo. (1 Kor. 15:28) I ngeye, pe dong bimitte ni Yecu okub kin dano ma gipe ki roc-ci ki Lubanga; Jehovah bibedo kacel kwedgi. Pud dong watye ki anyim mamwonya ya! I kareni, watute wunu matek me lubo lanen pa lutic pa Jehovah me kare macon, kun waweko Jehovah bedo “kalarrewa.”