Kit ma waneno kwede i lweny ma tye ka timme i lobo Ukraine, lutela dini mapol ma gilwonge ni gin Lukricitayo gubedo ka cuko cwiny dano me donyo i lweny meno. Nen kong kit ma lutela dini magi gurwako kwede wigi i lweny man:

•   “Wamiyo deyo kacel ki pwoc madit bot lumonywa ma gitye ka lweny matek me gwoko lobo Ukraine ki i cing lumerokwa . . . Watye ka lega piwu ki cwinywa ducu dok bene wacwakowu.”—Metropolitan Epiphanius I of Kyiv, ripot ma kicoyo i gajeti me The Jerusalem Post, Marci 16, 2022.

•   “Ladit wi Kanica me Russian Orthodox otelo lega pi lumony me Russia i Ceng Cabit. Ma lubbe ki lweny ma Russia ooto i kom Ukraine, en ocuko cwiny lumony me Russia me lweny matek me gwoko lobogi calo ‘jo me Russia kikome.’”—Reuters, April 3, 2022.

 Tika porre pi Lukricitayo me donyo i lweny? Gin ango ma Baibul waco?

 Baibul nyuto ni lulub kor Yecu Kricito pe gidonyo i lweny.

•   “Dwok pala lucwanni kakare i akura; pien jo ducu ma mako pala lucwan, gibinekogi bene ki pala lucwan.”—Matayo 26:52.

   Tika ngat ma cwako nyo donyo i lweny nongo tye ka lubo pwony pa Yecu?

•   “Amiyowu cik manyen, ni, wumarre kekenwu; wumarre kekenwu macalo ceng amarowu. Pi man dano ducu bingeyo ni wun lupwonnyena, ka mer tye i kinwu.”—Jon 13:34, 35.

   Tika ngat ma cwako lweny nongo tye ka nyuto lakodi mar ma Yecu owaco ni binyuto lulub kore?

 Pi ngec mukene, kwan pwony ma wiye tye ni “Tika Porre pi Lukricitayo me Donyo i Lweny?”

 Tika porre pi Lukricitayo pe me donyo i lweny i kare-ni? Porre. Baibul otito ni i karewa-ni, ma kilwongo ni “kare me agikki,” jo mapol ma gia ki i lobe ducu gibilubo pwony pa Yecu kun ‘pe gimedde ki pwonyo lweny.”—Icaya 2:2, 4.

•   Pi ngec mukene, kwan pwony ma lubbe aluba ma okatti i Wi Lubele ma wiye tye ni “Lubanga Neno Lweny Nining?”

 Cokcok-ki, Jehovah a “Lubanga won kuc,” bitic ki gamentene me polo me laro dano “ki i tim bwami ki i un ma gibedo ka unogi kwede.”—Jo Pilipi 4:9; Jabuli 72:14.

•   Me niang kit ma en bitimone kwede, nen vidio ma wiye tye ni Ker pa Lubanga Obedo Gin Ango?